10 ເດືອນ ເມືອງອາດສະພອນ ເກັບລາຍຮັບໄດ້ 54% ຂອງແຜນການ

   ເມື່ອທ້າຍເດືອນຜ່ານມາທີ່ສະໂມສອນຂອງເມືອງອາດສະພອນ ໄດ້ຈັດກອງປະຊຸມເຜີຍແຜ່ນິຕິກຳໃນຂົງເຂດການເງິນ ແລະແຜນການເຄື່ອນໄຫວວຽກງານຊຸກຍູ້ລາຍຮັບ 2 ເດືອນທ້າຍປີຂອງເມືອງໂດຍການເປັນປະທານຮ່ວມຂອງທ່ານ ຄຳແພງ ເພັດທຸມພອນ ເຈົ້າເມືອງອາດສະພອນ, ທ່ານ ແສນສັກ ສຸລິສັກ ຫົວໜ້າພະແນກການເງິນແຂວງ, ມີຄະນະການນຳຂອງເມືອງ, ຕາງໜ້າຂະແໜງການກ່ຽວຂ້ອງຂອງພະແນກການເງິນແຂວງ ແລະ ບັນດາທ່ານຫົວໜ້າຫ້ອງການພາຍໃນເມືອງເຂົ້າຮ່ວມໃນພິທີ, ທ່ານ ຄຳແພງ ເພັດທຸມພອນ ກໍ່ໄດ້ຜ່ານບົດລາຍງານສະພາບການຈັດຕັ້ງປະຕິບັດການຈັດເກັບລາຍຮັບ10 ເດືອນ ແລະ ແຜນຄາດຄະເນ 2 ເດືອນທ້າຍປີ 2020, ຊຶ່ງໃນໄລຍະ 10 ເດືອນ ທົ່ວເມືອງສາມາດຈັດເກັບລາຍຮັບໄດ້ທັງໝົດ 1,29 ຕື້ກີບ ເທົ່າກັບ 54,80% ຂອງແຜນການປີ ໃນນັ້ນ, ຮັບຈາກອາກອນປົກ ກະຕິ 235 ລ້ານກວ່າກີບ, ເທົ່າກັບ 24,36%, ຮັບຈາກຄ່າທຳນຽມຕ່າງໆ 35 ລ້ານກວ່າກີບ, ເທົ່າກັບ61,21%, ລາຍຮັບຈາກຄ່າທຳນຽມ ນຳໃຊ້ ທີ່ດິນ 872 ລ້ານກວ່າກີບ ເທົ່າກັບ 87,27%, ຮັບຈາກຊັບສິນ 24 ລ້ານກວ່າກີບ, ເທົ່າກັບ 57,52% ແລະຮັບຈາກຄ່າບໍລິການວິຊາການຈຳນວນ 124 ລ້ານກວ່າກີບ, ເທົ່າ ກັບ 42,09% ຂອງແຜນການ, ສ່ວນລາຍຮັບເຄື່ອນຍ້າຍຈາກແຂວງປະຕິບັດໄດ້ 90 ລ້ານກວ່າກີບ. ດ້ານລາຍຈ່າຍງົບປະມານໄລຍະ 10 ເດືອນຜ່ານມານີ້ປະຕິບັດໄດ້ 1,83 ຕື້ກີບ ເທົ່າກັບ 60,53% ຂອງແຜນການປີ, ສຳລັບແຜນການຄາດຄະເນ 2 ເດືອນ ທ້າຍປີດ້ານການຈັດເກັບລາຍຮັບຈະສູ້ຊົນໃຫ້ໄດ້ 353 ລ້ານກວ່າກີບ, ຄາດຄະເນລາຍຮັບໝົດປີ 1,62 ຕື້ ກີບ, ເທົ່າກັບ 70,18% ຂອງແຜນການປີ.

 ຈາກນັ້ນ, ທ່ານ ຄຳກ່ອງ ພິມມະໂນສັກ ຫົວໜ້າຄັງເງິນແຫ່ງຊາດປະຈຳແຂວງ, ທ່ານ ບຸນສີ ຂຸນນາເສນ ຮັກສາການຫົວໜ້າງົບປະມານແຂວງ, ທ່ານ ບົວສອນ ສີສຸລາດ ຮອງຫົວໜ້າສ່ວຍສາອາກອນປະຈຳແຂວງ ທ່ານ ໂຄຕາມີ ກົມທິລາດ ຮອງຫົວໜ້າຂະແໜງຊັບສິນແຂວງກໍ່ໄດ້ສັບປ່ຽນກັນຂຶ້ນເຜີຍແຜ່ນິຕິກຳຕ່າງໆກ່ຽວກັບວຽກ ງານການເງິນ ແລະໃນຕອນທ້າຍ, ທ່ານ ແສນສັກ ສຸລິສັກ ກໍ່ໄດ້ໂອ້ລົມ ແລະໃຫ້ທິດຊີ້ນຳໃນການຈັດຕັ້ງປະຕິບັດວຽກງານການເງິນຂອງເມືອງຕື່ມອີກ.

   ໂອກາດນີ້, ທ່ານຫົວໜ້າພະແນກການເງິນແຂວງຍັງໄດ້ມອບດອກໄຟເຍືອງພະລັງງານແສງຕາເວັນຈຳນວນ 5 ຊຸດ, ເງິນສົດ 2 ລ້ານກີບ, ລວມມູນຄ່າທັງໝົດ 5 ລ້ານກີບໃຫ້ກັບເມືອງອາດສະພອນ.  

-----------

ຂຽນໂດຍ: ຂ່າວສະຫວັນ

ຮູບພາບ: #ຫນັງສືພິມເສດຖະກິດສັງຄົມ

แชร์