ໄຊສົມບູນ ເກັບລາຍຮັບງົບປະມານບັນລຸໄດ້ 199 ຕື້ກວ່າກີບ

 ການຈັດຕັ້ງປະຕິບັດວຽກງານຈັດເກັບລາຍຮັບໃນ 9 ເດືອນຜ່ານມາຂອງແຂວງໄຊສົມບູນຍັງພົບຄວາມຫຍຸ້ງຍາກບາງຂະແໜງການຍັງບໍ່ທັນເປັນເຈົ້າການໃນການປະຕິບັດຕາມດໍາ ລັດ 414/ລບ ອີກສ່ວນໜຶ່ງແມ່ນຍ້ອນການລະບາດຂອງພະຍາດໂຄວິດ-19ເຮັດໃຫ້ລາຍຮັບການເງິນ-ງົບປະມານບໍ່ໄດ້ຕາມຄາດໝາຍໂດຍມາຮອດເດືອນຕຸລາ 2020 ທົ່ວແຂວງສາມາດເກັບລາຍຮັບເຂົ້າງົບປະມານໄດ້ 199 ຕື້ກວ່າກີບ ສ່ວນ 3 ເດືອນທີ່ເຫຼືອຈະສືບຕໍ່ຈັດເກັບໃຫ້ບັນລຸໄດ້ຕາມແຜນການປີ.

  ທ່ານ ສຸກສະຫວາດ ວົງພູມເຫຼັກ ຫົວໜ້າພະແນກການເງິນແຂວງໄຊສົມບູນໄດ້ເປີດເຜີຍຫວ່າງບໍ່ດົນມານີ້ໃຫ້ຮູ້ວ່າ: ໂດຍນໍາເອົາເນື້ອໃນຈິດໃຈນະໂຍບາຍດໍາລັດຂອງຂັ້ນເທິງມາຈັດຕັ້ງ, ຄົ້ນຄວ້າ, ວິເຄາະວິໄຈ ແລະຜັນຂະຫຍາຍລົງສູ່ຂະບວນການຈັດຕັ້ງປະຕິບັດຕົວຈິງໂດຍສະເພາະແມ່ນດໍາລັດ 414/ລບ ປະກອບມີຄະນະຊີ້ນໍາລວມ ແລະຄະນະຮັບຜິດຊອບນໍາພາຈັດຕັ້ງປະຕິບັດຕົວຈິງຢູ່ 5 ເມືອງຂອງແຂວງໄຊສົມບູນຄື: ເມືອງອະນຸວົງ, ເມືອງທ່າໂທມ, ເມືອງລ້ອງຊານ, ເມືອງຮົ່ມ ແລະເມືອງລ້ອງແຈ້ງຕາມທິດສູນກາງລົງຊ່ວຍແຂວງ, ແຂວງລົງຊ່ວຍເມືອງ ແລະເມືອງລົງຊ່ວຍບ້ານ.

  ຈາກນັ້ນກໍ່ໄດ້ເຄື່ອນໄຫວນໍາພາຈັດຕັ້ງປະຕິບັດວຽກງານການເງິນຕົວຈິງຮ່ວມກັບຄະນະປົກຄອງ 5 ເມືອງ ແລະບັນດາຫົວໜ້າຂະແໜງການຕ່າງໆຂອງເມືອງເພື່ອຮ່ວມກັນຄົ້ນຄວ້າປຶກສາຫາລືຄວາມເຂົ້າໃຈຢ່າງເລິກເຊິ່ງກ່ຽວກັບດໍາລັດ 414/ລບໃນການແບ່ງຂັ້ນຄຸ້ມຄອງດ້ານງົບປະມານຄື: ລາຍຮັບທີ່ສູນກາງຄຸ້ມຄອງຕັ້ງຢູ່ແຂວງແມ່ນມອບໃຫ້ເປັນລາຍຮັບຂອງແຂວງຍົກເວັ້ນບັນດາລາຍຮັບທີ່ເປັນຍຸດທະສາດຂອງລັດຖະບານບັນດາລາຍຮັບທີ່ແຂວງຄຸ້ມຄອງແມ່ນເປັນລາຍຮັບຂອງແຂວງ 100%, ບັນດາລາຍຮັບຂອງແຂວງທີ່ຕັ້ງຢູ່ເມືອງແມ່ນມອບໃຫ້ເມືອງບໍ່ຫຼຸດ 60%, ບັນດາລາຍຮັບຂອງເມືອງຕັ້ງຢູ່ບ້ານແມ່ນມອບໃຫ້ບ້ານບໍ່ຫຼຸດ 70%, ສໍາລັບການຈັດສັນແບ່ງປະເພດລາຍຮັບຕົວຈິງໃຫ້ເມືອງ ແລະບ້ານ.

  ຜ່ານການລົງຊຸກຍູ້ຕິດຕາມການຈັດຕັ້ງປະຕິບັດ 9 ເດືອນຜ່ານມາ ເຫັນວ່າຍັງພົບຄວາມຫຍຸ້ງຍາກບາງຂະແໜງການຍັງບໍ່ທັນເປັນເຈົ້າການໃນການປະຕິບັດຕາມດໍາລັດ 414/ລບ ແລະ ສ່ວນໜຶ່ງແມ່ນຍ້ອນການລະບາດຂອງພະຍາດໂຄວິດ-19 ເຮັດໃຫ້ມີຄວາມຫຍຸ້ງຍາກທາງດ້ານລາຍຮັບການເງິນ-ງົບປະມານ ບໍ່ໄດ້ຕາມຄາດ ໝາຍ, ມາດຮອດເດືອນຕຸລາສາມາດເກັບລາຍຮັບເຂົ້າງົບປະມານໄດ້ 199 ຕື້ກວ່າກີບ, ແຕ່ເຖິງຢ່າງໃດກໍ່ຕາມແຜນການປະຕິບັດລາຍຮັບ-ງົບປະມານ 3 ເດືອນທ້າຍປີ 2020 ຂະແໜງການເງິນຈະສືບຕໍ່ສູ້ຊົນເກັບລາຍຮັບເຂົ້າງົບປະມານໃຫ້ບັນລຸຕາມແຜນການປີ.

แชร์