ຮອງເຈົ້າແຂວງຄຳມ່ວນ ຕ້ອນຮັບການຢ້ຽມຢາມທູດອັງກິດ

  ເມື່ອວັນທີ 2 ພະຈິກ 2020 ຢູ່ທີ່ຫ້ອງວ່າການແຂວງຄຳມ່ວນ ທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນໄດ້ຕ້ອນຮັບການມາຢ້ຽມຢາມຂອງທ່ານ ຈອນ ເພຍສອນ (Jonh pearson) ເອກອັກຄະຣາຊທູດອັງກິດປະຈຳ ສປປ ລາວ.

  ການພົບປະດັ່ງກ່າວເອກອັກຄະຣາຊທູດອັງກິດໄດ້ສະເໜີກ່ຽວກັບຈຸດປະສົງຂອງການມາພົບປະຢ້ຽມຢາມ ແລະເຮັດວຽກຢູ່ແຂວງຄຳມ່ວນໃຫ້ແກ່ທ່ານຮອງເຈົ້າແຂວງໄດ້ຮັບຊາບເນື່ອງຈາກວ່າ ແຂວງຄຳມ່ວນກໍ່ແມ່ນແຂວງໜຶ່ງທີ່ໄດ້ຮັບທຶນສະໜັບສະໜູນຈາກລັດຖະບານອັງກິດໃນໂຄງການເກັບກູ້ລະເບີດບໍ່ທັນແຕກພ້ອມນັ້ນທ່ານຍັງໄດ້ສະເໜີຕໍ່ແຂວງຄຳມ່ວນກ່ຽວກັບທຶນການສຶກສາຂອງລັດຖະບານອັງກິດທີ່ໄດ້ຕອບສະໜອງໃຫ້ແກ່ ສປປ ລາວ ປະມານ 10 ທຶນໃນແຕ່ລະປີ, ນອກນັ້ນທັງສອງຝ່າຍຍັງໄດ້ຍົກໃຫ້ເຫັນເຖິງບັນຫາຜົນກະທົບຂອງພະຍາດໂຄວິດ-19 ທີ່ສົ່ງຜົນກະທົບໃຫ້ແກ່ການພັດທະນາເສດຖະກິດໂດຍສະເພາະແມ່ນການພົວພັນຮ່ວມມືດ້ານການຄ້າ-ການລົງທຶນກັບພາກພື້ນ ແລະສາກົນໄດ້ມີທ່າອ່ຽງຫຼຸດລົງເຮັດໃຫ້ການພັດທະນາໃນຂົງເຂດດັ່ງກ່າວພົບຄວາມຫຍຸ້ງຍາກ.

   ໂອກາດດັ່ງກ່າວໃນນາມຕາງໜ້າການນຳຂອງແຂວງຄຳມ່ວນທ່ານ ບຸນມີ ພິມມະສອນ ຍັງໄດ້ສະແດງຄວາມຂອບໃຈຕໍ່ການມາຢ້ຽມຢາມຂອງເອກອັກຄະຣາຊທູດອັງ ກິດປະຈຳລາວໃນຄັ້ງນີ້ຊຶ່ງເປັນການສ້າງເງື່ອນໄຂທີ່ດີໃຫ້ແກ່ການພົວພັນຮ່ວມມືທັງສອງຝ່າຍພ້ອມທັງໄດ້ສະເໜີຕໍ່ເອກອັກຄະຣາຊທູດອັງກິດປະຈຳລາວຊ່ວຍສະໜັບ ສະໜູນພາກທຸລະກິດຂອງປະເທດໃຫ້ເຂົ້າມາລົງທຶນຢູ່ໃນແຂວງຄຳມ່ວນ.

-----------

ຂຽນໂດຍ: ກອງຄຳ

ຮູບພາບ: ໜັງສືພິມເສດຖະກິດ-ສັງຄົມ

แชร์