ກຽມຈັດອຸດສາຫະກຳປຸງແຕ່ງອາຫານນາໆຊາດ

  ເມື່ອວັນທີ 20 ກຸມພາ ກົມສົ່ງການຄ້າກະຊວງອຸດສາຫະກໍາ ແລະການຄ້າຮ່ວມກັບບໍລິສັດ ເດີພັດໂປຣເຈັກ ຈໍາກັດ (The Plus Project Ltd) ໄດ້ຈັດພິທີຖະແຫຼງຂ່າວ ເພື່ອກຽມຈັດງານມະຫະກໍາອຸດສະຫະກໍາປຸງແຕ່ງອາຫານນາໆຊາດຄັ້ງທີ 1 ປະຈໍາປີ 2019 ຫຼື The 1st Lao international Food Expo 2019 (LIFE) ໂດຍການເຂົ້າຮ່ວມຂອງທ່ານ ພັນທອງ ພິດທຸມມາ ຮອງລັດຖະມົນຕີກະຊວງອຸດສາຫະກໍາ ແລະການຄ້າ ທ່ານ ສີບຸນທໍາ ສີບຸນມີ ຜູ້ອໍານວຍການໃຫຍ່ບໍລິສັດລາວເວີນ ມະຫາຊົນ, ມີຫົວໜ້າກົມສົ່ງເສີມການຄ້າ, ບໍລິສັດ ເດີພັດໂປຣເຈັກ ຈໍາກັດ ແລະພາກສ່ວນກ່ຽວຂ້ອງ.

  ທ່ານ ໄຊສົມເພັດ ນໍຣະສິງຫ໌ ຮັກສາການຫົວໜ້າກົມສົ່ງເສີມການຄ້າກ່າວວ່າ: ງານຄັ້ງນີ້ຈັດຂຶ້ນເປັນຄັ້ງທໍາອິດເປັນງານວາງສະແດງລະດັບຊາດ ແລະ ພາກພື້ນເພື່ອຍົກລະດັບສິນຄ້າ ທັງເປັນ ການຜັນຂະຫຍາຍແຜນພັດທະນາເສດ ຖະກິດ-ສັງຄົມຂອງລັດຖະບານວາງ ອອກ ໂດຍເນັ້ນການສົ່ງເສີມສິນຄ້າທີ່ຕິດ ພັນໃນໝວດສິນຄ້າກະສິກໍາປຸງແຕ່ງ ເພື່ອສົ່ງອອກ ແລະສິນຄ້າທ່າແຮງເຊັ່ນ: ຊາ, ກາເຟ, ເຂົ້າ ແລະອື່ນໆ. ທັງນີ້ກໍເພື່ອສ້າງເວທີໃຫ້ຜູ້ປະກອບການພາຍໃນ ແລະຕ່າງປະເທດ ໄດ້ໂຄສະນາສິນຄ້າ ແລະແລກປ່ຽນການຜະລິດກະສິກໍາປຸງ ແຕ່ງຂອງຕົນລວມເຖິງເຄື່ອງມືຮັບໃຊ້ການຜະລິດຂັ້ນທ້ອງຖິ່ນ ແລະຕ່າງປະເທດ ເພື່ອໃຫ້ສັງຄົມ ແລະຜູ້ເຂົ້າຮ່ວມໄດ້ຮັບຮູ້ ແລະກ້າວໄປເຖິງການສ້າງໂອກາດໃຫ້ຜູ້ປະກອບການສາມາດຈັບຄູ່ຮ່ວມມືການຄ້ານໍາອີກ.

  ທ່ານ ສຸກນິກອນ ລາດຊະວົງ ປະທານບໍລິສັດ ເດີພັດໂປຣເຈັກ ຈໍາກັດ ກ່າວວ່າ: ງານຄັ້ງນີ້ຈະໄດ້ຈັດຂຶ້ນໃນລະ ຫວ່າງວັນທີ 15-19 ມີນາ ທີ່ສູນການຄ້າ ລາວ-ໄອເຕັກ ນະຄອນຫຼວງວຽງຈັນ, ໂດຍພາຍໃນງານຈະປະກອບດ້ວຍງານ ວາງສະແດງ ແລະຈໍາໜ່າຍຜະລິດຕະພັນລາວ, ສິນຄ້າກະສິກໍາປຸງແຕ່ງ, ເຄື່ອງ ອຸປະໂພກ ແລະບໍລິໂພກ, ເຄື່ອງມືຮັບໃຊ້ການຜະລິດ, ເຄື່ອງອຸດສາຫະກໍາກົງຈັກ ໜັກ, ການແຂ່ງຂັນກິນອາຫານ, ວິທີ ສອນເຮັດຂະໜົມ, ຊິມອາຫານລາວກັບເຂົ້າໜ້ຽວ, ງານສໍາມະນາດ້ານວິຊາການ, ການສະແດງສີລະປະວັດທະນະທໍາ, ແລະກິດຈະກໍາອື່ນໆ, ຊຶ່ງຄາດວ່າຈະມີຜູ້ເຂົ້າຮ່ວມທັງໝົດ 30 ພັນຄົນ ແລະມີຫ້ອງວາງສະແດງສິນຄ້າທັງໝົດ 360 ຫ້ອງຈາກຜູ້ປະກອບການທັງພາຍໃນ ແລະ ຕ່າງປະເທດ.

 ນສພ ເສດຖະກິດ-ສັງຄົມ

แชร์