ໂຕໂຍຕ້າ ນຳສະເໜີລົດໃໝ່ 2 ລຸ້ນ ໃນງານລົດນາໆຊາດວຽງຈັນ

  ບໍລິສັດ ໂຕໂຢຕ້າ ລາວຈໍາກັດ ຈັດ ານຖະແຫຼງຂ່າວເປີດຕົວລົດລຸ້ນໃໝ່ຫຼ້າສຸດ 2 ລຸ້ນຄື: ໂຕໂຢ ຕ້າຟໍຈູນເນີ້ ໄຮພລັສ ແລະໂຕໂຢຕ້າໄຮລັກສ ຣີໂວ້ເອດ ເວນເຈີ້ ໃນງານວາງສະແດງລົດນາໆຊາດວຽງຈັນ ຄັ້ງທີ 5 ທີ່ສູນວາງສະແດງສິນຄ້າລາວ-ໄອເຕັກ ນະຄອນຫຼວງວຽງຈັນ ເມື່ອວັນທີ 7 ພະຈິກ 2020.

  ທ່ານ ມາຊາອາກິ ຄາວາບາຕະ ອໍານວຍການບໍລິສັດໂຕໂຢຕ້າ ລາວຈໍາກັດ ກ່າວວ່າ: ບໍລິສັດໂຕໂຢຕ້າ ລາວ ຈໍາກັດ ມີຄວາມຍິນດີຢ່າງຫຼວງຫຼາຍທີ່ໄດ້ຮ່ວມງານວາງສະ ແດງລົດນາໆຊາດວຽງຈັນ ຄັ້ງທີ 5 ທີ່ໄດ້ຈັດຂຶ້ນລະຫວ່າງວັນທີ 7-15 ພະຈິກ 2020 ທີ່ສູນວາງສະແດງສິນຄ້າລາວ-ໄອເຕັກ,ໂດຍງານຄັ້ງນີ້ບໍລິສັດໂຕໂຢຕ້າລາວໄດ້ນຳເອົານະວັດຕະກຳຍານຍົນຂອງໂຕໂຢຕ້າທີ່ໄດ້ພັດທະນາດ້ວຍເຕັກໂນໂລຊີລະດັບໂລກມີການອອກແບບທີ່ສວຍງາມທັນສະໄໝມາໃຫ້ແກ່ລູກຄ້າໄດ້ສຳຜັດ ແລະ ທົດລອງຂັບຂີ່, ພ້ອມນີ້ຍັງໄດ້ນໍາເອົາລົດໂຕໂຢຕ້າ ຟໍຈູນເນີ້ ໄຮພລັສ ແລະໂຕໂຢຕ້າໄຮລັກສຣີໂວ້ ເອດເວນເຈີ້ ລຸ້ນໃໝ່ມານໍາສະເໜີເພື່ອເພີ່ມທາງເລືອກໃຫ້ແກ່ລູກຄ້າ.

  ສໍາລັບລົດໂຕໂຢຕ້າ ຟໍຈູນເນີ້ ໄຮພລັສ ເປັນລົດອະເນກປະສົງລຸ້ນສູງສຸດຂອງຟໍຈູນເນີ້ທີ່ມີຄວາມສວຍງາມທັງພາຍນອກ ແລະພາຍໃນ, ສ່ວນໂຕໂຢຕ້າໄຮລັກສຣີໂວ້ ເອດເວນເຈີ້ ເປັນລົດກະບະອະເນກປະສົງທີ່ມີຄວາມສວຍງາມແຂ່ງແກ່ງທົນທານສາມາດຂັບຂີ່ໄດ້ທຸກສະພາບການເດີນທາງ, ໂດຍລົດທັງສອງລຸ້ນແມ່ນໄດ້ຮັບການອອກແບບໃໝ່ໃຫ້ທັນສະໄໝຫຼາຍຂຶ້ນໂດຍໄດ້ເພີ່ມແຮງມ້າຈາກ 177Ps ເປັນ 204Ps, ແຮງບິດຈາກ 450Nm ເປັນ 500Nm, ປະຫຍັດນໍ້າມັນຂຶ້ນ 4% ຈາກລຸ້ນປະຈຸ ບັນ, ມີການປັບປຸງເຄື່ອງສຽງໃໝ່ເຊື່ອມຕໍ່ວ່ອງໄວ, ມີລະບົບເຊັນເຊີ້ 6 ຈຸດ ໜ້າ 2 ຫຼັງ 4 ແລະມີລະບົບຊ່ວຍປ້ອງກັນການອອກລົດຜິດວິທີ (DSC) ຊຶ່ງຈະຊ່ວຍໃຫ້ຜູ້ຂັບຂີ່ໝັ້ນໃຈໃນຄວາມປອດໄພກໍລະນີອອກລົດຜິດວິທີ ຫຼືຢຽບຄັນເລັ່ງແຮງຜິດປົກກະຕິເວລາຖອຍ ຫຼືອອກໂຕໃນມູມແຄບຊຶ່ງອາດເກີດການຕໍາໄດ້ແຕ່ລະບົບ DSC ຈະຊ່ວຍຫຼຸດຜ່ອນ ຫຼືດຶງແຮງຈັກລົງ ແລະຊ່ວຍໃນການເບກຂອງລົດໂດຍບໍ່ກໍ່ໃຫ້ເກີດການຕໍາໄດ້.

    ນອກຈາກນີ້ບໍລິສັດໂຕໂຢຕ້າລາວຍັງໄດ້ນໍາເອົາລົດ Toyota Vios ເຂົ້າຮ່ວມງານວາງສະແດງນໍາອີກຊຶ່ງເປັນລົດທີ່ໄດ້ອອກແບບດ້ານໜ້າຮູບໂສມໃໝ່ມີຕາໄຟໜ້າ LED ແລະລະບົບສຽງທີ່ຮອງຮັບຊຶ່ງຊ່ວຍໃຫ້ການຂັບຂີ່ສະດວກສະບາຍ ແລະມີຄວາມທັນສະໄໝຂຶ້ນກວ່າເກົ່າ,ຊຶ່ງລົດທຸກລຸ້ນຂອງໂຕໂຢຕ້ານອກຈາກຈະໄດ້ຮັບການອອກແບບພັດທະນາໃຫ້ມີຄວາມສວຍງາມທັນສະໄໝແລ້ວຍັງມີເຕັກໂນໂລຊີຊັ້ນສູງທີ່ຕອບສະໜອງຕໍ່ການໃຊ້ງານໃນປະຈຸບັນໄດ້ເປັນຢ່າງດີ ແລະຍັງມີລະບົບຄວາມປອດໄພສູງ ສຸດເພື່ອໃຫ້ທ່ານໄດ້ມີຄວາມອຸ່ນໃຈ ແລະໝັ້ນໃຈທຸກຄັ້ງໃນທຸກການຂັບຂີ່.

   ແນວໃດກໍດີທ່ານໃດທີ່ສົນໃຈສາມາດເຂົ້າເບິ່ງລົດໂຕຈິງໃນງານວາງສະແດງລົດນາໆຊາດວຽງຈັນຄັ້ງທີ 5 ຫຼືສອບຖາມລາຍລະອຽດຕ່າງໆໄດ້ທີ່ຫ້ອງຂາຍໂຕໂຢຕ້າທຸກສາຂາທົ່ວປະເທດ.

แชร์