ຫົວໜ້າ ປກສ ບໍລິຄຳໄຊຊີ້ນໍາວຽກງານຢູ່ທ່າພະບາດ

 ໃນວັນທີ 4 ພະຈິກ 2020 ທ່ານ ພັອ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງບໍລິຄໍາໄຊ ພ້ອມດ້ວຍຄະນະພັກກອງບັນຊາການ ປກສ ແຂວງ ໄດ້ລົງເຄື່ອນໄຫວຊີ້ນໍາວຽກງານຢູ່ທີ່ກອງບັນຊາການ ປກສ ເມືອງທ່າພະບາດມີຄະນະພັກ, ຄະນະກອງບັນຊາການ ປກສ ເມືອງທ່າພະບາດ,ພະນັກງານນໍາພາບັນຊາ, ພ້ອມດ້ວຍພະນັກງານນັກຮົບເຂົ້າຮ້ວມຢ່າງພ້ອມພຽງ.

 ທ່ານ ພັທ ດວງໄຊ ຈັນທະວັງໂສ ຫົວໜ້າກອງບັນຊາການ ປກສ ເມືອງທ່າພະບາດ, ໄດ້ລາຍງານສະພາບການເຄື່ອນໄຫວຊີ້ນໍາ-ນໍາພາ, ການຈັດຕັ້ງປະຕິບັດວຽກງານປ້ອງກັນຄວາມສະຫງົບທົ່ວປກສ ເມືອງທ່າພະບາດໃນໄລຍະຜ່ານມາ, ຊຶ່ງໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກໃນການເຄື່ອນໄຫວວຽກງານ, ສະພາບການຕ່າງໆທີ່ເກີດຂຶ້ນຢູ່ພາຍໃນເມືອງທ່າພະບາດເຊັ່ນ: ສະພາບກຸ້ມຄົນບໍ່ຫວັງດີທີ່ກໍ່ຄວາມບໍ່ສະຫງົບ,ການເຄື່ອນໄຫວຄ້າຂາຍເຖື່ອນ,ຄ້າຂາຍຢາເສບຕິດ,ບັນຫາການເກີດອຸບັດ ເຫດຕາມທ້ອງຖະໜົນ, ການເເຜ່ລະບາດຂອງພະຍາດໂຄວິດ-19 ແລະປະກົດການຍໍ້ທໍ້ຕ່າງໆ, ຕໍ່ກັບບັນຫາດັ່ງກ່າວຄະນະພັກ,ຄະນະກອງບັນຊາການ,ໄດ້ມີຄວາມຕັດສິນໃຈສູງນໍາພາເຄື່ອນໄຫວສະກັດກັ້ນ ແລະແກ້ໄຂໄດ້ທັນການຊຶ່ງໄດ້ເຮັດໃຫ້ເມືອງທ່າພະບາດມີຄວາມສະຫງົບທາງດ້ານການເມືອງ,ສັງຄົມມີຄວາມເປັນລະບຽບຮຽບຮ້ອຍ, ຈາກນັ້ນບັນດາຫົວໜ້າພະເເນກ, ຫົວໜ້າ ປກສ ບໍລິການປະຊາຊົນ, ໄດ້ພັດປ່ຽນກັນຂຶ້ນລາຍງານສະພາບການຕ່າງໆທີ່ເກີດຂຶ້ນຢູ່ໃນເຂດຄວາມຮັບຜິດຊອບຂອງຕົນຕໍ່ທີ່ປະຊຸມ.

  ໂອກາດດຽວກັນທ່ານ ພັອ ກົງຈັນ ໄຊປັນຍາ ໄດ້ໃຫ້ທິດຊີ້ນໍາຕໍ່ບັນດາຄະນະພັກ-ຄະນະກອງບັນຊາການ, ຈົງເອົາໃຈໃສ່ສຶກສາອົບຮົບການເມືອງ-ນໍາພາແນວຄິດໃຫ້ແກ່ພະນັກງານ-ນັກຮົບຢ່າງເປັນປົກກະຕິຕໍ່ເນື່ອງ, ຍົກສູງຄຸນທາດການເມືອງ, ຄຸນສົມບັດສິນທໍາປະຕິວັດ, ມີແບບແຜນນໍາພາ-ແບບແຜນວິທີເຮັດວຽກຢ່າງມີວິທະຍາ ສາດທີ່ທັນສະໄໝ, ມີລະບຽບວິໃນເຂັ້ມງວດ, ຍົກສູງສະຕິຄວາມຮັບຜິດຊອບຕໍ່ໜ້າທີ່ວຽກງານການເມືອງຂອງພັກກໍ່ຄືວຽກງານປ້ອງກັນຄວາມສະຫງົບໃນສະພາບການໃໝ່, ເພີ່ມທະວີສະກັດກັ້ນ, ຕ້ານ ແລະ ແກ້ໄຂສະພາບປາກົດການຫຍໍ້ທໍ້ໃນສັງຄົມໂດຍສະເພາະເອົາໃຈໃສ່ປະຕິບັດຕາມ 9 ຫົວຂໍ້ສຳມະນາວິທະຍາສາດ, ການເເກ້ໄຂບັນຫາ 4 ເຖື່ອນທີ່ແຂວງວາງອອກໃຫ້ປະກົດຜົນເປັນຈິງ,ເອົາໃຈໃສ່ປັບປຸງຟື້ນຖານໂຄງລ່າງ, ສ້າງພາລາທິການກັບທີ່ເພື່ອເຮັດໃຫ້ກົມກອງຂອງຕົນມີຄວາມໜັກແໜ້ນເຂັ້ມແຂງຂຶ້ນເປັນກ້າວໆ, ທັງໝົດນັ້ນກໍ່ເພື່ອເເນໃສ່ຮັບປະກັນໃຫ້ແກ່ການເຮັດວຽກງານປ້ອງກັນຄວາມສະຫງົບຄວາມເປັນລະບຽບຮຽບຮ້ອຍໃນທົ່ວເມືອງທ່າພະບາດນັບມື້ນັນດີຂຶ້ນເລື້ອຍໆ.

------------

ຂຽນໂດຍ: ສທ ຄໍາແພງ ໄຊສົມບຸນ

ຮູບພາບ: #ຫນັງສືພິມເສດຖະກິດສັງຄົມ

แชร์