ຖວທ ແຂວງສາລະວັນ ປະເມີນພະນັກງານລັດຖະກອນ

 

   ໃນວັນທີ 5 ພະຈິກ 2020 ຢູ່ພະແນກຖະແຫຼງຂ່າວ-ວັດຖະນະທຳ ແລະທ່ອງທ່ຽວແຂວງສາລະວັນ ຈັດກອງປະຊຸມປະເມີນພະນັກງານລັດຖະກອນ, ໂດຍການເປັນປະທານຂອງທ່ານ ມະໄລວອນ ສີປະເສີດ ຮັກສາການຫົວໜ້າພະແນກ ຖວທ ແຂວງ, ມີບັນດາທ່ານຮອງຫົວໜ້າພະແນກ, ຫົວໜ້າຫ້ອງການ-ຮອງຫ້ອງການ, ຫົວໜ້າຂະແໜງ-ຮອງຂະແໜງ ແລະພະນັກງານລັດຖະກອນເຂົ້າຮ່ວມ.

 ທ່ານ ບຸນກ່ອງ ເກດທອງຄຳ ຮອງຫົວໜ້າພະແນກ ຖວທ ແຂວງ ໄດ້ຜ່ານດໍາລັດເລກທີ 300/ລບ ວ່າດ້ວຍການປະເມີນຜົນການປະຕິບັດວຽກງານຂອງພະນັກງານ-ລັດຖະກອນເປັນຕົ້ນ: ການປະເມີນຜົນການປະຕິບັດວຽກງານວິຊາສະເພາະທີ່ການຈັດຕັ້ງໄດ້ມອບໝາຍໃຫ້ໃນໄລຍະຜ່ານຂອງພະນັກງານ-ລັດຖະກອນ, ຫຼັກການ, ຂອບເຂດຂອງການນຳໃຊ້, ປະເພດການປະເມີນຜົນ, ການປະເມີນຜົນປົກກະຕິ, ການປະເມີນຜົນສະເພາະ, ຂັ້ນຕອນການປະເມີນຜົນ, ແບບພິມການປະເມີນຜົນ, ມາດຕະຖານວັດແທກການປະເມີນ, ດ້ານຄຸນທາດການເມືອງແລະຄຸນສົມບັດສິນທຳປະຕິວັດ, ດ້ານຄວາມຮູ້, ຄວາມສາມາດ ແລະ ປະສົບການ, ການປະຕິບັດໜ້າທີ່ວຽກງານວິທີດຳເນີນການປະເມີນ, ເງື່ອນໄຂ, ສິດໜ້າທີ່ຂອງຜູ້ຖືກປະເມີນຜົນ ແລະການຈັດຕັ້ງປະຕິບັດ.

  ຈາກນັ້ນຜູ້ເຂົ້າຮ່ວມກໍ່ໄດ້ຮັບຟັງຄຳແນະນຳກ່ຽວກັບການຈັດຕັ້ງປະຕິບັດດຳລັດການປະເມີນຜົນຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບປະເມີນຜົນພະ ນັກງານລັດຖະກອນປະຈໍາປີ 2020, ການແບ່ງຈຸ, ການໃຫ້ຄະແນນ,ທັງນີ້ກໍເພື່ອເປັນການປະເມີນມີຄວາມຖືກຕ້ອງ, ສອດຄ່ອງກັບຄວາມເປັນຈິງໃນການຈັດຕັ້ງປະຕິ ບັດໜ້າທີ່ວຽກງານ, ວິຊາສະ ເພາະທີ່ການຈັດຕັ້ງໄດ້ມອບໝາຍ ໃຫ້ໃນໄລຍະ 1 ປີຜ່ານມາ, ທັງເປັນ ການຊອກໃຫ້ເຫັນດ້ານດີ, ດ້ານຕັ້ງ ໜ້າ, ຈຸດອ່ອນ, ຂໍ້ຄົງຄ້າງ, ວິທີແກ້ໄຂໃນຕໍ່ໜ້າ, ອີກບັນຫາໜຶ່ງກໍເພື່ອເປັນການຕຳນິສົ່ງຂ່າວກໍ່ສ້າງຊ່ວຍເຫຼືອເຊິ່ງກັນ ແລະກັນ, ເປັນການ ສ້າງຜົນງານຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ XI ຂອງສູນກາງພັກ ແລະກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງສາລະວັນທີ່ຈະໄຂຂຶ້ນໃນຕໍ່ໜ້ານີ້ໃຫ້ເປັນຂະບວນກວ້າງຂວາງ ແລະຟົດຟື້ນ.

-------------

ຂ່າວ: ສິດຕາ ເພັດ

ຮູບພາບ: ໜັງສືພິມເສດຖະກິດ-ສັງຄົມ

แชร์