ເບຍລາວ ມອບນໍ້າດື່ມຊ່ວຍຜູ້ປະສົບໄພນໍ້າຖ້ວມ

  ຕອນເຊົ້າວັນທີ 4 ພະຈິກ 2020 ນີ້;ທີ່ຫ້ອງວ່າການແຂວງສະຫວັນນະເຂດທາງບໍລິສັດເບຍລາວຈຳກັດນຳໂດຍທ່ານ ໃຈເພັດ ບູລົມ ຜູ້ຈັດການຝ່າຍຂາຍປະຈຳພາກກາງພ້ອມດ້ວຍພະນັກງານບໍລິສັດເບຍລາວ ຈຳກັດ ໄດ້ນຳເອົານໍ້າດື່ມກາຫົວເສືອຂະໜາດ 1,5 ລິດ, ຈຳນວນ 4.000 ແພັກ, ມູນຄ່າ 74 ລ້ານກີບມອບໃຫ້ກັບການນຳແຂວງສະຫວັນນະເຂດເພື່ອນຳໄປແຈກຢາຍຕໍ່ໃຫ້ກັບປະຊາຊົນຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມໃນຈຳນວນ 8 ຕົວເມືອງ ພາຍໃນແຂວງໃຫ້ກຽດຮັບເຄື່ອງຊ່ວຍ ເຫຼືອໃນຄັ້ງນີ້ແມ່ນທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດພ້ອມນີ້ທ່ານຮອງເຈົ້າແຂວງກໍ່ຍັງໄດ້ມອບໃບຍ້ອງຍໍຂອງທ່ານເຈົ້າແຂວງສະຫວັນນະເຂດໃຫ້ກັບບໍລິສັດເບຍລາວຈຳກັດນຳອີກ ແລະທ່ານໄດ້ກ່າວວ່າຈະນຳເອົານໍ້າດື່ມຈຳນວນດັ່ງ ກ່າວໄປມອບຕໍ່ໃຫ້ເຖິງມືປະຊາຊົນທີ່ຖືກຜົນກະທົບຢ່າງທົ່ວເຖິງ ແລະໄວທີ່ສຸດ.

   ໂອກາດນີ້ ທ່ານ ໃຈເພັດ ບູລົມ ຜູ້ຈັດການຝ່າຍຂາຍປະຈຳພາກກາງໃນນາມຕາງໜ້າໃຫ້ບໍລິສັດ ເບຍລາວ ຈຳກັດ ໄດ້ມີຄຳເຫັນວ່າ: ການມອບນໍ້າດື່ມໃນຄັ້ງນີ້ກໍ່ແມ່ນເປັນການແບ່ງປັນນໍ້າໃຈຈາກບໍລິສັດເບຍລາວ ແລະທັງເປັນການຊ່ວຍເຫຼືອບັນເທົາທຸກໃຫ້ກັບປະຊາຊົນຜູ້ປະສົບໄພນໍ້າຖ້ວມທີ່ກຳລັງລຳບາກ, ຄວາມຈຳເປັນທາງດ້ານນໍ້າ ດື່ມ, ແລະໃນຄັ້ງວັນທີ 7 ພະຈິກນີ້ທາງກຸ່ມຄອບຄົວບໍລິສັດເບຍລາວຈາກນະຄອນຫຼວງວຽງຈັນຍັງຈະໄດ້ສືບຕໍ່ນຳເອົາເຄື່ອງອຸປະໂພກ ແລະບໍລິໂພກທີ່ຈຳເປັນລົງມອບໃຫ້ກັບປະຊາຊົນຈຳນວນ 601 ຄອບຄົວ, ໃນ 4 ບ້ານ ຂອງເມືອງສອງຄອນທີ່ໄດ້ຮັບຜົນກະທົບໜັກຈາກໄພນໍ້າຖ້ວມຊຶ່ງປະກອບມີບ້ານນາທັງ, ພະແລງ, ດອນມ່ວງ ແລະບ້ານຊະແຍກເຄື່ອງຈຳນວນດັ່ງກ່າວລວມມູນຄ່າເປັນເງິນທັງໝົດ 30 ລ້ານກວ່າກີບ.  

-------------

ຂ່າວ: ອັກສອນສິນ ພົມມະຈັນ

ຮູບພາບ: ໜັງສືພິມເສດຖະກິດ-ສັງຄົມ

แชร์