ລາວຜະລິດໄຟຟ້າສົ່ງອອກແລ້ວ 6 ພັນກວ່າເມກາວັດ ໄທກວມກວ່າ 90%

   ສປປ ລາວ ໄດ້ວາງແນວທາງຫັນເປັນອຸດສາຫະກຳ ແລະທັນສະໄໝເພື່ອພັດທະນາປະເທດຊາດກ້າວຂຶ້ນສູ່ຈຸດໝາຍສັງຄົມນິຍົມໂດຍກຳນົດເອົາການພັດທະນາອຸດສາ ຫະກຳພະລັງງານໄຟຟ້າເປັນພື້ນຖານໃຫ້ແກ່ການພັດທະນາເສດຖະກິດແຫ່ງຊາດໂດຍສຸມໃສ່ຂຸດຄົ້ນທ່າແຮງບົ່ມຊ້ອນຂອງແຫຼ່ງນໍ້າທຳມະຊາດເພື່ອຜະລິດສະໜອງການບໍລິການກະແສໄຟຟ້າໃຫ້ພຽງພໍກັບຄວາມຕ້ອງການຊົມໃຊ້ຢູ່ພາຍໃນ ແລະມີສ່ວນເພື່ອສົ່ງອອກຮັບປະກັນການຜະລິດພະລັງງານໄຟຟ້າທີ່ເປັນມິດກັບສິ່ງແວດລ້ອມ, ຜະລິດພະລັງງານສະອາດໂດຍປະຈຸບັນໄດ້ສົ່ງອອກໄປຕ່າງປະເທດແລ້ວ 6 ພັນກວ່າເມກາວັດ ໃນນັ້ນກວ່າ 90% ແມ່ນສົ່ງອອກໄປໄທໂດຍທົ່ວປະເທດມີເຂື່ອນທີ່ຜະລິດແລ້ວເກືອບ 80 ແຫ່ງ.

  ອີງຕາມຂໍ້ມູນຈາກກະຊວງພະລັງງານ ແລະບໍ່ແຮ່ໃຫ້ຮູ້ວ່າ: ໃນປີຜ່ານມາການພັດທະນາວຽກງານພະລັງງານຢູ່ ສປປ ລາວ ໄດ້ມີບາດກ້າວຂະຫຍາຍຕົວດ້ວຍຈັງຫວະທີ່ໄວໂດຍສະເພາະແມ່ນ ການພັດທະນາແຫຼ່ງຜະລິດໄຟຟ້າມາ ຮອດປະຈຸບັນທົ່ວປະເທດມີແຫຼ່ງຜະລິດໄຟຟ້າແລ້ວ 78 ແຫ່ງ, ມີກຳລັງຕິດຕັ້ງທັງໝົດ 9.972 ເມັກກາວັດ,ສາມາດຜະລິດພະລັງງານໄຟຟ້າໄດ້ເຖິງ 52.211 ລ້ານກິໂລວັດໂມງ ຕໍ່ປີພ້ອມນີ້ໃນແຫຼ່ງຜະລິດໄຟຟ້າ 78 ແຫ່ງຍັງມີໂຄງການຖານຫີນ 1,ໂຄງການພະລັງ ງານໄຟຟ້າຊີວະມວນ 4 ແຫ່ງ ແລະໂຄງການໄຟຟ້າແສງຕາເວັນລວມ 6 ແຫ່ງ.

