ແກ່ນທ້າວ ຫາລືຮ່າງກອງທຶນພັດທະນາກີລາ-ກາຍະກໍາ

  ກອງປະຊຸມທາບທາມ, ຄົ້ນຄວ້າ ແລະປຶກສາຫາລືກ່ຽວກັບຮ່າງຂໍ້ຕົກລົງວ່າດ້ວຍກອງທຶນພັດທະນາກີລາ-ກາຍະກໍາແຂວງເມືອງແກ່ນທ້າວແຂວງໄຊຍະບູລີໄດ້ຈັດຂຶ້ນໃນທ້າຍເດືອນຕຸລາຜ່ານມາທີ່ສະໂມສອນຂອງເມືອງ, ໂດຍເປັນກຽດເຂົ້າຮ່ວມຂອງທ່ານ ຄໍາປຸ່ນ ນວນສະບັບ ຮອງເຈົ້າເມືອງແກ່ນທ້າວ, ທ່ານ ສົມລິດ ອ່ອນຕາຮອງຫົວ ໜ້າພະແນກຍຸຕິທໍາແຂວງໄຊຍະບູລີ, ມີຫົວໜ້າຫ້ອງການ, ກົມກອງ, ອົງການຈັດຕັ້ງ, ລັດວິສາຫະກິດ, ໜ່ວຍບໍລິການທະນາຄານ, ຫົວໜ້າໜ່ວຍງານ, ທະຫານ, ຕໍາຫຼວດເຂົ້າຮ່ວມ 170 ກວ່າຄົນ.

  ໃນກອງປະຊຸມໄດ້ຜ່ານຮ່າງຂໍ້ຕົກລົງວ່າດ້ວຍກອງທຶນພັດທະນາກີລາ-ກາຍະກໍາ ແຂວງໄຊຍະບູລີ ຊຶ່ງຂໍ້ຕົກລົງດັ່ງກ່າວໄດ້ກໍານົດຫຼັກການ, ລະບຽບການ, ວິທີການຕິດ ຕາມກວດກາ ແລະມາດຕະການກ່ຽວກັບການຄຸ້ມຄອງກອງທຶນພັດທະນາກີລາ-ກາຍະກໍາເພື່ອລະດົມຂົນຂວາຍ, ສະສົມທຶນ ແລະນໍາໃຊ້ທຶນແນໃສ່ໃຫ້ມີທຶນພຽງພໍ, ຍືນຍົງເພື່ອນໍາໃຊ້ເຂົ້າໃນວຽກງານກີລາ-ກາຍະກໍາໃຫ້ມີຄຸນນະພາບ,ກ້າວໜ້າ ແລະທັນສະໄໝປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງໄຊຍະບູລີ.

  ກອງທຶນພັດທະນາກີລາ-ກາຍະກໍາ ແຂວງໄຊຍະບູລີ ແມ່ນກອງທຶນຂອງອົງການຈັດຕັ້ງລັດສ້າງຕັ້ງຂຶ້ນເພື່ອລະດົມ ແລະສະສົມທຶນຈາກບຸກຄົນ, ນິຕິບຸກຄົນ, ການຈັດ ຕັ້ງສັງຄົມທັງພາຍໃນ ແລະຕ່າງປະເທດນໍາໃຊ້ເຂົ້າໃນການພັດທະນາບຸກຄະລາກອນກີລາ-ກາຍະກໍາ, ຈັດການແຂ່ງຂັນ, ໃຫ້ຂອງຂວັນລາງວັນແກ່ບັນດາຄູຝຶກ ແລະນັກກີລາເຂົ້າຮ່ວມແຂ່ງຂັນໃນລະດັບຊາດ, ພາກພື້ນ ແລະ ສາກົນຕາມລະບຽບຫຼັກການທີ່ກໍານົດໄວ້, ສະເພາະແຫຼ່ງລາຍຮັບເຂົ້າໃນກອງທຶນໄດ້ມາຈາກງົບປະມານຂອງລັດ, ງົບປະມານການອອກໃບອະນຸຍາດສ້າງຕັ້ງສະໂມສອນ, ເດີນກີລາ, ສະໂມສອນກີລາສັດ, ຄ່າຄຸ້ມຄອງດ້ານວິຊາການສະໜາມກີລາຂອງເອກະຊົນ 5%, ຄ່າທໍານຽມເຂົ້າສະໝັກການແຂ່ງຂັ້ນ, ການສໍາປະທານ ຫຼືເຊົ່າເດີ່ນກີລາ ແລະລາຍຮັບຈາກກິດຈະກໍາອື່ນໆທີ່ຖືກຕ້ອງຕາມກົດໝາຍ, ຮັບຈາກບຸກຄົນ,ນິຕິບຸກຄົນທັງພາຍໃນ ແລະຕ່າງປະເທດ, ແຫຼ່ງລາຍຮັບອື່ນໆທີ່ຖືກຕ້ອງຕາມກົດໝາຍ ແລະຮັບຈາກການປະກອບສ່ວນຂອງພະນັກງານ-ລັດຖະກອນ, ລັດວິສາຫະກິດ,ຮ່າງຂໍ້ຕົກລົງສະບັບນີ້ມີທັງໝົດ 9 ໝວດ 31 ມາດຕາ.

 

แชร์