ຈໍາປາສັກ ເອົາການຜະລິດກະສິກໍາເປັນສິນຄ້າແກ້ໄຂຄວາມທຸກຍາກປະຊາຊົນ

     ທ່ານ ບົວລີ ເພັດສົງຄາມ ຫົວໜ້າພະແນກກະສິກຳ ແລະປ່າໄມ້ແຂວງຈໍາປາສັກໄດ້ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນອົງຄະນະພັກແຂວງຈຳປາສັກຄັ້ງທີ VIII ໃນວັນທີ 29 ຕຸລາ 2020, ພາຍໃຕ້ຫົວຂໍ້ວ່າ “ການຜະລິດກະສິກໍາເປັນສິນຄ້າດ້ວຍການນໍາໃຊ້ເຕັກນິກໃໝ່ເພື່ອຍົກສູງຜະລິດຕະພາບການຜະລິດຕິດພັນກັບການ ພັດທະນາຊົນນະບົດ ແລະແກ້ໄຂຄວາມທຸກຍາກ ”ໃຫ້ຮູ້ວ່າ: ໂດຍປະຕິບັດຕາມທິດທາງແນວທາງການປ່ຽນແປງໃໝ່ຢ່າງຮອບດ້ານຂອງພັກພາຍໃຕ້ການຊີ້ນຳຢ່າງ ໃກ້ຊິດຂອງອົງຄະນະພັກ, ອົງການປົກຄອງແຂວງ; ມາເຖິງປະຈຸບັນນີ້ວຽກງານການຜະລິດສະບຽງອາຫານ ແລະການຜະລິດສິນ ຄ້າກະສິກຳຍັງຖືເປັນ “ສະໜາມຮົບ ອັນດັບໜຶ່ງ” ແລະຍັງເປັນທິດທາງ ແລະວຽກຈຸດສຸມຕົ້ນຕໍເພື່ອແກ້ໄຂຄວາມທຸກຍາກສຳລັບປະຊາຊົນໃນເຂດຊົນນະບົດ ແລະໃນຕົວເມືອງ.

 ໃນ 5 ປີຜ່ານມາ ໂດຍກຳແໜ້ນຈຸດພິເສດທີ່ຕັ້ງ ແລະທ່າແຮງບົ່ມຊ້ອນຂອງແຂວງ, ພະແນກກະສິກໍາ ແລະປ່າໄມ້ພວກເຮົາໄດ້ສຸມໃສ່ຊຸກຍູ້ສົ່ງເສີມວຽກງານປັບປຸງການຜະລິດໂດຍເນັ້ນໃສ່ການນຳ ໃຊ້ວິທະຍາສາດ, ເຕັກໂນໂລຊີ ໃໝ່ທັນສະໄໝສູ່ການຜະລິດສິນ ຄ້າຜ່ານກຸ່ມຮຽນຮູ້, ກຸ່ມຜູ້ຜະລິດ ກະສິກຳ, ສະຫະກອນການຜະລິດຕ່າງໆຢ່າງຕັ້ງໜ້າອັນພົ້ນເດັ່ນແມ່ນການຜະລິດສິນຄ້າຂອງຜູ້ປະກອບການພາຍໃນ ແລະຕ່າງປະເທດ, ນຳໃຊ້ເຕັກນິກກະສິກຳຂັ້ນ ສູງ ແລະຮູບແບບການຜະລິດແບບໃໝ່ທັນສະໄໝເປັນຕົ້ນໂຄງການປູກພືດຜັກດ້ວຍລະບົບໄຮໂຕຣໂປນິກ, ປູກພືດຜັກຄຸນນະພາບພືດຜັກສະອາດ (GAP), ການຍົກສະມັດຕະພາບກາເຟຢູ່ເມືອງປາກຊ່ອງ, ການເຮັດນາໄຮ່ໃຫຍ່ຢູ່ທົ່ງບ້ານເມືອງແສນ, ເມືອງໂຂງ ແລະກຸ່ມປູກເຂົ້າເປັນສິນຄ້າບ້ານສາມສ້າງ, ບ້ານປາໂມກເມືອງມຸນລະ ປະໂມກ ແລະອີກຫຼາຍແຫ່ງ, ຕິດພັນກັບການສ້າງ ແລະຄຸ້ມຄອງກຸ່ມຜູ້ຜະລິດກະສິກຳ ແລະສະຫະກອນການຜະລິດເພີ່ມຂຶ້ນ ແລະມີປະສິດທິຜົນດີກວ່າເກົ່າ, ມີຫຼາຍແຫ່ງໄດ້ກາຍເປັນຕົວແບບ ແລະໜໍ່ແໜງທີ່ດີເຊັ່ນ: ສະຫະກອນຜູ້ ຜະລິດການເຟພູພຽງບໍລະເວນ (CPC), ສະຫະກອນເກັບຊື້ ແລະ ຜະລິດພືດຜັກ(ABCPC) ແລະ ສະຫະກອນອື່ນໆລວມ 13 ສະຫະ ກອນໄດ້ຮັບການຈັດຕັ້ງ, ເຄື່ອນໄຫວເປັນຢ່າງດີ, ໃນນັ້ນໄດ້ຮັບການສົ່ງເສີມ ແລະສ້າງຕັ້ງຂຶ້ນໃໝ່.

