ໂຄງການອະນຸລັກຊີວະນາໆພັນສະຫຼຸບວຽກງານຜ່ານມາ

  ວັນທີ 6 ພະຈິກ 2020 ນີ້ຄະນະຊີ້ນຳໂຄງການອະນຸລັກຊີວະນາໆພັນ ແລະປ່າໄມ້ແບບປະສົມປະສານຂັ້ນແຂວງສະຫຼຸບການຈັດຕັ້ງປະຕິບັດວຽກງານປີ 2020 ແລະທິດທາງແຜນການ 2021 ຢູ່ທີ່ຫ້ອງວ່າການແຂວງຫຼວງນໍ້າທາ ໂດຍການເປັນປະທານຂອງທ່ານ ພິມແກ້ວ ທຳລະສິນ ຫົວໜ້າພະແນກກະສິກຳ ແລະປ່າໄມ້ແຂວງ, ທັງເປັນປະທານຄະນະຊີ້ນໍາໂຄງການຂັ້ນແຂວງ, ທ່ານ ດິດມາກ ຫົວໜ້າທີມງານທີ່ປຶກສາໂຄງການ ອຊປ, ມີຜູ້ຕາງໜ້າໜ່ວຍງານຄຸ້ມ ຄອງໂຄງການຂັ້ນແຂວງ, ຂັ້ນເມືອງ ແລະຂະແໜງການທີ່ກ່ຽວຂ້ອງເຂົ້າຮ່ວມ.

  ກອງປະຊຸມຜູ້ເຂົ້າຮ່ວມໄດ້ຮັບຟັງການລາຍງານຄວາມຄືບໜ້າໃນການຈັດຕັ້ງປະຕິບັດວຽກງານ ປີ 2020 ແລະທິດທາງແຜນການ 2021 ຂອງໂຄງການອະນຸລັກຊີວະນາໆພັນ ແລະປ່າໄມ້ແບບປະສົມປະສານຈາກທ່ານ ສິດທິສັກ ປ້ານອິນຫວນ ຫົວໜ້າໂຄງການ ອຊປ ຂັ້ນແຂວງ, ໃນປີ 2020 ນີ້ ແຜນຄຸ້ມຄອງປ່າສະຫງວນແຫ່ງ ຊາດນໍ້າຫ້າໄດ້ຖືກຮັບຮອງຢ່າງເປັນທາງການພ້ອມທັງປັບປຸງວິຊາການເຮັດວຽກໂດມີການຈັດກອງປະຊຸມປຶກສາຫາລືທຸກໆເດືອນອັນເຮັດໃຫ້ພະນັກງານມີຄວາມຮູ້ ແລະປະສົບການເພີ່ມຂຶ້ນເລື້ອຍໆ,ຊຶ່ງມັນສະແດງອອກ: ການພັດທະນາຂີດຄວາມອາດສາມາດທີ່ເໝາະສົມ ແລະການຮ່ວມມືຕ່າງໆ, ດັດແກ້ ແລະປັບປຸງແຜນຄຸ້ມຄອງປ່າສະຫງວນ, ສະໜັບສະໜູນການຈັດແບ່ງເຂດ, ກວດຄືນ ແລະປັກຫຼັກໝາຍເຂດແດນ, ເພື່ອສ້າງຄວາມເຂັ້ມແຂງໃຫ້ແກ່ການລາດຕະເວນ, ການສົ່ງເສີມການໂຄສະ ນາເຜີຍແຜ່, ການມີສ່ວນຮ່ວມຂອງຊຸມຊົນ, ສະໜັບສະໜູນການກວດກາຕິດຕາມລະບົບນິເວດ ແລະ ການຄົ້ນຄວ້າສົ່ງເສີມການປະສານງານໃນການເຊື່ອມສານກັບການທ່ອງທ່ຽວ, ສະໜັບສະໜູນການເງິນພາຍນອກ ແລະເຊື່ອມເຂົ້າກັບແຜນພັດທະນາເສດຖະກິດ-ສັງຄົມແຫ່ງຊາດ, ສ້າງຄວາມເຂັ້ມແຂງໃນການປະສານງານການຮ່ວມມືຂອງບັນດາເພື່ອນຮ່ວມງານ, ຈຳແນກບັນຫາໄພຂົ່ມຂູ່ ແລະຄວາມສຽງຕໍ່ຊີວະນາໆພັນ, ກຳນົດແນວຄວາມຄິດ, ແຜນຈັດຕັ້ງປະຕິບັດກົດໝາຍ, ໂດຍນໍາໃຊ້ແບບ ຢ່າງທີ່ດີໃນການຊຸກຍູ້ວຽກງານສືກສາອົບຮົມ ແລະການມີສ່ວນຮ່ວມຂອງຊູມຊົນ. 

  ສໍາລັບທິດທາງແຜນການໃນຕໍ່ໜ້າແມ່ນສືບຕໍ່ສ້າງຄວາມເຂັ້ມແຂງແກ່ລະບົບການເຮັດວຽກບໍລິຫານທີ່ດີ, ສົ່ງເສີມການປະສານງານກັບການທ່ອງທ່ຽວອານຸລັກ, ເພື່ອສ້າງຄວາມເຂັ້ມແຂງໃນການປະສານງານກັບການຮ່ວມມືຂອງບັນດາເພື່ອນຮ່ວມງານຈຳແນກບັນຫາໄພຂົ່ມຂູ່ທີ່ມີຄວາມສຽງຕໍ່ຊີວະນາໆພັນ ແລະປ່າໄມ້, ຕິດຕາມປັບປຸງແຜນການນຳໃຊ້ທີ່ດິນ, ກວດກາຕິດຕາມຜົນໄດ້ຮັບ ແລະວຽກງານອື່ນໆຕື່ມອີກ.

---------------

ຂຽນໂດຍ: ສົມພອນ ຂຸນດາວົງ

ຮູບພາບ: #ຫນັງສືພິມເສດຖະກິດສັງຄົມ

แชร์