ຄະນະບໍລິຫານງານພັກເມືອງຊະນະຄາມດໍາເນີນກອງປະຊຸມຄັ້ງທີ 4

  ກອງປະຊຸມຄົບຄະນະບໍລິຫານງານພັກເມືອງຊະນະຄາມ ແຂວງວຽງຈັນ, ຄັ້ງທີ 4 ສະໄໝທີ VII ໄດ້ຈັດຂຶ້ນໃນວັນທີ 5 ພະຈິກ 2020, ທີ່ຫ້ອງປະຊຸມສະໂມສອນຂອງເມືອງດັ່ງກ່າວ, ໂດຍພາຍໃຕ້ການເປັນປະທານຂອງສະຫາຍ ສະໝານ ວິເສດຍະພົງສ໌ ເລຂາຄະນະບໍລິຫານງານພັກເມືອງເຈົ້າເມືອງຊະນະຄາມ, ມີບັນດາສະ ຫາຍຄະນະປະຈໍາພັກເມືອງ, ກໍາມະການພັກເມືອງ, ເລຂາຄະນະພັກຮາກຖານ, ຄະນະພັກ-ຄະນະບັນຊາກໍາລັງປ້ອງກັນຊາດ-ປ້ອງກັນຄວາມສະຫງົບ ແລະບັນດາຫົວໜ້າຫ້ອງການອ້ອມຂ້າງເຂົ້າຮ່ວມ.

  ກອງປະຊຸມໄດ້ຮັບຟັງການສະຫຼຸບການຊີ້ນໍາ-ນໍາພາຈັດຕັ້ງປະຕິ ບັດວຽກງານຮອບດ້ານຂອງຄະນະບໍລິຫານງານພັກເມືອງໃນໄລຍະ 3 ເດືອນ ( 7,8,9) ແລະທິດ ທາງແຜນການ 3 ເດືອນທ້າຍ ປີ 2020, ເພື່ອພ້ອມກັນຍົກສູງຄວາມຮັບຜິດຊອບ ແລະ ສຸມສະຕິປັນຍາເຂົ້າໃນການຄົ້ນຄວ້າປະກອບຄໍາຄິດ-ຄໍາເຫັນເຂົ້າໃສ່ຂົງເຂດວຽກງານດ້ານຕ່າງໆ ແລະຍົກໃຫ້ເຫັນດ້ານດີ, ດ້ານອ່ອນ-ຂໍ້ຄົງຄ້າງ, ບັນດາສາເຫດເພື່ອຊອກວິທີແກ້ໄຂໃຫ້ຖືກຕ້ອງແທດເໝາະກັບສະພາບຕົວຈິງ.

  ກອງປະຊຸມໄດ້ມີຄວາມເປັນເອກະພາບສູງໃນການຊີ້ນໍາ-ນໍາພາວຽກງານຮອບດ້ານໃນໄລຍະຜ່ານມາ ແລະພ້ອມກັນຮັບຮອງທິດທາງ-ວຽກງານຈຸດສຸມ 3 ເດືອນ ທ້າຍປີ, ໂດຍຄະນະພັກແຕ່ລະຂັ້ນຕ້ອງໄດ້ເອົາໃຈໃສ່ກໍາແໜ້ນບັນດາບັນດາມະຕິຄໍາສັ່ງ, ກົດລະບຽບຂອງພັກ, ກົດໝາຍຂອງລັດຢ່າງເລິກເຊິ່ງ, ສືບຕໍ່ໃນການຊີ້ນໍາ-ນໍາພາປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບໃຫ້ເປັນຂອງທົ່ວປວງຊົນຮອບດ້ານດ້ວຍຮູບແບບການລົງກໍ່ສ້າງຮາກຖານການເມືອງແບບມູນເຊື້ອ, ສູ້ຊົນຈັດຕັ້ງປະຕິບັດບັນດາໂຄງການຕ່າງໆໃຫ້ສໍາເລັດ, ສູ້ຊົນຂຸດຄົ້ນ-ເກັບລາຍຮັບງົບປະມານໃຫ້ບັນລຸຕາມຄາດໝາຍ ແລະຄຸ້ມຄອງລາຍຈ່າຍໃຫ້ຖືກຕ້ອງຕາມລະບຽບກົດໝາຍ, ສືບຕໍ່ໃນການລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານຕິດພັນກັບວຽກ 3 ສ້າງໃຫ້ປາກົດຜົນເປັນຈິງ, ປັບປຸງຄຸນນະພາບການສຶກສາໃຫ້ມີປະສິດທິ ພາບ, ເອົາໃຈໃສ່ໃນການປ້ອງກັນພະຍາດຕາມລະດູການ ແລະການສົ່ງເສີມສຸຂະພາບ, ສືບຕໍ່ຕິດຕາມເຝົ້າການລະບາດຂອງພະຍາດໂຄວິດ-19, ພະຍາດໄຂ້ເລືອດອອກ ແລະພະຍາດອື່ນໆຢ່າງເຂັ້ມງວດ, ສົ່ງເສີມການໂຄສະນາມວນຊົນດ້ວຍຫຼາຍຮູບແບບ ແລະເປັນປົກກະຕິ, ຊຸກຍູ້ສົ່ງເສີມການສ້າງວຽກເຮັດງານທໍາຂອງປະຊາຊົນ ແລະປະຕິບັດນະໂຍບາຍຕໍ່ຜູ່ທີ່ມີຜົນງານຄຸນງາມຄວາມດີຕໍ່ປະເທດຊາດ, ເສີມຂະຫາຍບົດບາດຂອງສະພາປະຊາຊົນແຂວງປະຈໍາເມືອງໃຫ້ມີປະສິດທິຜົນ ແລະເອົາໃຈໃສ່ເພີມທະວີການນໍາພາຂອງອົງການຈັດຕັ້ງມະຫາຊົນໃຫ້ເປັນຂະບວນຟົດຟື້ນ.

  ໃນກອງປະຊຸມຄັ້ງນີ້ຍັງໄດ້ຮັບຟັງການມີຄໍາເຫັນໂອ້ລົມຈາກສະຫາຍ ສະໝານ ວິເສດຍະພົງສ໌ ຊຶ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນໍາ-ນໍາພາຂອງຄະນະພັກໃນໄລຍະຜ່ານມາ, ທີ່ສາມາດຍາດໄດ້ຜົນສໍາເລັດໃນຫຼາຍດ້ານ, ພ້ອມກັນນີ້ສະຫາຍຍັງໄດ້ຮຽກຮ້ອງມາຍັງບັນດາຄະນະພັກ, ພະນັກງານນໍາພາ-ຄຸ້ມຄອງອາ ດີດການນໍາ, ພະນັກງານລັດຖະກອນ, ທະຫານ, ຕໍາຫຼວດ, ອົງການປົກຄອງບ້ານ ແລະປະຊາຊົນບັນດາເຜົ່າໃນທົ່ວເມືອງຈົ່ງໄດ້ເຊີດຊູສະຕິຄວາມເຈົ້າ ແລະຄວາມຮັບ ຜິດຊອບທາງດ້ານການເມືອງໃຫ້ສູງຂຶ້ນ, ເພື່ອແນໃສ່ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃນຄັ້ງນີ້ໃຫ້ປະກົດຜົນເປັນຈິງ.

-----------

ຂຽນໂດຍ: ສະຫຼິງ

ຮູບພາບ: ໜັງສືພິມເສດຖະກິດ-ສັງຄົມ

แชร์