ດຽບວູ ໂຮງງານຕັດຫຍິບເພື່ອສົ່ງອອກ ສ້າງວຽກເຮັດງານທໍາໃຫ້ແຮງງານລາວເກືອບ 1 ພັນຄົນ

  ບໍລິສັດ ດຽບວູ ຈຳກັດ ເປັນໂຮງງານຕັດຫຍິບເຄື່ອງແບບພະນັກງານສົ່ງອອກຂາຍຕ່າງປະເທດ, ລວມມີທັງໝົດ 3 ສາຂາ ໃນນະຄອນຫຼວງວຽງຈັນ, ມີຍອດການຜະລິດບໍ່ຕໍ່າກວ່າ 2,15 ແສນ ໂຕຕໍ່ເດືອນຈາກສີມືແຮງງານລາວເກືອບ 1 ພັນຄົນ, ໂດຍການ ເຕີບໂຕຂອງບໍລິສັດຢູ່ໃນລະດັບ 15-20% ຕໍ່ປີ, ປະຈຸບັນຍັງມີ ຄວາມຕ້ອງການພະນັກງານຕື່ມອີກເພື່ອຕອບສະໜອງການຜະລິດໃຫ້ແກ່ທ້ອງຕະຫຼາດທີ່ນັບມື້ເພີ່ມຂຶ້ນ.

  ທ່ານ ຈອນ ຊໍາເມີ ຜູ້ບໍລິຫານ ບໍລິສັດ ດຽບວູ ຈຳກັດ ໃຫ້ສໍາພາດວ່າ: ໃນປີ 1992 ໄດ້ເຂົ້າມາດໍາ ເນີນທຸລະກິດໂຮງງານວຽງເຈີ ຢູ່ນະຄອນຫຼວງວຽງຈັນ ສປປ ລາວ ຊຶ່ງເປັນຜູ້ຈັດການ, ຫຼັງຈາກນັ້ນ ໃນປີ 2008 ໄດ້ຂາຍຮຸ້ນໂຮງງານ ວຽງເຈີ ແລະຊື້ຮຸ້ນ ບໍລິສັດ ດຽບວູ ຈໍາກັດ ຊຶ່ງເປັນໂຮງງານຕັດຫຍິບເຄື່ອງແບບພະນັກງານເພື່ອສົ່ງອອກຂາຍຕ່າງປະເທດໃນຈໍານວນ 35% ແລະເວລານັ້ນມີພະນັກງານພຽງ 35 ຄົນ. ນັບແຕ່ນັ້ນມາ ບໍລິສັດ ດຽບວູ ຈໍາກັດ ກໍໄດ້ມີການ ພັດທະນາ ແລະເຕີບໃຫຍ່ຂະຫຍາຍຕົວຕາມການເຕີບໂຕຂອງ ເສດຖະກິດ-ສັງຄົມຂອງ ສປປ ລາວ, ສັງເກດໄດ້ຈາກບໍລິສັດມີການຂະຫຍາຍອອກເປັນ 3 ສາຂາ ຄື: ສາຂາບ້ານຊຳເກດ ເມືອງສີໂຄດຕະບອງ, ສາຂາທ່ານາແລ້ງ ເມືອງຫາດຊາຍຟອງ ແລະສາ ຂາບ້ານວຽງຈະເລີນ ເມືອງໄຊ ເສດຖາໃນເນື້ອທີ່ທັງໝົດປະມານ 18 ພັນຕາແມັດ ເຮັດໃຫ້ມີພະນັກງານເພີ່ມຂຶ້ນຈາກ 35 ຄົນ ໃນປີ 2008 ມາເປັນເກືອບ 1 ພັນຄົນ ໃນປະຈຸບັນ. 

