ໂຮງຮຽນ ມສ ອຸທຸມພອນ ຈັດງານແຂ່ງຂັນພະລະສຶກສາ

  ເມື່ອທ້າຍເດືອນຜ່ານມາທີ່ໂຮງຮຽນ ມສ ອຸທຸມພອນ ໄດ້ຈັດງານແຂ່ງຂັນພະລະສຶກສາ ແລະສິລະປະສຶກສາ, ພ້ອມທັງສະເຫຼີມສະຫຼອງວັນຄູແຫ່ງຊາດໃນປີນີ້ຢ່າງຍິ່ງໃຫຍ່, ໂດຍການເຂົ້າຮ່ວມຂອງ ທ່ານ ປະສົງສິນ ຈະເລີນສຸກເຈົ້າເມືອງອຸທຸມພອນ, ທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ-ກີລາແຂວງສະ ຫວັນນະເຂດພ້ອມດ້ວຍບັນດາຄູ-ອາຈານ ແລະນ້ອງນັກຮຽນເຂົ້າຮ່ວມ.

  ທ່ານ ວັນລະຄອນ ເກດຕະວົງ ສາຫົວໜ້າໜ່ວຍງານກິດຈະການຂອງໂຮງຮຽນກ່າວລາຍງານວ່າ: ໂຮງຮຽນ ມສ ອຸທຸມພອນ ມີສະຖານທີ່ສະໜາມແຂ່ງຂັນກີລາທຸກປະເພດບໍ່ວ່າຈະເປັນເດີ່ນເຕະບານ, ເດີ່ນບານສົ່ງ 2 ເດີ່ນ, ເດີ່ນບານສົ່ງຫາດຊາຍ, ເດີ່ນບານບ້ວງ,  ເດີ່ນກະຕໍ້ຫວາຍ, ມີຮາວຄູ່ 1 ຮາວ, ຮາວຄີກ 1 ຮາວ, ຂຸມເຕັ້ນຍາວ, ສະໜາມກີລາຂຶ້ນເຊືອກ 3 ຈັ່ງຫວະ 1 ສະໜາມ ແລະມີອຸປະກອນກີລາປະເພດຕ່າງໆຄົບຊຸດ, ອັນນີ້ກໍ່ແມ່ນແຜນຍຸດທະສາດການ ສຶກສາຕາມ 3 ລັກສະນະ ແລະ5 ຫຼັກມູນຂອງການສຶກສາ, ປະຕິບັດຕາມ 3 ຂໍ້ແຂ່ງຂັນຂອງກະ ຊວງສຶກສາທິການ-ກີລາວາງອອກໃຫ້ໄດ້ຮັບຜົນສໍາເລັດ, ຄຽງ ຄູ່ກັນນີ້ແມ່ນພັດທະນາໂຮງຮຽນ ມສ ອຸທຸມພອນໃຫ້ເປັນໂຮງຮຽນຕົວແບບຮອບດ້ານຂອງແຂວງ ແລະຕົວແບບທາງດ້ານພາລະສຶກສາ-ສິລະປະສຶກສາຕາມແຜນການຂອງກົມພະລະສຶກສາຂອງກະຊວງສຶກສາທິການ-ກີລາວາງອອກ, ອັນໄດ້ເຮັດໃຫ້ນັກຮຽນ ມສ ອຸທຸມພອນມີນັກກີລາບານສົ່ງ ແລະບານເຕະທັງຊາຍ ແລະຍິງຕິດທີມຊາດ, ທີມປະສົມຂອງແຂວງຕິດທີມສາຍນັກຮຽນທົ່ວປະເທດໃນແຕ່ລະຄັ້ງທີ່ມີການແຂ່ງຂັນ.

  ໂອກາດດັ່ງກ່າວທ່ານ ໂພໄຊ ອິນທະວົງສາ ຮອງເຈົ້າເມືອງຍັງໄດ້ກ່າວເປີດພິທີຢ່າງເປັນທາງການພ້ອມທັງໄດ້ມອບຫຼຽນໄຊ ແຮງງານຊັ້ນສາມ, ຫຼຽນກາ, ໃນບັ້ນເປີດປີທ່ອງທ່ຽວລາວ 2018 ຜ່ານມາ, ໃບຍ້ອງຍໍຂັ້ນກະຊວງສຶກສາທິການ-ກີລາ, ໃບຍ້ອງຍໍຂັ້ນພະແນກສຶກສາທິການ-ກີລາແຂວງ ແລະໃບສັນລະເສີນຂອງທ່ານເຈົ້າເມືອງອຸ ທຸມພອນໃຫ້ແກ່ກົມກອງ, ບຸກຄົນທີ່ມິຜົນງານດີເດັ່ນໃນການເຄື່ອນໄຫວວຽກງານຜ່ານມາ, ໃຫ້ກຽດມອບຫຼຽນ ແລະໃບຍ້ອງຍໍຂັ້ນຕ່າງໆ ໂດຍແມ່ນ ທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ, ທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ-ກີລາແຂວງ ແລະທ່ານ ໂພໄຊ ອິນທະວົງ ຮອງເຈົ້າເມືອງອຸທຸມພອນ ຜັດປ່ຽນກັນມອບໃຫ້ກົມກອງ ແລະບຸກຄົນຢ່າງສົມກຽດ, ຫຼັງຈາກນັ້ນກໍ່ໄດ້ຮັບ ຊົມການສະແດງສິລະປະ-ວັນນະຄະດີຈາກນ້ອງນັກຮຽນ ແລະການແຂ່ງຂັນກີລາພື້ນບ້ານພາຍໃນໂຮງຮຽນອີກດ້ວຍ.

 

แชร์