ສະຫຼຸບຊຸດຮຽນທິດສະດີການເມືອງ-ການປົກຄອງ

  ໃນວັນທີ 4 ພະຈິກ 2020 ທີ່ຫ້ອງປະຊຸມໂຮງໂຮງຮຽນການເມືອງ ແລະການປົກຄອງແຂວງໄຊຍະບູລີໄດ້ຈັດກອງປະຊຸມສະຫຼຸບຖອດຖອນບົດຮຽນຊຸດຮຽນທິດສະດີການເມືອງ-ການປົກຄອງຊັ້ນກາງ 15 ເດືອນ ຮຸ່ນທີ XV ຂຶ້ນ, ໃຫ້ກຽດເຂົ້າຮ່ວມໂດຍທ່ານ ດວງຕາ ໄຊວຸດ ຮອງເລຂາພັກແຂວງ,ທ່ານ ສາຈັນ ສູນດາລາຮອງຫົວໜ້າກົມຄຸ້ມຄອງການຮຽນ-ການສອນຂອງສະຖາບັນການເມືອງ ແລະ ການປົກຄອງແຫ່ງຊາດ, ມີຄະນະອໍານວຍໂຮງຮຽນການເມືອງ, ຕາງໜ້າພະແນກການອ້ອມຂ້າງແຂວງ, ຄູ-ອາຈານ, ຕາງໜ້ານັກສຶກສາໂຮງຮຽນການເມືອງ-ການປົກຄອງເຂົ້າຮ່ວມ.

 ໃນກອງປະຊຸມ ທ່ານ ສີສອນ ພັນບຸນສີ ຫົວໜ້າໂຮງຮຽນການເມືອງ ແລະການປົກຄອງແຂວງໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດຫຼັກສູດການຮຽນ-ການສອນຢູ່ໂຮງຮຽນການເມືອງ-ການປົກຄອງແຂວງໄຊຍະບູລີປະຈໍາປີ 2020 ແລະທິດທາງແຜນການປະຈໍາປີ 2021 ໄດ້ກ່າວວ່າ: ສົກປີຜ່ານມາໄດ້ປັບປຸງ ແລະຫັນການຄຸ້ມ ຄອງນັກສຶກສາເຂົ້າສູ່ລະບຽບເປັນຕົ້ນການຂຶ້ນຫ້ອງ, ລະບຽບຫໍພັກ ແລະໄດ້ເອົາໃຈໃສ່ຄຸ້ມຄອງການປະຕິບັດຂອດຮຽນຕ່າງໆຢ່າງເຂັ້ມງວດ, ການສິດສອນທຸກວິຊາແມ່ນຮັບປະກັນການຈັດຕັ້ງປະຕິບັດໜ່ວຍກິດທີ່ກໍານົດໃນຫຼັກສູດ,ປະຕິບັດຂອດຕ່າງໆເຊັ່ນ: ການຂຶ້ນຫ້ອງຟັງການບັນຍາຍຂອງຄູ, ກຽມສໍາມະນາ, ການຄົ້ນຄວ້າລວມຫ້ອງ ແລະເປັນຈຸເປັນໜ່ວຍ, ການທວນຄືນສອບເສັງ; ນອກນັ້ນຍັງໄດ້ປະເມີນຜົນການສິດສອນຂອງຄູ-ອາຈານເປັນແຕ່ລະພາກຮຽນ ແລະກໍ່ໄດ້ມີການໄປທັດສະນະສຶກສາຢູ່ຫົວໜ່ວຍການຜະລິດຕ່າງໆພາຍໃນແຂວງ, ເຄື່ອນໄຫວກິດຈະກໍາຕ່າງໆເພື່ອຮັບປະກັນການປະຕິບັດ 5 ຫຼັກມູນຂອງການສຶກສາ.

