ກົມປ່າໄມ້ມອບເຄື່ອງຊ່ວຍເຫຼືອໃຫ້ 4 ເມືອງ

   ກົມປ່າໄມ້ ກະຊວງກະສິກຳ ແລະປ່າໄມ້ມອບເຄື່ອງຊ່ວຍເຫຼືອໃຫ້ 4 ເມືອງ ທີ່ນອນໃນພື້ນທີ່ໂຄງການ ແລະນອກໂຄງການໃນໂຄງການຄຸ້ມຄອງທີ່ດິນ ແລະປ່າໄມ້ແບບຍືນຍົງຢູ່ໃນລະບົບນິເວດປ່າໂຄກຂັ້ນແຂວງສະຫວັນນະເຂດທີ່ໄດ້ຮັບຜົນກະທົບຈາກໄພນໍ້າຖ້ວມ.

   ພິທີມອບ-ຮັບໄດ້ຈັດຂຶ້ນໃນວັນທີ 4 ພະຈິກ 2020 ທີ່ຫ້ອງວ່າການປົກຄອງແຂວງສະຫວັນນະເຂດ, ໂດຍກົມປ່າໄມ້ກະຊວງກະສິກຳ ແລະປ່າໄມ້ຮ່ວມກັບພະແນກ ກະສິກຳ ແລະປ່າໄມ້ແຂວງສະຫວັນນະເຂດ ໃນໂຄງການຄຸ້ມຄອງທີ່ດິນ ແລະປ່າໄມ້ແບບຍືນຍົງຢູ່ລະບົບນິເວດປ່າໂຄກຂັ້ນແຂວງນຳໂດຍ ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້ເຂົ້າມອບເຄື່ອງຊ່ວຍເຫຼືອໃຫ້ບັນດາເມືອງຕ່າງໆ ຂອງແຂວງສະຫວັນນະເຂດທີ່ໄດ້ຮັບຜົນກະທົບຈາກໄພພິບັດນໍ້າຖ້ວມຊຶ່ງເປັນປະທານຮັບໂດຍທ່ານ ທ່ອນ ແກ້ວ ພຸດທະໄກຍະລາດ ຮອງເຈົ້າ ແຂວງສະຫວັນນະເຂດ.

  ສໍາລັບເຄື່ອງທີ່ນໍາມາມອບໃນຄັ້ງນີ້ປະກອບດ້ວຍ 17 ລາຍການ ຄື: ເຂົ້າສານ 90 ເປົ໋າ, ເກືອ 500 ໂລ, ໝາກເຜັດແຫ້ງ 100 ໂລ, ແນວພັນຜັກລວມ 320 ຫໍ່, ຢອກຢາງ 50 ໂຫຼ, ຖ້ວຍ 100 ໂຫຼ,ບ່ວງ 100 ໂຫຼ, ແຟັບ 300 ຖົງ, ສະບູ 100 ຊົບ, ຢາສະຜົມ 50 ຊົບ, ຜ້າຫົ່ມ 400 ຜືນ, ຜ້າເຊັດ ໂຕ 100 ຜືນ, ເກີບແຕະ 300 ຄູ່, ຜ້າອະນາໄມຜູ້ ຍິງ 500 ຊົບ, ບູຫຼົດຂັດຖູເຮືອນ 10 ໂຫຼ, ຄຸໃສ່ນໍ້າ 200 ໜ່ວຍ ແລະກະຕິກນໍ້າ 20 ລິດ 550 ໜ່ວຍ ລວມມູນຄ່າທັງໝົດ 100 ລ້ານກີບ, ໃນນີ້ແຜນການມອບແມ່ນຈະໄດ້ຊ່ວຍເຫຼືອຢູ່ 4 ເມືອງຂອງ ແຂວງສະຫວັນນະເຂດທີ່ນອນໃນພື້ນທີ່ຂອງໂຄງການ ແລະພື້ນທີ່ນອກໂຄງການໃນໂຄງການຄຸ້ມ ຄອງທີ່ດິນ ແລະ ປ່າໄມ້ແບບຍືນຍົງຢູ່ໃນລະບົບນິເວດປ່າໂຄກຂັ້ນ ແຂວງສະຫວັນນະເຂດ ລວມທັງໝົດ 89 ບ້ານຄື: ເມືອງຊົນນະບູລີ ມອບໃຫ້ 31 ບ້ານ ມູນຄ່າຊ່ວຍເຫຼືອ 41,2 ລ້ານກີບ, ເມືອງສອງ ຄອນ 21 ບ້ານ ມູນຄ່າ 28,8 ລ້ານກີບ, ເມືອງພີນ 26 ບ້ານມູນຄ່າ14,5 ລ້ານກີບ ແລະເມືອງທ່າປາງທອງ 11 ບ້ານ ມູນຄ່າ ຊ່ວຍເຫຼືອ 15,3 ລ້ານກີບ.

แชร์