ຕາດກະຈຳ ສະຖານທີ່ທາງທໍາມະຊາດທີ່ສວຍງາມ

  ປະຈຸບັນບ້ານເຮົາກໍນັບມື້ຫ່າງໄກອອກຈາກກິ່ນອາຍທໍາມະຊາດໄປເລື້ອຍໆ ໂດຍສະເພາະໃນບັນດາຕົວເມືອງໃຫຍ່ໆ ຫຼືຖ້າມີທໍາມະຊາດກໍ່ແມ່ນການສ້າງຂຶ້ນເອງດ້ວຍນໍ້າມືຂອງມະນຸດຊຶ່ງມີວັດຖຸອຸປະກອນທັນສະໄໝມາເປັນສ່ວນປະກອບ,ເຮັດໃຫ້ການທ່ອງທ່ຽວແບບທໍາມະຊາດໂດຍແທ້ຈິງບໍ່ໄດ້ຮັບຜົນເທົ່າທີ່ຄວນ, ແຕ່ຍັງດີທີ່ບາງທ້ອງຖິ່ນໃນປະເທດເຮົາຍັງມີການອະນຸລັກຮັກສາທໍາມະຊາດທີ່ກໍາເນີດເກີດຂຶ້ນເອງໄວ້ໃຫ້ໄດ້ທ່ອງທ່ຽວດັ່ງຕາດກະຈຳຖືເປັນສະຖານທີ່ທ່ອງທ່ຽວທາງທໍາມະຊາດອີກແຫ່ງໜຶ່ງທີ່ໜ້າສົນໃຈເພາະມີສວຍງາມ, ອາກາດກໍເຢັນສະບາຍດີ, ມີຄວາມໂດດເດັ່ນບໍ່ຄືໃຜ.

  ຕາດກະຈຳເປັນສະຖານທີ່ທາງທໍາມະຊາດທີ່ສວຍງາມ ແລະຄົບບັນຍາກາດທີ່ຫາເບິ່ງໄດ້ຍາກໃນແຫຼ່ງອື່ນເພາະໃນສະຖານທີ່ແຫ່ງນີ້ປະກອບດ້ວຍຫຼາຍພັກ, ຫຼາຍຊັ້ນ ແຕ່ລະຊັ້ນແຕກຕ່າງກັນອອກໄປໃນບໍລິເວນອ້ອມຂ້າງຕາດມີຕົ້ນໄມ້ໃຫຍ່-ນ້ອຍກະແຈກກະຈາຍຕາມເນີນພູ, ຮ່ອງຫ້ວຍຕ່າງໆເຮັດໃຫ້ພື້ນທີ່ມີອາກາດທີ່ເຢັນສົດຊື່ນເປັນໜ້າທ່ຽວຊົມ.

  ຖ້າທ່ານໃດຫາກໄດ້ໄປເມືອງຊຽງເງິນ ແຂວງຫຼວງພະບາງກໍຢ່າລືມໄປແວ່ຊົມນໍ້າຕົກຕາດນໍ້າຕາດກະຈຳແດ່ເດີ! ແລ້ວທ່ານກໍຈະໄດ້ສໍາພັດກັບບັນຍາກາດໃນຍາມແລງເຫັນແລ້ວໜ້າຊື່ນຊົມແທ້ໆທ່ານເອີຍ! ຕາດກະຈຳຕັ້ງຢູ່ເມືອງຊຽງເງິນຫ່າງຈາກຕົວຫຼວງພະບາງປະມານ 40 ກິໂລແມັດ.

ຂ່າວ: ວົງມະນີ ເສດຖະກິດສັງຄົມ

ຮູບພາບ: #ຫນັງສືພິມເສດຖະກິດສັງຄົມ

 

แชร์