ທົ່ວແຂວງໄຊຍະບູລີ ມີສໍາມະໂນທີ່ດິນ 2,97 ແສນຕອນ

 ກອງປະຊຸມສະຫຼຸບວຽກງານຈັດສັນທີ່ດິນ, ວຽກງານຂຶ້ນທະບຽນທີ່ດິນ ແລະອອກໃບຕາດິນໄດ້ຈັດຂຶ້ນໃນວັນທີ 3 ພະຈິກ 2020 ນີ້ຢູ່ທີ່ຫ້ອງປະຊຸມພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງໄຊຍະບູລີ, ໂດຍການເປັນປະທານຂອງທ່ານ ບຸນລັບ ແສງອາພອນ ຫົວໜ້າພະແນກຊັບພະຍາກອນທໍາມະຊາດ ແລະສິ່ງ ແວດລ້ອມແຂວງ,ມີທ່ານ ວິລະເດດ ສີສຸລາດ ຫົວໜ້າແຜນງານວຽກງານຂຶ້ນທະບຽນອອກໃບຕາດິນ, ມີເຈົ້າເມືອງ, ຮອງເຈົ້າເມືອງ, ຫົວໜ້າຂະແໜງ, ຮອງຫົວໜ້າຂະແໜງ, ຫົວໜ້າຫ້ອງການ, ຮອງຫົວໜ້າຫ້ອງການ, ມີທີ່ປຶກສາວຽກງານຈັດສັນ ແລະວຽກງານຂຶ້ນທະບຽນທີ່ດິນ-ອອກໃບຕາດິນພ້ອມພະນັກງານທີ່ກ່ຽວຂ້ອງເຂົ້າ ຮ່ວມ.

  ທ່ານ ບຸນລັບ ແສງອາພອນ ຫົວໜ້າພະແນກຊັບພະຍາກອນທໍາມະຊາດ ແລະສິ່ງແວດລ້ອມແຂວງໄດ້ກ່າວວ່າ: ໂດຍປະຕິບັດຕາມແຜນຈັດສັນທີ່ດິນ, ຂຶ້ນທະບຽນທີ່ ດິນ, ອອກໃບຕາດິນພາຍໃຕ້ການສະໜັບສະໜູນຈາກໂຄງການ GIZ-ELTes-LMDP ປີ 2020 ເພື່ອຕີລາຄາຄືນການຈັດຕັ້ງປະຕິບັດວຽກງານຈັດສັນທີ່ດິນ ແລະການຂຶ້ນທະບຽນອອກໃບຕາດິນຜ່ານມາຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງເພື່ອຮ່ວມກັນຄົ້ນຄວ້າຊອກຫາວິທີທາງແກ້ໄຂໂດຍຮັບປະກັນການນໍາໃຊ້ທີ່ດິນໃຫ້ມີຄວາມຍືນຍົງ ແລະໃຫ້ເປັນເອກະພາບກັນໃນການຈັດຕັ້ງປະຕິບັດໃນຕໍ່ໜ້າ,ແຜນງານທີ່ດິນລາວ-ເຢຍລະມັນ ELTes ແມ່ນແຜນງານໜຶ່ງຂອງລັດຖະບານເຢຍລະມັນທີ່ໃຫ້ການສະໜັບສະໜູນຊ່ວຍເຫຼືອລ້າທາງດ້ານງົບປະມານ, ວິຊາການ ແລະອຸປະກອນຮັບໃຊ້ຊຶ່ງແຜນງານດັ່ງກ່າວໄດ້ເລີ່ມຕົ້ນໃຫ້ການຊ່ວຍເຫຼືອແຕ່ປີ 2015 ຢູ່ 2 ເມືອງຄື: ເມືອງຊຽງຮ່ອນ, ເມືອງພຽງ ແລະ ປີ 2017 ໄດ້ໃຫ້ການຊ່ວຍເຫຼືອອີກ 2 ເມືອງຄື: ເມືອງບໍ່ແຕນ ແລະ ເມືອງທົ່ງມີໄຊ. ວຽກງານວາງແຜນນໍາໃຊ້ທີ່ດິນ ແລະຄຸ້ມຄອງທີ່ດິນກະສິກໍາປີ 2020 ແຂວງໄຊຍະບູລີ ມີ 11 ເມືອງໄດ້ ຈັດສັນຂັ້ນເມືອງສໍາເລັດ 2 ເມືອງ ມີ 258 ບ້ານເທົ່າກັບ 59,72% ໃນນັ້ນໂຄງການໃຫ້ທຶນຊ່ວຍເຫຼືອຈັດສັນໄດ້ 81 ບ້ານ; ປີ 2020 ແຜນ 69 ບ້ານປະຕິບັດໄດ້ 30 ບ້ານ ເທົ່າກັບ 43,47% ໃນນີ້ບ້ານທີ່ແຜນງານທີ່ດິນລາວ-ເຢຍລະມັນ ELTes ຊ່ວຍເຫຼືອ 14 ບ້ານ, ຍັງຄ້າງ 3 ບ້ານ, ເມືອງບໍ່ແຕນ 8 ບ້ານ ປະຕິບັດໄດ້ 5 ບ້ານ ຍັງຄ້າງ 3 ບ້ານ.

