ສຳເລັດກອງປະຊຸມ ຄຄຊ ຄັ້ງທີ III

  ກອງປະຊຸມຄະນະກໍາມະການຄຸ້ມຄອງຫຼັກຊັບ (ຄຄຊ) ຄັ້ງທີ III ປະຈໍາປີ 2020 ໄດ້ສຳເລັດລົງໃນວັນທີ 4 ພະຈິກ 2020 ທີ່ສຳນັກງານ ຄຄຊ ພາຍໃຕ້ການເປັນປະທານຂອງ ທ່ານ ສົມດີ ດວງດີ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ປະທານ ຄຄຊ; ພ້ອມນີ້, ກໍ່ມີທ່ານ ສອນໄຊ ສິດພະໄຊ ຜູ້ວ່າການທະນາ ຄານ ແຫ່ງ ສປປ ລາວ, ມີຮອງປະທານຄຄຊ-ຜູ້ປະຈຳການ ແລະມີບັນດາຄະນະກໍາມະການຄຸ້ມຄອງຫຼັກຊັບ ແລະພາກສ່ວນກ່ຽວຂ້ອງ.

  ກອງປະຊຸມຄັ້ງນີ້ເປີດຂຶ້ນໃນທ່າມກາງທີ່ກຳລັງດຳເນີນກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດຊຸດທີVIII, ພ້ອມນີ້, ຂະແໜງການເງິນພວມສຸມໃສ່ທົບທວນຄືນແຜນຍຸດທະສາດການພັດທະນາລະບົບສະຖາບັນການເງິນ-ເງິນຕາຂອງ ສປປ ລາວ ໃນໄລຍະປີ 2016-2025 ແລະວິໄສທັດຮອດປີ 2030 ໂດຍສະ ເພາະແຜນຍຸດທະສາດໃນການພັດທະນາຕະຫຼາດທຶນ (2016-2025) ທີ່ປະຊຸມຍັງໄດ້ຊົມເຊີຍຜົນສຳເລັດກອງປະຊຸມໃຫຍ່ຜູ້ແທນອົງຄະນະພັກທະນາຄານແຫ່ງ ສປປ ລາວ ຄັ້ງທີ  IV ແລະ ພິທີສະຫຼຸບຜົນງານ 10 ປີ ຕະຫຼາດທຶນລາວ (2010- 2020), ໃນຂະນະດຽວກັນ, ກໍ່ຢູ່ໃນໄລ ຍະທີ່ມີຄວາມຫຍຸ້ງຍາກທາງດ້ານເສດ ຖະກິດ-ການເງິນ, ການແຜ່ລະບາດຂອງເຊື້ອພະຍາດ ແລະໄພທຳມະຊາດຊຶ່ງໄດ້ສົ່ງຜົນກະທົບບໍ່ໜ້ອຍຕໍ່ການພັດທະນາເສດຖະກິດ-ສັງຄົມ ກໍ່ຄືວຽກງານຕະຫຼາດທຶນຂອງປະເທດເຮົາ.

  ກອງປະຊຸມຄັ້ງທີ III ປະຈໍາປີ 2020 ຍັງໄດ້ມີການປຶກສາຫາລືບາງໜ້າວຽກທີ່ສຳຄັນໃນນີ້ໄດ້ມີການລາຍງານຜົນການຈັດຕັ້ງປະຕິບັດມະຕິກອງປະຊຸມ ຄຄຊ ຄັ້ງທີ II ທີ່ມີຜົນສໍາເລັດຫຼາຍດ້ານໂດຍສະເພາະໄດ້ສຳເລັດການເຜີຍແຜ່ກົດໝາຍວ່າດ້ວຍຫຼັກຊັບ (ສະບັບປັບປຸງ) ແລະສ້າງຄວາມເຂົ້າໃຈພື້ນຖານກ່ຽວກັບການລົງທຶນໃນຮຸ້ນຢູ່ 4 ແຂວງພາກໃຕ້ ແລະ ສໍາເລັດການຄົ້ນຄວ້າອະນຸຍາດໃນການອອກຈຳໜ່າຍຮຸ້ນກູ້ຢູ່ປະເທດໄທຂອງບໍລິສັດໄຟຟ້ານໍ້າງື່ມ 2 ຈຳກັດ, ແຕ່ເຖິງຢ່າງໃດກໍ່ຕາມ, ກໍ່ຕ້ອງໄດ້ສືບຕໍ່ເອົາໃຈໃສ່ຫຼາຍບັນຫາເພື່ອພັດທະນາຕະຫຼາດທຶນລາວໃຫ້ມີປະສິດທິພາບ, ມີຄວາມໜ້າເຊື່ອຖືແລະມີຄວາມຄຶກຄື້ນກວ່າເກົ່າ, ພ້ອມນີ້, ກໍ່ມີລາຍງານການປັບປຸງເຄື່ອງໝາຍ (Logo) ຂອງ ຄຄຊ; ນຳສະເໜີນິຕິກຳຈຳນວນ 2 ສະບັບແລະລາຍງານສະພາບການເຄື່ອນໄຫວຂອງຕະຫຼາດຫຼັກຊັບໃນ 9 ເດືອນໃນປີ 2020, ແຜນ ການ 3 ເດືອນທ້າຍປີ2020.

