ເຊີນທ່ຽວງານວາງສະແດງທ່ອງແບບຍືນຍົງອາຊຽນ

 

  ວັນທີ 4 ພະຈິກ 2020 ທີ່ນະຄອນຫຼວງວຽງຈັນ ໄດ້ມີພິທີຖະແຫຼງຂ່າວງານວາງສະແດງແນວທາງການພັດທະນາການທ່ອງທ່ຽວແບບຍືນຍົງອາຊຽນ 2020, ໂດຍໃຫ້ກຽດຖະແຫຼ່ງຂອງທ່ານ ນາງ ພອນມະລີ ອິນທະພົມ ຮອງຫົວໜ້າກົມພັດທະນາການທ່ອງທ່ຽວກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາຜູ້ຕາງໜ້າຈາກອົງການສາກົນຕ່າງໆ ປະຈຳລາວ ແລະສື່ມວນຊົນທັງພາຍໃນ ແລະຕ່າງປະເທດເຂົ້າຮ່ວມ.

  ທ່ານ ນາງ ພອນມະລີ ອິນທະພົມ ກ່າວວ່າ: ງານວາງສະແດງນີ້, ຈັດຂຶ້ນເພື່ອນຳສະເໜີຜະລິດຕະພັນທີ່ເປັນມິດກັບສິ່ງແວດລ້ອມໃຫ້ບັນດາທຸລະກິດການທ່ອງທ່ຽວ, ປະກອບສ່ວນປະຕິບັດເປົ້າໝາຍການພັດທະນາແບບຍືນຍົງຂອງ ສປປ ລາວ, ທັງເປັນການໂຄສະນາອາຊຽນເປັນຈຸດໝາຍປາຍທາງການທ່ອງທ່ຽວທີ່ຍືນຍົງ, ພ້ອມທັງເປັນເວທີພົບປະແລກປ່ຽນທຸລະກິດ ແລະທຸລະກິດຢູ່ບັນດາປະເທດສະມາຊິກອາຊຽນ ແລະ ບັນດາຜູ້ຊ່ຽວຊານຈາກພາກພື້ນໄດ້ແລກປ່ຽນຄວາມຮູ້ ແລະ ປະສົບການໃນການດໍາເນີນທຸລະກິດໃຫ້ມີຄວາມຍືນຍົງ ແລະສ້າງເສດຖະກິດລາວສູ່ເສດຖະກິດອາຊຽນ.

   ງານວາງສະແດງດັ່ງກ່າວ, ຈະຈັດຂຶ້ນແຕ່ວັນທີ 5-7 ພະຈິກ 2020 ຢູ່ໂຮງ ແຮມຄລາວພາຊານະຄອນຫຼວງວຽງຈັນ ແລະຖືເປັນຄັ້ງທີ 2 ທີ່ ສປປ ລາວ ໄດ້ເປັນເຈົ້າພາບໂດຍຄັ້ງທຳອິດຈັດຂຶ້ນໃນປີ 2018 ຢູ່ແຂວງຫຼວງພະບາງ, ກິດຈະກຳພາຍໃນງານປະກອບມີ: ວັນທີ 5-6 ພະຈິກ ແມ່ນງານວາງສະແດງ ແລະ ສຳມະນາທາງໄກຜ່ານລະບົບອອນລາຍ, ສ່ວນວັນທີ 7 ພະຈິກແມ່ນມີການແຂ່ງຂັນປຸງແຕ່ງອາຫານລາວ.

   ຕະຫຼອດການຈັດງານແມ່ນຈະມີເວທີສົນທະນາ ແລະສຳມະນາທາງໄກຫຼາຍຫົວຂໍ້ສຳຄັນຄື: ທິດທາງການພັດທະນາການທ່ອງທ່ຽວຂອງອາຊຽນ, ການຕິດຕໍ່ສື່ສານການທ່ອງທ່ຽວໃນໄລຍະວິກິດການຢູ່ຈຸດໝາຍປາຍທາງການທ່ອງທ່ຽວ, ການນຳໃຊ້ເຕັກໂນໂລຊີເພື່ອປັບປຸງທຸລະກິດທ່ອງທ່ຽວ ແລະການຕ້ອນຮັບ,ການສະໜັບສະໜູນການທ່ອງທ່ຽວທີ່ປະຊາຊົນທ້ອງຖິ່ນມີສ່ວນຮ່ວມ, ການຫຼຸດຜ່ອນການນຳໃຊ້ວັດສະດຸພາລາສະຕິກ ແລະການຮັກສາຄວາມປອດໄພຂອງນັກທ່ອງທ່ຽວ, ການປະຢັດຕົ້ນທຶນການບໍລິຫານຂອງທຸລະກິດການທ່ອງທ່ຽວໂດຍການປະຢັດພະລັງງານໄຟຟ້າ, ການຟື້ນຟູການທ່ອງທ່ຽວຄືນໃໝ່, ເສດຖະກິດໝູນວຽນໃນຂະແໜງການທ່ອງທ່ຽວ ແລະລະບົບບຳບັດນໍ້າເປື້ອນສຳລັບທຸລະກິດສະຖານທີ່ພັກແຮມ.

   ສຳລັບງານວາງສະແດງນີ້, ຈະມີຜູ້ປະກອບການທ່ອງທ່ຽວປະເພດຕ່າງໆຫຼາຍຫົວໜ່ວຍຈາກ ສປປ ລາວ, ຫວຽດນາມ, ອິນໂດເນເຊຍ, ມາເລເຊຍ, ອົດສະຕຣາລີ, ຝຣັ່ງ, ສິງກະໂປ, ສະເປນ ແລະໄທເຂົ້າຮ່ວມວາງສະແດງ, ໃນນີ້ຜູ້ມາວາງສະແດງແມ່ບໍ່ໄດ້ເສຍຄ່າເຊົ່າຫ້ອງ ແລະຜູ້ເຂົ້າຊົມກໍບໍ່ໄດ້ເສຍຄ່າປີ້ເຂົ້າຊົມ.

แชร์