ສຳລັບວຽກງານຂຶ້ນທະບຽນທີ່ດິນທົ່ວແຂວງມີສໍາມະໂນທີ່ດິນທັງໝົດ 297.941 ຕອນ, ມີເນື້ອທີ່ 210.025 ເຮັກຕາໃນນັ້ນດິນປຸກສ້າງມີ 84.326 ຕອນ,ເນື້ອທີ່ 316,50 ລ້ານເຮັກຕາ, ທຽບໃສ່ຕົວເລກສໍາມະໂນທີ່ດິນທົ່ວແຂວງເທົ່າກັບ 52,57% ໃນປີ 2020 ແຜນຂຶ້ນທະບຽນທີ່ດິນທັງໝົດ 10.000 ຕອນປະຕິບັດໄດ້ 10.189 ຕອນ, ທຽບໃສ່ແຜນປີເທົ່າກັບ 101,89% ໃນນັ້ນແຜນງານທີ່ດິນລາວ-ເຢຍລະມັນ  ELTes ຕາມແຜນ 8.470 ຕອນປະຕິບັດໄດ້ 8.234 ຕອນເທົ່າກັບ 97,21%, ສ່ວນວຽກຂຶ້ນທະບຽນ, ອອກໃບຕາດິນແຜນງານທີ່ດິນລາວ-ເຢຍລະມັນປີ 2020 ທີ່ປະຕິບັດຢູ່ເມືອງເປົ້າໝາຍ 4 ເມືອງຄື: ເມືອງຊຽງຮ່ອນມີ 3 ບ້ານ, ມີແຜນຕອນດິນ 2.054 ຕອນ, ວັດແທກໄດ້ 1.978 ຕອນ, ພິມໃບຕາດິນໄດ້ 980 ໃບ, ທຽບໃສ່ແຜນການເທົ່າກັບ 69,29%, ເມືອງພຽງມີ 3 ບ້ານ ແຜນຕອນດິນ 2.350 ຕອນ, ວັດແທກໄດ້  2.427 ຕອນ, ພິມໃບຕາດິນໄດ້ 1.556  ໃບ, ແຈກຢາຍໃບຕາດິນໄດ້ 72 ໃບ ເທົ່າກັບ 103,27%, ເມືອງທົ່ງມີໄຊ ມີ 3 ບ້ານ 2.191 ຕອນ, ວັດແທກໄດ້ 2.148 ຕອນ,ພິມໃບຕາດິນໄດ້ 1.851 ໃບເທົ່າກັບ 98,03%,ເມືອງບໍ່ແຕນມີ 4 ບ້ານ ແຜນຕອນດິນ 1.875  ຕອນ, ວັດແທກໄດ້ 1.843 ຕອນ, ພິມໃບຕາດິນໄດ້ 1.211 ຕອນ, ແຈກຢາຍໃບຕາດິນ 90 ໃບ ເທົ່າກັບ 98,29%, ລວມທັງໝົດແຜນງານທີ່ດິນລາວ-ເຢຍລະມັນປະ ຕິບັດຂຶ້ນທະບຽນອອກໃບຕາດິນຢູ່ 4 ເມືອງເປົ້າໝາຍມີ 13 ບ້ານ, ມີ 8.470 ຕອນດິນ, ວັດແທກໄດ້ 8.396 ຕອນ, ພິມໃບຕາດິນໄດ້ 5.526 ໃບ, ແຈກຢາຍໃບຕາດິນ ໄດ້ 162 ໃບ ເທົ່າກັບ 99,12%.

---------------

ຂຽນໂດຍ: ບຸນທີ, ຮູບພາບ: ໜັງສືພິມເສດຖະກິດ-ສັງຄົມ

แชร์