   ກອງປະຊຸມຄັ້ງນີ້ໄດ້ດໍາເນີນໄປຢ່າງມີຜົນສຳເລັດອັນຈົບງາມໂດຍບັນດາຜູ້ທີ່ເຂົ້າຮ່ວມໄດ້ເຊີດຊູຄວາມຮັບຜິດຊອບສູງ ແລະສຸມທຸກສະຕິປັນຍາເຂົ້າໃນການຄົ້ນຄວ້າ, ປະກອບຄໍາເຫັນຕໍ່ແຕ່ລະເນື້ອໃນຢ່າງລະອຽດ, ພາວະວິໄສ, ກົງໄປກົງມາ ແລະໃຫ້ແທດເໝາະກັບສະພາບຄວາມເປັນຈິງເພື່ອໃຫ້ສາມາດນໍາໄປຈັດຕັ້ງປະຕິບັດໄດ້ຢ່າງແທດເໝາະ ແລະມີປະສິດທິພາບສູງບົນພື້ນຖານເພື່ອຜົນປະໂຫຍດລວມຂອງຊາດ.

ທ່ານ ສົມດີ ດວງດີ, ຮອງນາຍົກລັດ ຖະມົນຕີ, ປະທານ ຄຄຊ ໄດ້ຕີລາຄາສູງຕໍ່ຜົນການຈັດຕັ້ງປະຕິບັດວຽກງານໃນຄັ້ງຜ່ານມາ, ເພື່ອສືບຕໍ່ຈັດຕັ້ງປະຕິບັດວຽກງານຄຸ້ມຄອງຫຼັກຊັບໃຫ້ໜັກແໜ້ນເຂັ້ມແຂງກວ່າເກົ່າ, ໃນຕໍ່ໜ້າຈົ່ງຮີບຮ້ອນປະສານສົມທົບກັບຂະແໜງການກ່ຽວຂ້ອງຕ່າງໆເພື່ອຜັນຂະຫຍາຍເນື້ອໃນຈິດໃຈກອງປະຊຸມຄັ້ງນີ້ເປັນໜ້າວຽກລະອຽດ ແລະ ຈັດຕັ້ງເຊື່ອມຊຶມໃຫ້ເປັນເອກະພາບກັນ, ພ້ອມທັງຈັດຕັ້ງປະຕິບັດຕາມເນື້ອໃນຈິດໃຈທີ່ກອງປະຊຸມຄັ້ງນີ້ໄດ້ຮັບຮອງເອົາໃຫ້ເປັນຮູບປະທໍາ, ດ້ວຍຄວາມເປັນເຈົ້າການ ແລະດ້ວຍຄວາມຮັບຜິດຊອບສູງ, ໃນການຈັດຕັ້ງປະຕິບັດກໍ່ໃຫ້ມີການຕິດຕາມກວດກາ ແລະສະຫຼຸບຖອດຖອນບົດຮຽນແຕ່ລະໄລຍະຢ່າງເໝາະສົມເພື່ອໃຫ້ການຈັດຕັ້ງປະຕິບັດມີປະສິດທິຜົນສູງ,ຈາກນັ້ນໃຫ້ສະຫຼຸບຕີລາຄາການຈັດຕັ້ງປະຕິບັດດັ່ງກ່າວເພື່ອລາຍງານຕໍ່ກອງປະຊຸມຄະນະກໍາມະການຄຸ້ມຄອງຫຼັກຊັບຄັ້ງຕໍ່ໄປ.

-------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์