  ການຮຽນ-ການສອນ ແມ່ນໄດ້ເອົາໃຈໃສ່ຄຸ້ມຄອງໄປຕາມການຊີ້ນໍາດ້ານວິຊາການຂອງສະຖາບັນການເມືອງ ແລະການປົກຄອງແຫ່ງຊາດ, ຮັບປະກັນຖືກຕ້ອງກັບຫຼັດສູດ ແລະປະຕິບັດບັນດາໜ່ວຍກິດຂອງແຕ່ລະວິຊາຮຽນຢ່າງຄົບຖ້ວນສາມາດຮັບປະກັນປະຕິບັດໜ່ວຍກິດໄດ້ 100%, ຂອດໜຶ່ງທີ່ສໍາຄັນຂອງການຮຽນ-ການສອນແມ່ນປະເມີນຜົນສຸດທ້າຍຂອງຊຸດຮຽນ ແລະການສອບເສັງຈົບແຕ່ລະວິຊາຮຽນໂດຍອີງໃສ່ຫຼັກສູດຊັ້ນກາງໄດ້ຈັດຕັ້ງການປະເມີນຜົນດ້ວຍການສອບເສັງຂຽນ ແລະສອບ ເສັງປາກເປົ່າ, ການສອບເສັງແມ່ນຖືເອົາຄຸນນະພາບເປັນຫຼັກເພື່ອວັດແທກຄວາມຮັບຮູ້ຂອງນັກສຶກສາ, ໄດ້ນໍາໃຊ້ອາຈານທີ່ມີປະສົບການສ່ວນຫຼາຍແມ່ນອາຈານຜູ້ທີ່ລົງ ເລິກວິຊາສະເພາະໃນຂະແໜງວິຊາ, ກໍາມະການຕາມການແຕ່ງຕັ້ງຂອງສະຖາບັນການເມືອງ ແລະການປົກຄອງແຫ່ງຊາດ.

  ໃນປີ 2019-2020 ໄດ້ດໍາເນີນຊຸດຮຽນ 4 ລະບົບໄປພ້ອມໆກັນເຊັ່ນ: ລະບົບຊັ້ນກາງໄດ້ຄຸ້ມຄອງຊຸດຮຽນ 2 ຊຸດ ມີຜູ້ຮຽນທັງໝົດ 96 ຄົນ, ຍິງ 22 ຄົນໃນນັ້ນຮຽນຈົບໄປແລ້ວ 47 ຄົນ, ຍິງ 13 ຄົນ ປະຈຸບັນພວມສືບຕໍ່ການຮຽນ-ການສອນ 1 ຊຸດ ມີເຂົ້າຮຽນ 49 ຄົນ, ຍິງ 9 ຄົນ, ລະບົບຊັ້ນຕົ້ນໄດ້ 4 ຊຸດຢູ່ 2 ເມືອງຄື: ເມືອງພຽງ, ເມືອງຊຽງຮ່ອນ, ພະແນກສຶກສາທິການ ແລະກີລາແຂວງ ແລະພະແນກການອ້ອມຂ້າງແຂວງ 1 ຊຸດ, ມີຜູ້ເຂົ້າຮຽນທັງໝົດ 199 ຄົນ, ຍິງ 50 ຄົນ, ລະບົບ 45 ວັນໃນໄລຍະ 2019-2020 ແມ່ນຍັງບໍ່ທັນໄດ້ຈັດຕັ້ງເປີດໃຫ້ບັນດາພະແນກການຕ່າງໆ,ໃນປະຈຸບັນພວມສືບຕໍ່ດໍາເນີນການຮຽນ-ການສອນລະບົບຊັ້ນ ກາງ 1 ຊຸດ, ມີນັກສຶກສາ 49 ຄົນ, ຍິງ 9 ຄົນ ທຽບໃສ່ສົກຮຽນປີຜ່ານມາມີຕົວເລກເພີ່ມຂຶ້ນ 2 ຄົນ, ຫຼັກສູດບໍລຸງ 10 ວັນນາຍບ້ານໄດ້ສໍາເລັດໄປແລ້ວມີທັງໝົດ 233 ຄົນ, ຍິງ 31 ຄົນ, ເມືອງພຽງໄດ້ 2 ຊຸດ, ເມືອງຊຽງຮ່ອນ ໄດ້ 1 ຊຸດ,ເມືອງເງິນໄດ້ 1 ຊຸດ ປະຈຸບັນພວມດໍາເນີນຢູ່ເມືອງໄຊຍະບູລີ ແລະກະກຽມເປີດຢູ່ບັນດາເມືອງທີ່ມີຄວາມພ້ອມ, ຈາກນັ້ນບັນດາຜູ້ເຂົ້າຮ່ວມກໍ່ໄດ້ຜັດປ່ຽນກັນປະກອບຄໍາຄິດຄໍາເຫັນແລກປ່ຽນບົດຮຽນເຊິ່ງກັນ ແລະກັນ.

--------

ຂຽນໂດຍ: ມະໄລວັນ

ຮູບພາບ: ໜັງສືພິມເສດຖະກິດ-ສັງຄົມ

แชร์