ໃຕ້ການນຳພາຂອງພັກ-ລັດ ເຮັດໃຫ້ທຸລະກິດເຕີມໃຫຍ່ເຂັ້ມແຂງ

  ພັກ ແລະລັດຖະບານແຫ່ງ ສປປ ລາວ ຍາມໃດກໍໄດ້ໃຫ້ຄວາມສຳຄັນ ແລະໄດ້ຖືເອົາການພັດທະນາເສດຖະກິດເປັນໃຈກາງ, ສ້າງເງື່ອນໄຂອຳນວຍຄວາມສະດວກໃຫ້ແກ່ກຳລັງການຜະລິດຂະຫຍາຍຕົວຢ່າງແຂງແຮງ, ສ້າງເສດຖະກິດຕະຫຼາດຕາມທິດສັງຄົມນິຍົມ,ສິ່ງດັ່ງກ່າວໄດ້ກາຍເປັນແຮງຊຸກຍູ້ໃຫ້ຫົວໜ່ວຍທຸລະກິດໃນຂະແໜງການຕ່າງໆມີການເຕີບໃຫຍ່ຂະຫຍາຍຕົວຕະຫຼອດມາ.

  ທ່ານ ສະເໜີ ຈຸນລະມະນີ ຮອງປະທານກຸ່ມບໍລິສັດນິວຈິບເຊັງຈຳກັດໃຫ້ສຳພາດວ່າ: ຊື່ງພາຍໃນກຸ່ມປະກອບມີຫຼາຍບໍລິສັດເປັນຕົ້ນບໍລິສັດລາວໄທຮົວຢາງພາລາຈຳກັດທີ່ແຂວງວຽງຈັນ, ບໍລິຄຳໄຊ, ຄຳມ່ວນ ແລະສະຫວັນນະເຂດ, ສູນການ ແພດສາກົນສຳພັນທີ່ນະຄອນຫຼວງວຽງຈັນ, ໂຮງແຮມໂຊຟີທຽວ (SOFI TEL) ແລະ ໂຮງ ແຮມນາກາ (NAGA) ທີ່ແຂວງຫຼວງພະບາງແລະສວນສັດລາວບ້ານເກີນທີ່ແຂວງວຽງຈັນ ແລະ ພິເສດເປັນຕົວແທນຈຳໜ່າຍລົດຈັກ, ລົດໃຫຍ່ 4 ລໍ້ ແລະ ເຄື່ອງຈັກອະເນກປະສົງຍີ່ຫໍ້ຮອນດ້າ (HONDA) ທີ່ມີຫຼາຍກວ່າ 50 ສາຂາຈຳໜ່າຍຢູ່ທົ່ວປະເທດລາວ, ມີໂຮງງານຜະລິດຊີ້ນສ່ວນລົດຈັກ ແລະໂຮງງານປະກອບລົດຈັກຮອນດ້າ Wave 100 ທີ່ມີກໍາລັງປະກອບປະມານ 300 ຄັນຕໍ່ວັນ, ລວມພະນັກງານທັງໝົດຂອງກຸ່ມບໍລິສັດມີຈໍານວນຫຼາຍກວ່າ 1.100 ຄົນ.

   ກຸ່ມບໍລິສັດນິວຈິບເຊັງຈຳກັດໄດ້ເລີ່ມດຳເນີນທຸລະກິດທີ່ ສປປ ລາວ ແຕ່ທ້າຍປີ 1991 ເປັນຕົ້ນມາ, ເປັນກຸ່ມບໍລິສັດໜຶ່ງທີ່ມີຄວາມຕັ້ງໜ້າປະຕິບັດລະບຽບກົດໝາຍ, ດ້ານຫຼັກການຕ່າງໆທີ່ພັກ-ລັດ ປະກາດໃຊ້ໃນແຕ່ລະໄລຍະຕະຫຼອດມາ, ອັນເປັນເຫດຜົນທີ່ສໍາຄັນທີ່ພັກດັນໃຫ້ກິດຈະການຂອງກຸ່ມບໍລິສັດໄດ້ຮັບການຈະເລີນເຕີບໂຕ ແລະມີຜົນງານທີ່ໄດ້ມີການຍອມຮັບຈາກສັງຄົມຢ່າງກ້ວາງຂວາງຈົນເຖິງປະຈຸບັນ.  

  ທ່ານ ສະເໜີ ຈຸນລະມະນີ ກ່າວວ່າ: ຕະຫຼອດໄລຍະ 45 ປີ ແຫ່ງການສະຖາປະນາ ສປປ ລາວ, ພັກແລະລັດຖະບານໄດ້ເອົາໃຈໃສ່ຊຸກຍູ້ສົ່ງເສີມການພັດທະນາທຸລະ ກິດຂະໜາດນ້ອຍ ແລະກາງໃຫ້ກາຍເປັນຂະແໜງການໜຶ່ງທີ່ມີສ່ວນຮ່ວມໃນການຂັບເຄື່ອນເສດຖະກິດຂອງລາວໃຫ້ເດີນໜ້າດ້ວຍບາດກ້າວທີ່ໝັ້ນຄົງ, ໃຫ້ເທົ່າທຽມກັບບັນດາປະເທດໃກ້ຄຽງບໍ່ວ່າດ້ານການຍົກລະດັບສີມືແຮງງານ, ຍົກປະສິດທິພາບ ແລະປະສິດທິຜົນການຜະລິດ, ການນຳໃຊ້ເຕັກນິກເຕັກໂນໂລຊີທັນສະໄຫມເຂົ້າໃນການຜະລິດເພື່ອຍົກສຸງສະມັດຕະພາບແຮງງານຂອງບໍລິສັດນັບມື້ນັບສຸງຂຶ້ນໂດຍໄດ້ຮັບການສະໜັບສະໜູນ ແລະຮ່ວມມືຈາກບັນດາກະຊວງກ່ຽວຂ້ອງຂອງລັດຖະບານຕະຫຼອດມາ.  

  ທ່ານ ສະເໜີ ຈຸນລະມະນີ ກ່າວອີກວ່າ: ເນື່ອງໃນໂອກາດກ້າວເຂົ້າສູ່ການຫ້າງຫາກະກຽມຈັດກອງປະຊຸມໃຫຍ່ຄັ້ງທີ XI ຂອງສູນກາງພັກ ແລະເນື່ອງໃນໂອກາດສະ ເຫຼີມສະຫຼອງວັນສະຖາປະນາ ສປປ ລາວ ຄົບຮອບ 45 ປີ ທີ່ຈະມາເຖິງນີ້ຂ້າພະເຈົ້າຂໍອວຍພອນໄຊອັນປະເສີດໃຫ້ແກ່ບັນດາທ່ານຜູ້ນຳພັກ-ລັດຈົ່ງມີສຸຂະພາບເຂັ້ມແຂງເປັນຮົ່ມໂພຮົ່ມໄຊໃຫ້ລູກຫຼານເພື່ອສືບຕໍ່ນຳພາປະເທດຊາດໃຫ້ຫຼຸດພົ້ນຈາກຄວາມທຸກຍາກ, ໃຫ້ຮັ່ງມີເຂັ້ມແຂງ ແລະນຳພາປະເທດຊາດຈະເລີນຮຸ່ງເຮືອງສີວິໄລຂຶ້ນເລື້ອຍໆໃນອະນາຄົດຕໍ່ໜ້າ.

แชร์