  ສະເພາະດ້ານການຜະລິດບໍລິສັດ ດຽບວູ ຈໍາກັດ ໄດ້ມີການນໍາເຂົ້າວັດຖຸດິບຈາກຕ່າງປະເທດ ແລະດໍາເນີນການຜະລິດດ້ວຍຄວາມຕ້ອງການຂອງລູກຄ້າໂດຍສ່ວນໃຫຍ່ເປັນເຄື່ອງແບບພະນັກງານເປັນຕົ້ນແມ່ນຊຸດພະນັກງານໂຮງແຮມ, ຮ້ານອາຫານ, ແພດ, ກູ້ໄພ ແລະອື່ນໆ, ຈໍາໜ່າຍອອກໄປຍັງປະເທດທີ່ມີການພັດທະນາແລ້ວ ເຊັ່ນ: ຝຣັ່ງ, ແລນມາກ, ສະວິເລນ, ພີແລນ, ອອສເຕເລຍ ແລະປະເທດ ອື່ນໆ ໃນຍອດການຜະລິດບໍ່ຕໍ່າ ກວ່າ 2,15 ແສນໂຕຕໍ່ເດືອນ ຈາກ ສີມືແຮງງານລາວ 970 ຄົນ ໂດຍ ເຮັດໃຫ້ບໍລິສັດມີການເຕີບໂຕຢູ່ໃນ ລະດັບ 15-20% ຕໍ່ປີ.

  ຕໍ່ກັບຜົນງານດັ່ງກ່າວ, ບໍລິສັດ ດຽບວູ ຈໍາກັດ ໄດ້ມີການອຸດໜູນ ນະໂຍບາຍດ້ານແຮງງານ ແລະ ສະຫວັດດີການສັງຄົມໃຫ້ກັບພະນັກງານດ້ວຍການຊຸກຍູ້ສົ່ງເສີມພັດ ທະນາສີມືແຮງງານ ເປັນຕົ້ນແມ່ນ ການສຶກສາອົບຮົມແນວຄິດ, ທັກ ສະການຜະລິດ, ການປ້ອງກັນເພດສໍາພັນ ແລະວຽກງານອື່ນໆທີ່ມີຄວາມສໍາຄັນຕໍ່ການດໍາລົງຊີວິດ ປະຈໍາວັນຂອງພະນັກງານແຕ່ລະ ຄົນ. ພ້ອມນີ້ທາງບໍລິສັດຍັງມີຫໍ ພັກຍິງ ແລະຊາຍ, ມີລົດຮັບສົ່ງ, ລ້ຽງອາຫານທ່ຽງຟຣີ (ສຳລັບພະ ນັກງານທີ່ນອນຫໍພັກຈະມີເຂົ້າ ໜຽວໃຫ້ຕອນແລງອີກ), ມີແພດ ປະຈຳໂຮງງານ ແລະຈ່າຍເງິນສົມ ທົບປະກັນສັງຄົມໃຫ້ນັບແຕ່ເດືອນທຳອິດເປັນຕົ້ນໄປ. ນອກຈາກນີ້ ພາຍໃນໂຮງງານສາຂາບ້ານຊຳ ເກດ ເມືອງສີໂຄດຕະບອງ ຍັງມີ ການປູກພືດຜັກປອດສານພິດ ແລະ ລ້ຽງໄກ່ດໍາປອດນໍາອີກ.

  ແນວໃດກໍຕາມ ບໍລິສັດ ດຽບວູ ຍັງມີຄວາມຕ້ອງການພະນັກງານເພີ່ມອີກເພື່ອຕອບສະໜອງການຜະລິດໃຫ້ແກ່ທ້ອງຕະຫຼາດທີ່ນັບມື້ເພີ່ມຂຶ້ນ, ຫາກທ່ານໃດສົນໃຈສາ ມາດຕິດຕໍ່ສອບຖາມໄດ້ທີ່ ບໍລິສັດ ດຽບວູ ຈຳກັດ ຕັ້ງຢູ່ບ້ານຊຳເກດ, ເມືອງສີໂຄດຕະບອງ, ນະຄອນຫຼວງວຽງຈັນ ເບີໂທລະສັບ: 030 9334873, 020 55920143.

ໂດຍ: ກິ່ງລັດຕະນາ-ເສດຖະກິດ-ສັງຄົມ

แชร์