ສະຖານທູດຈີນ ມອບທຶນຊ່ວຍເຫຼືອຜູ້ປະສົບໄພນໍ້າຖ້ວມ

ສະຖານເອກອັກຄະລັດຖະທູດ ສປ ຈີນ ປະຈໍາ ສປປ ລາວ ໄດ້ນຳເອົາປັດໄຈມູນຄ່າ 5 ພັນໂດລາສະຫະລັດ (ປະມານ 46 ກວ່າລ້ານກີບ) ມອບໃຫ້ອົງການກາແດງລາວເພື່ອປະກອບສ່ວນຊ່ວຍເຫຼືອຜູ້ປະສົບໄພນໍ້າຖ້ວມຢູ່ບັນດາແຂວງພາກໃຕ້ຂອງລາວ, ຊຶ່ງເຮັດໃຫ້ເນື້ອທີ່ການຜະລິດ, ເຮືອນຊານບ້ານຊ່ອງ, ສັດລ້ຽງ ແລະໄຮ່ນາ, ຮົ້ວສວນຂອງປະຊາຊົນໄດ້ຮັບຄວາມເສຍຫາຍຢ່າງໜັກໜ່ວງ.

  ພິທີມອບ-ຮັບຈຳນວນເງິນດັ່ງກ່າວໄດ້ຈັດຂຶ້ນໃນວັນທີ 4 ພະຈິກ ຜ່ານມາທີ່ອົງການກາແດງລາວຕາງໜ້າມອບໂດຍທ່ານ ຈ່ຽງ ຈ້າຍຕົ່ງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ແລະກ່າວຮັບ ແມ່ນທ່ານ ຄໍາຮຸ່ງ ເຮືອງວົງສີ ປະທານອົງການກາແດງລາວຊຶ່ງມີພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

  ທ່ານ ຄໍາຮຸ່ງ ເຮືອງວົງສີ ໄດ້ສະແດງຄວາມຂອບໃຈມາຍັງສະຖານເອກອັກຄະລັດຖະທູດຈີນ ປະຈໍາ ສປປ ລາວ ທີ່ໄດ້ນໍາເງິນມາຊ່ວຍແບ່ງເບົາຄວາມສູນເສຍຂອງປະຊາ ຊົນຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມຄັ້ງນີ້, ຊຶ່ງໄລຍະຜ່ານມາລັດຖະບານຈີນກໍຄືປະຊາຊົນຈີນກໍ່ໄດ້ໃຫ້ການຊ່ວຍເຫຼືອເປັນຈໍານວນຫຼວງຫຼາຍ ແລະເງິນຊ່ວຍເຫຼືອຄັ້ງນີ້ແມ່ນຈະນໍາໄປຊື້ເຄື່ອງໃຊ້ທີ່ຈໍາເປັນເພື່ອນໍາແຈກຢາຍໃຫ້ພໍ່ແມ່ປະຊາຊົນທີ່ປະສົບໄພພິບັດນໍ້າຖ້ວມເພື່ອແບ່ງເບົາບັນເທົາທຸກໃຫ້ກັບພໍ່ແມ່ປະຊາຊົນ.

 

แชร์