ເຜີຍແຜ່ການສໍາຫຼວດສະຖິຕິກະສິກຳ ຢູ່ເມືອງເຟືອງ

  ເມື່ອວັນທີ 2 ພະຈິກ 2020 ຢູ່ທີ່ຫ້ອງການແຜນການ ແລະການລົງທຶນເມືອງເຟືອງແຂວງວຽງຈັນໄດ້ເປີດກອງປະຊຸມໂຄສະນາເຜີຍແຜ່ການສຳຫຼວດສະຖິຕິກະສິກຳທົ່ວປະເທດຄັ້ງທີ III ປີ 2020 ໂດຍການເປັນກຽດເຂົ້າຮ່ວມຂອງ ທ່ານ ທະວີສັກ ວົງສະຫວ່າງ ຮອງເຈົ້າເມືອງໆເຟືອງ, ມີຄະນະຊີ້ນຳການສຳຫຼວດຂັ້ນແຂວງ, ຫົວໜ້າ, ຄະນະຫ້ອງການ, ນາຍບ້ານທີ່ກ່ຽວ ຂ້ອງພາຍໃນເມືອງໄດ້ພ້ອມກັນເຂົ້າຮ່ວມ.

  ທ່ານ ຄຳສາຍ ສຸມຸນທອງຮອງຫົວໜ້າພະແນກກະສິກຳປ່າໄມ້ແຂວງວຽງຈັນ ຄະນະຊີ້ນຳການສຳຫຼວດຂັ້ນແຂວງໄດ້ໃຫ້ກຽດຂຶ້ນໂຄສະນາເຜີຍແຜ່ການສຳ ຫຼວດສະຖິຕິກະສິກຳທົ່ວປະເທດ ຄັ້ງທີ III ປີ 2020, ສະເພາະຢູ່ ເມືອງເຟືອງແມ່ນໄດ້ເລືອກເອົາ 13 ບ້ານເປົ້າໝາຍຄື: ບ້ານນາຂອບ, ບ້ານໂພນທອນ, ບ້ານໂພນໄຊ, ບ້ານນາຫວ້ານ, ບ້ານເມືອງເຟືອງ, ບ້ານແກ້ງຊຽງ, ບ້ານສີສະອາດ, ບ້ານນາໃໝ່, ບ້ານນາແຊງ, ບ້ານ ຫ້ວຍເດຶ່ອ, ບ້ານດອນ, ບ້ານໂພສີ ແລະບ້ານໜອງປໍ, ບ້ານ ລະ 20 ຄອບຄົວ, ລວມມີ 260 ຄອບຄົວ, ການສຳຫຼວດແມ່ນຈະໄດ້ເລີ່ມແຕ່ເດືອນພະຈິກຫາເດືອນທັນວາ ປີ 2020 ນີ້, ຈະມີນັກກວດກາ, ນັກເດີນສຳຫຼວດລົງຕົວຈິງ ຊຶ່ງມາຈາກສູນກາງ, ຂັ້ນແຂວງ ແລະຂັ້ນເມືອງລວມມີ 8 ທ່ານ, ນັກກວດກາ 2 ທ່ານ.

  ເພື່ອເຮັດໃຫ້ການສຳຫຼວດສຳເລັດຕາມລະດັບຄາດໝາຍນັ້ນຮຽກຮ້ອງໃຫ້ບັນດາບ້ານເປົ້າໝາຍນັ້ນຕ້ອງໄດ້ໃຫ້ຄວາມຮ່ວມມືໃນການໂຄສະນາເຜີຍແຜ່, ອົງການປົກຄອງບ້ານຕ້ອງໄດ້ປະກາດອອກໂທລະໂຄ່ງຂອງບ້ານແຈ້ງໃຫ້ບັນດາຄອບຄົວເປົ້າໝາຍຮັບຮູ້ກ່ອນທີ່ນັກເດີນສຳຫຼວດຈະລົງໄປເຖິງເພື່ອເກັບກຳຂໍ້ມູນການຜະລິດກະສິກຳຢູ່ແຕ່ລະບ້ານທີ່ເປັນຄົວເຮືອນ, ຫົວໜ່ວຍທຸລະກິດທີ່ມີການຜະລິດກະສິກຳ, ຢູ່ໃນຊ່ວງເວລາດັ່ງກ່າວນີ້ຕ້ອງໃຫ້ມີໜ້າຢູ່ເຮືອນໃຫ້ຄວາມຮ່ວມມື ແລະຊ່ວຍເຫຼືອນັກເດີນສຳຫຼວດເພື່ອຕອບສະໜອງຂໍ້ມູນທີ່ຄົບຖ້ວນ, ຖືກຕ້ອງ ແລະຊັດເຈນຕາມຄວາມເປັນຈິງເພື່ອເປັນຂໍ້ມູນພື້ນຖານໄປປະເມີນຕໍ່ກັບແຜນພັດທະນາເສດຖະກິດ-ສັງຄົມຄັ້ງທີ VIII ຂອງລັດຖະບານ ແລະວາງແຜນພັດທະນາເສດຖະກິດ-ສັງຄົມ ຄັ້ງທີ IX ໃນຕໍ່ໜ້າ.

----

ຂ່າວ: ສົມຄິດ ຈິດດາວົງ

แชร์