ງານບຸນນະມັດສະການພະທາດຈອມສິງ

 ພຸດທະສາສະນິກກະຊົນ, ອອກຕົນຍາດໂຍມ, ພະພິກຂຸສໍາມະເນນພາຍໃນວັດຣາດສະຖານຫຼວງສີບຸນເຮືອງ, ເມືອງເມິງ ແຂວງບໍ່ແກ້ວໄດ້ພ້ອມກັນຈັດງານບຸນປະເພນີໄຫ້ວພະທາດຈອມສູງຂຶ້ນທີ່ວັດດັ່ງກ່າວຢ່າງຄຶກຄື້ນມ່ວນຊື່ນ.

 ງານບຸນໄຫ້ວພະທາດຈອມສິງປະຈຳປີນີ້ແມ່ນໄດ້ຈັດຂຶ້ນເປັນເວລາສອງມື້ສອງຄືນເລີ່ມແຕ່ວັນທີ 30 ຫາ 31 ຕຸລາ 2020 ຊຶ່ງກົງກັບມື້ຂຶ້ນ 14-15 ຄໍ່າຂອງເດືອນ 12 ລາວ ຫຼື ໃນເດືອນຈຽງເພັງຂອງເຜົ່າລື້ ຂອງທຸກໆປີ, ໃນມື້ອອກໃໝ່ 14 ຄໍ່າ ແມ່ນເປັນມື້ຫ້າງຫາກະກຽມ, ມື້ອອກໃໝ່ 15 ຄໍ່າເດືອນ 12 ໃນຕອນເຊົ້າແມ່ນມີພິທີຕັກບາດຍາດນໍ້າຖວາຍທານອຸທິດບຸນກຸສົນໃຫ້ແກ່ເຈົ້າກຳນາຍເວນ ແລະສິ່ງສັກສິດທັງຫຼາຍ ແລະໃນຕອນຄ່ຳແມ່ນມີກິດຈະກຳວຽນທຽນອ້ອມພະທາດ, ຈູດບັ້ງໄຟດອກ, ປ່ອຍໂຄມໄຟ ແລະມີການຄົບງັນຕາມຮິດຄອງປະເພນີ.

  ໂດຍລວມແລ້ວການຈັດງານນະມັດສະການໄຫ້ວພະທາດຈອມສິງ ຫຼື ບຸນລຽບທາດທີ່ວັດຣາດສະຖານຫຼວງສີບຸນເຮືອງທີ່ເມືອງເມິງໃນຄັ້ງນີ້ຊາວພຸດສານິກກະຊົນລາວທັງຊາດຈັດງານນ້ອມນະມັດສະການພຣະທາດຫຼວງວຽງຈັນ ແລະພະທາດສຳຄັນຕ່າງໆໃນຂອບເຂດທົ່ວປະເທດຕາມຮີດຄອງປະເພນີຂອງຊາວພຸດທະສາສະນິກກະຊົນທີ່ເຄີຍປະຕິບັດກັນມາໃນທຸກໆປີ, ພ້ອມກັນນີ້ການຈັດງານບຸນໄຫ້ວພະທາດຈອມສິງກໍ່ເພື່ອບໍ່ປະຮີດໃຫ້ໝອງ, ບໍ່ປະຄອງໃຫ້ເສົ້າ ປະຕິບັດຕາມຮີດສິບສອງຄອງສິບ 14 ປະເພນີອັນດີງາມຂອງຊາວພຸດທະສາສະນິກກະຊົນພາຍໃນເມືອງເມິງໄວ້ຕະຫຼອດໄປ.

 

แชร์