   ນອກນັ້ນຍັງມີການພັດທະນາລະບົບສາຍສົ່ງແຮງສູງ, ແຮງກາງ ແລະແຮງຕໍ່າຍາວທັງໝົດ 65.563 ກວ່າກິໂລແມັດ, ມີສະຖານີຈ່າຍໄຟຟ້າ 74 ແຫ່ງ ສຳລັບການສົ່ງອອກໄປຈຳໜ່າຍຕ່າງປະເທດສາມາດບັນລຸໄດ້ແລ້ວ 6.620 ເມັກກາວັດ ໃນນີ້ສົ່ງອອກໄທ 5.620 ເມັກກາວັດ, ຫວຽດນາມ 570 ເມັກກາວັດ, ກຳປູເຈຍ 320 ເມັກກາວັດ, ມຽນມ້າ 10 ເມັກກາວັດ, ການເຊື່ອມໂຍງ ແລະການຈຳໜ່າຍໄປຍັງຕະຫຼາດອາຊຽນພ້ອມນັ້ນລາວເປັນປະເທດທຳອິດທີ່ໄດ້ລິເລີ່ມສົ່ງຂາຍໄຟຟ້າແບບເຊື່ອມໂຍງໃນກຸ່ມປະເທດອາຊຽນປະຈຸບັນໄດ້ສົ່ງອອກແລ້ວ 100 ເມັກກາວັດ ໂດຍຜ່ານປະເທດລາວ, ໄທ, ມາເລເຊຍ ປີ 2021 ຈະສົ່ງໃຫ້ໄດ້ 300 ເມັກກາວັດໂດຍສືບຕໍ່ເຈລະຈາຊື້-ຂາຍ ແລະເຊື່ອມໂຍງໄປຮອດປະເທດສິງກະໂປ.

  ແນວໃດກໍດີການຊົມໃຊ້ຢູ່ໃນສັງຄົມແມ່ນພວກເຮົາໄດ້ສະໜອງກະແສໄຟຟ້າຢ່າງພຽງພໍຢູ່ໃນພາກທີ່ຢູ່ອາໄສ, ອຸດສາຫະກຳ, ກະສິກຳ, ຊົນລະປະທານ, ການລ້ຽງສັດ, ຫັດຖະກຳ, ການບໍລິການ, ການທ່ອງທ່ຽວ, ຄົມມະນາຄົມ, ຂົນສົ່ງ ແລະ ຂະແໜງອື່ນໆ ຜົນສຳເລັດທີ່ສຳຄັນອີກ ອັນໜຶ່ງພວກເຮົາໄດ້ເອົາໃຈໃສ່ວຽກງານພັດທະນາໄຟຟ້າໄປສູ່ຊົນນະບົດມາຮອດປະຈຸບັນໄດ້ສະໜອງໄຟຟ້າຮັບໄດ້ 100% ຢູ່ທຸກເທສະບານແຂວງ, ນະຄອນຫຼວງ, ເທສະບານເມືອງ, 93% ຂອງຈຳນວນບ້ານ ແລະ 95% ຂອງຈຳນວນຄອບຄົວໃນທົ່ວປະເທດ.

   ຜົນສຳເລັດທັງໝົດນັ້ນແມ່ນຍ້ອນການຊີ້ນຳ-ນຳພາຂອງພັກ ແລະລັດຖະບານເຮັດໃຫ້ການຈັດຕັ້ງປະຕິບັດວຽກງານກ້າວເດີນໜ້າຢ່າງຕໍ່ເນື່ອງຂະນະທີ່ການຜະລິດກະແສໄຟຟ້າໃນປີ 2020 ນີ້ ຕາມການເປີດເຜີຍຂອງລັດຖະບານໃນກອງປະຊຸມສະພາທີ່ກຳລັງດຳເນີນໃນເວລານີ້ເຫັນວ່າ: ປະຕິບັດໄດ້ 29.787 ລ້ານກິໂລວັດໂມງ, ມູນຄ່າ 15.395 ຕື້ກີບ ເທົ່າກັບ 71,85% ຂອງແຜນດັດແກ້, ທຽບໃສ່ໄລຍະດຽວກັນນຂອງປີຜ່ານມາເພີ່ມຂຶ້ນ 34% ຄາດຄະເນໝົດປີຈະສາມາດຜະລິດໄດ້ 40.621 ລ້ານກິໂລວັດໂມງ, ມີມູນຄ່າ ປະມານ 20.6964 ຕື້ກີບ.

แชร์