ມູນຄ່າການຄ້າລາວກັບຕ່າງຊາດເດືອນກັນຍາບັນລຸ 760 ລ້ານໂດລາ

   ມູນຄ່າການນໍາເຂົ້າ ແລະສົ່ງອອກຂອງ ສປປ ລາວ ປະຈໍາເດືອນກັນຍາ 2020 ບັນລຸໄດ້ປະມານ 760 ລ້ານໂດລາ ຫຼຸດລົງເລັກໜ້ອຍເມື່ອທຽບໃສ່ເດືອນກ່ອນທີ່ມີປະມານ 762 ລ້ານໂດລາ ໃນນັ້ນການສົ່ງອອກປະມານ 354 ລ້ານໂດລາ ແລະອີກປະມານ 405 ລ້ານໂດລາ ແມ່ນມູນຄ່າການນໍາເຂົ້າຂະນະທີ່ຕົວເລກຂາດດຸນການຄ້າມີປະມານ 50 ລ້ານໂດລາ.

   ສູນຂໍ້ມູນຂ່າວສານທາງການຄ້າຂອງ ສປປ ລາວ ເປີດເຜີຍໃຫ້ຮູ້ວ່າ: ສິນຄ້າສົ່ງອອກຫຼັກປະກອບມີແຮ່ທອງມູນຄ່າປະມານ 33 ລ້ານໂດລາ, ໝາກກ້ວຍ 22 ລ້ານໂດລາ, ເຍື່ອໄມ້ ແລະເສດເຈ້ຍມູນຄ່າປະມານ 25 ລ້ານໂດລາ, ໂຄງຮ່າງ (ຊີ້ນສ່ວນກ້ອງບັນທຶກພາບ) ມູນຄ່າປະມານ 16 ລ້ານໂດລາ, ຄຳປະສົມ (ຄຳແທ່ງ) ມູນຄ່າປະມານ 49 ລ້ານໂດລາ, ເຄື່ອງນຸ່ງຫົ່ມມູນຄ່າປະມານ 17 ລ້ານໂດລາ, ເຄື່ອງໃຊ້ໄຟຟ້າ ແລະອຸປະກອນເຄື່ອງໃຊ້ໄຟຟ້າມູນຄ່າປະມານ 12 ລ້ານໂດລາ,ຢາງພາລາມູນ ຄ່າປະມານ 39 ລ້ານໂດລາ ແລະສາລີມີມູນຄ່າປະມານ 3 ລ້ານໂດລາ.

  ສິນຄ້ານໍາເຂົ້າສ່ວນຫຼາຍແມ່ນຈຳພວກພາຫະນະທາງບົກ (ນອກຈາກ ລົດຈັກ, ລົດໄຖ) ມີມູນຄ່າປະມານ 29 ລ້ານໂດລາ, ເຄື່ອງໄຟຟ້າ ແລະອຸປະກອນໄຟຟ້າມີມູນ ຄ່າປະມານ 16 ລ້ານໂດລາ, ນໍ້າມັນກາຊວນມີມູນຄ່າປະມານ 23 ລ້ານໂດລາ, ອຸປະກອນກົນຈັກ (ນອກຈາກເຄື່ອງກົນຈັກພາຫະນະ) ມີມູນຄ່າປະມານ 29 ລ້ານໂດລາ, ເຫຼັກ(ເຄື່ອງ ທີ່ເຮັດດ້ວຍເຫຼັກ, ເຫຼັກກ້າ) ມີມູນຄ່າ ປະມານ 23 ລ້ານໂດລາສະຫະລັດ, ຊີ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້...) ມີມູນຄ່າປະມານ 17 ລ້ານໂດລາ, ນໍ້າມັນແອັດຊັງ (ແອັດຊັງພິເສດ) ມີມູນຄ່າປະມານ 7 ລ້ານໂດລາ, ເຫຼັກເສັ້ນ ແລະເຫຼັກຮູບປະພັນຕ່າງໆມີມູນຄ່າປະມານ 10 ລ້ານໂດລາ, ເຄື່ອງ ໃຊ້ທີ່ເຮັດດ້ວຍພລາສະຕິກມີມູນຄ່າປະມານ 13 ລ້ານໂດລາ, ຝຸ່ນ(ປຸ໋ຍ) ມີມູນຄ່າປະມານ 7 ລ້ານໂດລາ.

  ບັນດາປະເທດທີ່ລາວສົ່ງອອກຫຼັກມີຈີນ 142 ລ້ານໂດລາ, ຫວຽດນາມ 74 ລ້ານໂດລາ, ໄທ 63 ລ້ານໂດລາ, ອິນເດຍ 12 ລ້ານໂດລາແລະຍີ່ປຸ່ນ 9 ລ້ານໂດລາຂະ ນະທີ່ນຳເຂົ້າແມ່ນມາຈາກໄທ 215 ລ້ານໂດລາ, ຈີນ 95 ລ້ານໂດລາ, ຫວຽດນາມ 59 ລ້ານໂດລາ, ຢີ່ປຸ່ນ 8 ລ້ານໂດລາ.

   ສູນຂໍ້ມູນຂ່າວສານທາງການຄ້າຂອງ ສປປ ລາວ ເປີດເຜີຍໃຫ້ຮູ້ຕື່ມວ່າ: ມູນຄ່າການນໍາເຂົ້າ ແລະສົ່ງອອກທັງໝົດຂອງລາວປະຈໍາເດືອນກັນຍານີ້ແມ່ນຍັງບໍ່ກວມເອົາມູນຄ່າການສົ່ງອອກໄຟຟ້າ.

แชร์