ຊານໄຊ ອະນາໄມຊົນລະປະທານ ກຽມຜະລິດລະດູແລ້ງ

 ໃນວັນທີ 3 ພະຈິກ 2020 ນີ້ອຳນາດການປົກຄອງ ເມືອງຊານໄຊ ແຂວງອັດຕະປື ໄດ້ລະດົມກຳລັງແຮງພະນັກງານ-ລັດຖະກອນ, ທະຫານ, ຕຳຫຼວດຕະ ຫຼອດຮອດພໍ່ແມ່ປະຊາຊົນ 2 ບ້ານ ພາຍໃນເທສະບານເມືອງຄື: ບ້ານວັງໄຊ ແລະບ້ານສົມບູນ ສ້າງຂະບວນການອອກແຮງງານລວມອະນາໄມຄອງຊົນລະ ປະທານນໍ້າປາ ເພື່ອກະກຽມຄວາມພ້ອມໃຫ້ແກ່ການຜະລິດລະດູແລ້ງທີ່ຈະມາເຖິງຢ່າງເປັນຂະບວນຟົດຟື້ນ .

  ທ່ານ ສົມປະສິດ ຍັບຖາວອນຫົວໜ້າຫ້ອງການກະສິກຳ-ປ່າໄມ້ເມືອງຊານໄຊໄດ້ໃຫ້ຮູ້ວ່າ: ການສ້າງຂະບວນການອອກແຮງງານລວມເພື່ອອະນາໄມຄອງຊົນ ລະປະທານນໍ້າປາຄັ້ງນີ້ກໍເພື່ອເປັນການກະກຽມດ້ານຄວາມພ້ອມໃນການສະໜອງນໍ້າໃຫ້ແກ່ການຜະລິດພຶດລະດູແລ້ງຂອງປະຊາຊົນພາຍໃນເມືອງຊານໄຊ, ໂດຍມີແຮງງານເຂົ້າຮ່ວມທັງໝົດ 300 ຄົນ, ທີ່ເປັນພະນັກງານລັດຖະກອນ, ທະຫານ, ຕໍາຫຼວດ ແລະພໍ່ແມ່ປະຊາຊົນຂອງເມືອງຊານໄຊ, ສຳລັບໜ້າວຽກຂອງການອະນາໄມ້ຄັ້ງນີແມ່ນໄດ້ຖາງຫຍ້າ, ເກັບເສດຂີ້ເຫຍື້ອ, ເກັບເສດໄມ້, ຕັກຂີ້ຕົມທີ່ທັບຖົມ ແລະອຸດຕັນທາງລະບາຍນໍ້າອອກຈາກຄອງຊົນລະປະທານ ເພື່ອເຮັດໃຫ້ນໍ້າໄຫຼສະດວກຂຶ້ນ ແລະເພື່ອບໍ່ໃຫ້ນໍ້າບົກແຫ້ງທັງຮັບປະກັນມີນໍ້າຢ່າງພຽງພໍກັບການຜະລິດຂອງພໍ່ແມ່ປະຊາຊົນໂດຍສະເພາະແມ່ນການຜະລິດພືດລະດູແລ້ງທີ່ຈະມາເຖິງ.

  ສໍາລັບຊົນລະປະທານນໍ້າປາ ເປັນຊົນລະປະທານລະບົບຝາຍນໍ້າລົ້ນ, ມີຄວາມຍາວ 3 ກິໂລແມັດ, ໂດຍໄດ້ຜ່ານເທສະບານຂອງເມືອງ ຊານໄຊ, ສາມາດຫົດເນື້ອທີ່ການຜະລິດໄດ້ປະມານ 40 ເຮັກຕາ, ຊຶ່ງລະດູແລ້ງປີນີ້ທາງຫ້ອງການກະສິກໍາ ແລະປ່າໄມ້ ເມືອງຊານໄຊ ຈະສຸມໃສ່ຊຸກຍູ້ປະຊາຊົນໃນເຂດໂຄງການຊົນ ລະປະທານນໍ້າປາຫັນມາຜະລິດເຂົ້ານາແຊງ ແລະ ພຶດຜັກຊະນິດຕ່າງໆໃຫ້ຫຼາຍຂຶ້ນເພື່ອຕອບສະໜອງດ້ານສະບຽງອາຫານໃຫ້ພຽງພໍກັບຄວາມຕ້ອງການຂອງທ້ອງຕະຫຼາດ ແລະຜະລິດໃຫ້ໄດ້ຫຼາຍຂາຍເປັນສິນຄ້າ ເພື່ອແກ້ໄຂຄວາມທຸກຍາກຂອງປະຊາຊົນ.

----

ຂ່າວ: ແຂວງອັດຕະປື

แชร์