ທ່ຽວຊົມນໍ້າຕົກຕາດລະໂຊຍ

 ຖ້າເວົ້າເຖິງເມືອງຕະໂອ້ຍ ແຂວງສາລະວັນ ແລ້ວບັນດາທ່ານກໍ່ຄົງຈະຮູ້ຈັກກັນດີເພາະວ່າເມືອງດັ່ງກ່າວນີ້ມີຊື່ສຽງທາງດ້ານແຫຼ່ງທ່ອງທ່ຽວທຳມະຊາດ ແລະວັດທະນະ ທຳຫຼາຍແຫ່ງທີ່ນັກທ່ອງທ່ຽວທັງພາຍໃນ ແລະຕ່າງປະເທດນິຍົມກັນມາທ່ຽວຊົມເປັນຕົ້ນແມ່ນຕາດລະໂຊຍແຫຼ່ງທ່ອງທ່ຽວທີ່ສວຍງາມທາງທຳມະຊາດທີ່ຍັງຄົງມີຄວາມອຸດົມສົມບູນຂອງປ່າໄມ້ ແລະຊີວະນາໆພັນ.

 ເມືອງຕະໂອ້ຍກໍ່ເປັນອີກເມືອງໜຶ່ງຂອງແຂວງສາລະວັນທີ່ມີຄວາມຫຼາກຫຼາຍທາງດ້ານວັດທະນະທຳ, ຮິດຄອງປະເພນີພ້ອມທັງທີ່ມີຄວາມອຸດົມສົມບູນທາງດ້ານຊັບພະ ຍາກອນທຳມະຊາດ ແລະສິ່ງແວດລ້ອມເຮັດໃຫ້ເມືອງນີ້ມີແຫຼ່ງທ່ອງທ່ຽວທາງດ້ານທຳມະຊາດທີ່ມີຄວາມສວຍງາມຫຼາຍແຫ່ງ.

  ນໍ້າຕົກຕາດລະໂຊຍ ເໝາະກັບການໄປກິນເຂົ້າປ່າ ແລະລົງຫຼິ້ນນໍ້າທີ່ໃສເຢັນສະບາຍເພາະວ່າຕາດແຫ່ງນີ້ມີຈຸດຫຼິ້ນໜ້າທີ່ປອດໄພຫຼາຍບ່ອນພ້ອມກັນນີ້ທ່ານຍັງສາມາດຍ່າງຊົມທຳມະຊາດອ້ອມຮອບທີ່ຖືກປົກຫຸ່ມດ້ວຍປ່າໄມ້ຕຶບໜາທີ່ເຕັມໄປດ້ວຍຕົ້ນໄມ້ໃຫຍ່ທີ່ຂຽວສົດງົດງາມ ແລະ ຜືນປ່າທີ່ຍັງຄົງມີຄວາມອຸດົມສົມບູນຂອງຊີວະນາໆພັນປະກອບກັບຄວາມງາມຂອງດອກໄມ້ປ່າຫຼາຍຊະນິດທີ່ເກີດຂຶ້ນຕາມທຳມະຊາດຕາດດັ່ງກ່າວຕັ້ງຢູ່ບ້ານລະແຊງເມືອງຕະໂອ້ຍ,ຫ່າງຈາກເທສະບານເມືອງ 14 ກິໂລແມັດ.

ຂ່າວ: ວົງມະນີ ເສດຖະກິດສັງຄົມ

ຮູບພາບ: #ຫນັງສືພິມເສດຖະກິດສັງຄົມ

 

แชร์