ລັດໄຟຂຽວໃຫ້ເອກະຊົນເລີ່ມໂຄງການໄຟຟ້າແສງຕາເວັນຢູ່ເມືອງໂຂງ ຈະຜະລິດໄດ້ 760 ເມກາວັດ

   ລັດຖະບານແຫ່ງ ສປປ ລາວ ໄດ້ເປີດໄຟຂຽວໃຫ້ເອກະຊົນບໍລິສັດ ເມືອງໂຂງຄຣີນ ເອເນີຈີ ຈໍາກັດ ເລີ່ມພັດທະນາໂຄງການ (PDA) ໄຟຟ້າພະລັງງານແສງຕາເວັນຢູ່ເມືອງໂຂງ ແຂວງຈໍາປາສັກ ພາຍຫຼັງເຫັນຜົນທາງບວກຈາກການສຶກສາສຳຫຼວດດ້ານເສດຖະກິດ, ເຕັກນິກ ແລະສີ່ງແວດລ້ອມໂດຍໂຄງການນີ້ເຖິງຈະຍັງບໍ່ທັນເປີດ ເຜີຍຕົວເລກການລົງທຶນແຕ່ຄວາມອາດສາມາດຜະລິດໄຟຈະໄດ້ຫຼາຍເຖິງ 760 ເມກາວັດ ເລີ່ມຕົ້ນຈະຕິດຕັ້ງໃນ 135 ເມກາວັດ ກ່ອນ.

   ໃນຕອນແລງຂອງວັນທີ 5 ພະຈິກ ຜ່ານມາທີ່ກະຊວງແຜນການ ແລະການລົງທຶນນະຄອນຫຼວງວຽງຈັນໄດ້ມີການລົງນາມໃນສັນຍາພັດທະນາໂຄງການ (PDA) ໄຟຟ້າພະລັງງານແສງຕາເວັນ ເມືອງໂຂງ ແຂວງຈໍາປາສັກ ລະຫວ່າງລັດຖະບານ ແຫ່ງ ສປປ ລາວ ກັບບໍລິສັດເມືອງໂຂງ ຄຣີນເອເນີຈີ ຈໍາກັດ.

 ຕາງໜ້າໃຫ້ລັດຖະບານລົງນາມແມ່ນ ທ່ານ ນາງ ຄໍາຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະການລົງທຶນ ແລະຕາງໜ້າໃຫ້ທາງບໍລິສັດແມ່ນທ່ານ ພັດທະລະພົງ ຄົງວິຈິດ ຜູ້ອໍານວຍການບໍລິສັດ ເມືອງໂຂງ ຄຣີນ ເອເນີຈີ ຈໍາກັດ ເຊັນເປັນສັກຂີພິຍານໂດຍ ທ່ານ ສີນາວາ ສຸພານຸວົງ ຮອງລັດຖະມົນຕີກະຊວງພະລັງ ງານ ແລະບໍ່ແຮ່ໂດຍເຂົ້າຮ່ວມມີທ່ານ ນາງ ບຸນຄໍາ ວໍລະຈິດ ຮອງລັດຖະມົນຕີກະຊວງຊັບພະຍາກອນທໍາມະຊາດ ແລະສິ່ງແວດລ້ອມພ້ອມດ້ວຍພາກສ່ວນກ່ຽວຂ້ອງ.

ໂຄງການດັ່ງກ່າວໄດ້ສໍາເລັດການສຶກສາສຶກສາເນື້ອທີ່, ຄວາມອາດສາມາດ, ທ່າແຮງດ້ານເສດຖະກິດ ແລະສະພາບຜົນກະທົບຕົວຈິງທີ່ອາດເກີດຂຶ້ນຈາກການພັດທະນາຢ່າງຮອບດ້ານ ແລະໄດ້ຮັບຜົນສະຫຼຸບວ່າໂຄງການດັ່ງກ່າວມີຄວາມເປັນໄປໄດ້ທີ່ສາມາດພັດທະນາໄດ້ຊຶ່ງກໍາລັງຕິດຕັ້ງຮອດ 760 ເມກາວັດ ແບ່ງເປັນ 5 ໄລຍະໂດຍເລີ່ມຕົ້ນພັດທະນາໄລຍະທໍາອິດກໍາລັງຕີດຕັ້ງຈະຢູ່ປະມານ 135 ເມກາວັດ ໃນເນື້ອທີ່ 236 ເຮັກຕາ ໃນບໍລິເວນໃກ້ກັບສະຖານີໄຟຟ້າບ້ານຫາ ຊຶ່ງເປັນຈຸດເຊື່ອມຕໍ່ສໍາຄັນໃນການສົ່ງໄຟຟ້າອອກໄປຈໍາໜ່າຍໃຫ້ປະເທດກໍາປູເຈຍ.

แชร์