  ໃນ 5 ປີຜ່ານມາມີຈຳນວນ 5 ສະຫະກອນ; ນອກນັ້ນຍັງໄດ້ສົ່ງເສີມການສ້າງຕັ້ງກຸ່ມຜູ້ຜະລິດກະສິກຳເພື່ອຊ່ວຍເຫຼືອເຊິ່ງກັນແລະກັນລະຫວ່າງສະມາຊິກ ແລະຄອບຄົວສະມາຊິກດ້ວຍກັນທາງດ້ານການຜະລິດ ແລະບໍລິການ, ປະຈຸບັນມີກຸ່ມຜູ້ຜະລິດກະສິກຳທັງໝົດ 116 ກຸ່ມ, ນອນໃນ  86 ບ້ານ ໃນ 9 ເມືອງ ແລະນະ ຄອນປາກເຊ.

   ທັງນີ້ໄດ້ເຮັດໃຫ້ການຜະລິດກະສິກໍາສືບຕໍ່ຂະຫຍາຍຕົວຢ່າງຕໍ່ເນື່ອງ; ສະເລ່ຍ 5 ປີ 3,1%; ກວມເອົາອັດຕາສ່ວນຂອງລວມຍອດມູນຄ່າຜະລິດຕະພັນພາຍໃນ (GDP) 23,58%, ອັນພົ້ນເດັ່ນແມ່ນສາມາດຮັບປະກັນດ້ານສະບຽງອາຫານໄດ້ພຽງພໍໂດຍພື້ນຖານ, ມີສ່ວນແຮໄວ້ ແລະມີສ່ວນເກີນເພື່ອຂາຍ; ການຜະລິດເປັນສິນຄ້າມີຫຼາຍໜໍ່ແໜງໃໝ່ທີ່ດີ, ສາມາດເປັນແບບຢ່າງ ແລະຖອດຖອນບົດຮຽນຂະຫຍາຍກວ້າງອອກ-ການຜະລິດສະບຽງອາຫານ: ຜົນຜະລິດເຂົ້າລວມບັນລຸໄດ້ 2,26 ລ້ານໂຕນສະເລ່ຍ  4,5 ແສນໂຕນຕໍ່ປີ, ສະເລ່ຍໃສ່ພົນລະເມືອງໄດ້ 624 ກິໂລ ຕໍ່ຄົນຕໍ່ປີ; ການປູກພືດສະບຽງອາຫານຕ່າງໆ, ໄມ້ໃຫ້ໝາກແລະຊີ້ນປາອາ ຫານສາມາດຜະລິດໄດ້ລື່ນແຜນການ, ສະເພາະການຜະລິດຊີ້ນ, ປາສະເລ່ຍບັນລຸໄດ້ 62 ກິໂລຕໍ່ຄົນຕໍ່ປີ.

  ການຜະລິດກະສິກໍາເປັນສິນຄ້າເປັນຕົ້ນການປູກພືດກະສິກໍາອາຍຸສັ້ນ, ພືດເສດຖະກິດຕາມລະດູການໂດຍສະເພາະພືດໃນສັນຍາຜູກພັນກະສິກຳຄອນແທຣກຟາຣມິງ (Contract Faing) ບັນລຸໄດ້ 5,9 ລ້ານໂຕນ, ທຽບໃສ່ແຜນການເພີ່ມຂຶ້ນ 83,5%, ຫຼາຍກວ່າໝູ່ແມ່ນມັນຕົ້ນ, ຜັກກະລໍ່າ,ຜັກກາດຫຍໍ່, ສາລີຫວານ, ໝາກກ້ວຍ, ຂີງ, ມັນດ້າງ ແລະອື່ນໆ,ສໍາລັບພືດສິນຄ້າທີ່ເປັນທ່າແຮງຂອງແຂວງຄື: ຜົນຜະລິດກາເຟທຽບໃສ່ໄລຍະດຽວເພີ່ມຂຶ້ນ 40%, ຢາງພາລາທຽບໃສ່ໄລຍະດຽວ ເພີ່ມຂຶ້ນ 2,8 ເທື່ອ, ທຽບໃສ່ແຜນເພີ້ມຂຶ້ນ 41%, ນອກນັ້ນຍັງມີໝາກມ່ວງຫິນມະພານ, ຊາຕົ້ມນໍ້າ, ໝາກແໜ່ງ... ແລະພືດເສດຖະກິດໃໝ່ທີ່ເຫັນວ່າກໍາລັງມີ ການຂະຫຍາຍຕົວຈໍານວນໜຶ່ງ ເຊັ່ນ: ໝາກນ໋ອດ, ໝາກຖົ່ວລຽນ, ໝາກມີ້, ໝາກອາໂວກາໂດ ແລະ ອື່ນໆ.

ທ່ານ ບົວລີ ເພັດສົງຄາມ ກ່າວອີກວ່າ: ຈາກຜົນສຳເລັດດັ່ງກ່າວໄດ້ປະກອບສ່ວນເຮັດໃຫ້ການຜະລິດສະບຽງອາຫານໄດ້ພຽງພໍໃນການສະໜອງແກ່ການບໍລິໂພກ, ການສົ່ງເສີມການຜະລິດເປັນສິນຄ້າມີການຂະຫຍາຍຕົວ, ມີສ່ວນສົ່ງອອກໄປຕ່າງປະເທດນັບມື້ນັບຫຼາຍຂຶ້ນ,ຊຶ່ງໄດ້ປະກອບສ່ວນໃນການແກ້ໄຂຄວາມທຸກຍາກຂອງປະຊາຊົນ, ເຮັດໃຫ້ຊີວິດການເປັນຢູ່ຂອງເຂົາເຈົ້າໄດ້ຮັບການປັບປຸງດີຂຶ້ນເທື່ອລະກ້າວ.

แชร์