ທຽວຍາກທາງຈາກເມືອງເຟືອງຫາເມືອງໝື່ນ

   ໄລຍະເດືອນກັນຍາ-ຕຸລາຜ່ານມານີ້ຝົນໄດ້ຕົກຢ່າງຕໍ່ເນື່ອງເຮັດໃຫ້ນຖ້ວມຂັງ, ດິນເຈື່ອນທາງເປັນບວກເປັນຂຸມ ແລະເປເພຫຼາຍເສັ້ນໂດຍສະເພາະແມ່ນເມືອງເຟືອງຫາເມືອງໝື່ນ ແຂວງວຽງຈັນ ຕາມເສັ້ນທາງຫຼວງຂອງເມືອງ (ເສັ້ນທາງ 4501) ຂົວບາງຈຸດເກີດເປ່ເພຍ້ອນເປັນຂົວເຫຼັກປະສົມໄມ້, ຂົວເກົ່າ ແລະຢູ່ໃນຊ່ວງໄລຍະການສ້ອມແປງເສັ້ນທາງຂອງບໍລິສັດທີ່ໄດ້ຮັບເໝົາກໍ່ສ້າງຫຼ້າຊ້າຍ້ອນຝົນຕົກຢ່າງຕໍ່ເນື່ອງ.

   ດັ່ງເຫດການທີ່ເກີດຂື້ນວັນທີ 31 ຕຸລາ ຜ່ານມາໄດ້ມີລົດບັນທຸກຢາງພາລາມີນໍ້າໜັກເກີນ 8 ໂຕນຕາມທີ່ທາງຫ້ອງການໂຍທາທິການ ແລະຂົນສົ່ງໄດ້ກຳນົດໄວ້ໄດ້ໄຕ່ຂົວມາແຕ່ເມືອງໝື່ນຈຸດຂົວບ້ານປາກຮາງເມືອງເຟືອງເຮັດໃຫ້ໄມ້ຂົວຫຼຸດອອກສະນັ້ນລົດດັ່ງກ່າວຈຶ່ງຄາຢູ່ກາງຂົວ້ການສັນຈອນໄປມາໃນມື້ນັ້ນຫຍຸ້ງຍາກລົດທີ່ຈະຜ່ານໄປມາຈຳເປັນຕ້ອງໄດ້ໄປທາງເວັ້ນ, ຈາກເຫດການດັ່ງກ່າວທາງການນຳເມືອງເຟືອງກໍ່ຄືທ່ານເຈົ້າເມືອງໆເຟືອງກໍ່ໄດ້ລົງກວດກາເຫດການຕົວຈິງພ້ອມທັງໄດ້ແນະນຳໃຫ້ຫ້ອງການທີ່ ກ່ຽວຂ້ອງລົງແກ້ໄຂນຳລົດດັ່ງກ່າວອອກພ້ອມທັງຫາວິທີສ້ອມແປງຂົວ.

   ຕາມການລາຍງານຂອງຫົວໜ້າຫ້ອງການໂຍທາທິການເມືອງເຟືອງທາງຄະນະຫ້ອງການໄດ້ມີການຄົ້ນຄວ້າ ແລະປຶກສາຫາລືກະກຽມວັດຖຸ, ອຸປະກອນ, ໄມ້ເພື່ອຈະໄດ້ສ້ອມແປງຂົວທີ່ເປ່ເພຄາດໝາຍໃຫ້ສຳເລັດພາຍໃນຕົ້ນເດືອນພະຈິກ 2020 ນີ້ສະນັ້ນໄລຍະນີ້ກໍ່ຂໍຮຽກຮ້ອງມາຍັງພໍ່ແມ່ປະຊາຊົນ, ນັກທຸລະກິດທຸກຊັ້ນຄົນທີ່ເດີນທາງໄປມາໃນຈຸດຂົວດັ່ງກ່າວຈົ່ງມີຄວາມລະມັດລະວັງພ້ອມກັນປະຕິບັດຕາມກົດຈະລາຈອນ, ປະຕິບັດຕາມຂໍ້ກຳນົດຂອງຫ້ອງການໂຍທາທິການແລະຂົນສົ່ງວາງອອກກໍ່ຄືມີປ້າຍທີ່ໄດ້ຕິດໄວ້ລົດບັນທຸກນໍ້າໜັກເກີນ 8 ໂຕນແມ່ນຫ້າມຜ່ານໃຫ້ໄປທາງເວັ້ນ.

ຂ່າວ: ເມືອງເຟືອງ

ຮູບພາບ: ໜັງສືພິມເສດຖະກິດ-ສັງຄົມ

แชร์