ສທໜ ຫຼວງພະບາງເປັນສ່ວນໜຶ່ງສ້າງວຽກໃຫ້ປະຊາຊົນ

   ສະມາຄົມນັກທຸລະກິດໜຸ່ມ (ສທໜ) ແຂວງຫຼວງພະບາງເປັນໜຶ່ງສະມາຄົມທີ່ເຮັດທຸລະກິດຫຼາຍປະເພດແຕກຕ່າງກັນໄປຕາມແນວທາງນະໂຍບາຍຂອງພັກ ແລະລັດຖະບານເປັນຕົ້ນແມ່ນທຸລະກິດການບໍລິການໆທ່ອງທ່ຽວ, ອຸດສາຫະກໍາຂະໜາດນ້ອຍ, ກາງເຊິ່ງສາມາດສ້າງວຽກເຮັດງານທໍາໃຫ້ກັບປະຊາຊົນອ້ອມຂ້າງທີ່ອາໄສຢູ່ໃກ້ຄຽງກັບທຸລະກິດດັ່ງກ່າວນັບຫຼາຍພັນຄົນອັນໄດ້ສ້າງລາຍຮັບທີ່ດີ, ເຮັດໃຫ້ຊີວິດການເປັນຢູ່ຂອງປະຊາຊົນຄ່ອຍດີຂຶ້ນໄປເທື່ອລະກ້າວ.

   ທ່ານ ຄັດຕະພອນ ພົມມະປັນຍາ ອາດີດປະທານສະມາຄົມນັກທຸລະກິດໜຸ່ມ ແຂວງຫຼວງພະບາງ ໄດ້ລາຍງານໃຫ້ຮູ້ໃນໂອກາດດຳເນີນກອງປະຊຸມໃຫຍ່ຂອງຕົນເມື່ອບໍ່ດົນມານີ້ໃຫ້ຮູ້ວ່າ: ຕະຫຼອດໄລຍະ 5 ປີ ຜ່ານມາສະມາຄົມນັກທຸລະກິດໜຸ່ມແຂວງໄດ້ສຸ່ມໃສ່ຢ່າງຕັ້ງໜ້າໃນການຈັດຕັ້ງປະຕິບັດພາລະບົດບາດ, ສິດ ແລະໜ້າທີ່ຂອງຕົນດ້ວຍຄວາມຜິດຊອບສູງຕາມທິດຊີ້ນຳ-ນຳພາຂອງພັກ ແລະ ລັດຖະບານໂດຍສະເພາະແມ່ນການນຳແຂວງຫຼວງພະບາງເພື່ອສ້າງທຸກເງື່ອນໄຂໃນການພັດທະນາຫົວໜ່ວຍທຸລະກິດພາຍໃນແຂວງໃຫ້ມີຄວາມເຂັ້ມແຂງໂດຍສະເພາະແມ່ນການພັດທະນາດ້ານການລົງທຶນ ແລະສ້າງວຽກເຮັດງານທຳຂອງປະຊາຊົນ.

 ປະຈຸບັນສະມາຄົມທຸລະກິດໜຸ່ມແຂວງໄດ້ກາຍເປັນອົງປະກອບທີ່ສຳຄັນໃນການຂັບເຄື່ອນເສດຖະກິດຂອງແຂວງໃຫ້ມີການຂະຫຍາຍຕົວຢ່າງຕໍ່ເນື່ອງອີງໃສ່ບົດລາຍການເມືອງຕໍ່ກອງປະຊຸມໃຫຍ່ຄັ້ງທີ 8 ອົງຄະນະພັກແຂວງຫຼວງພະບາງແລ້ວເຫັນວ່າການລົງທຶນພາກເອກະຊົນສູງເຖິງ 69% ຂອງການລົງທຶນທັງໝົດໂດຍປະຈຸບັນທົ່ວແຂວງມີຫຼາຍກວ່າ 54 ຫົວໜ່ວຍທຸລະກິດທີ່ເປັນສະມາຊິກສະມາຄົມນັກທຸລະກິດໜຸ່ມມີຍອດການລົງທຶນທັງໝົດ 80 ລ້ານໂດລາ ກໍາລັງເຄື່ອນໄຫວຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ ຂອງແຂວງຫຼວງພະບາງ ແລະກາຍເປັນກຳລັງແຮງອັນສຳຄັນໃນການປະກອບສ່ວນສ້າງວຽກເຮັດງານທຳທີ່ໝັ້ນຄົງໃຫ້ກັບປະຊາ ຊົນບັນດາເຜົ່າ ແລະຊາວໜຸ່ມຍິງ-ຊາຍ ຢູ່ພາຍໃນແຂວງຫຼວງພະບາງໄດ້ຫຼາຍກວ່າ 1 ພັນຄົນ.

   ໄປຄຽງຄູ່ກັບການສ້າງວຽກເຮັດງານທໍາໃຫ້ກັບປະຊາຊົນແລ້ວສິນຄ້າຫຼືຜະລິດຕະພັນຕ່າງໆທີ່ທາງ ສທໜ ແຂວງຜະລິດອອກຮັບໃຊ້ສັງຄົມແມ່ນໄດ້ຮັບຄຸນນະພາບມາດຕະຖານທຽບເທົ່າກັບສາກົນ ແລະມີຫຼາຍທ່ານທີ່ໄດ້ຮັບລາງວັນລະດັບອາຊຽນຊຶ່ງເປັນຄວາມພາກພູມໃຈອີກຢ່າງໜຶ່ງທີ່ ສທໜ ແຂວງຫຼວງພະບາງເຮັດໄດ້.

   ທ່ານ ຄັດຕະພອນ ພົມມະປັນຍາ ຍັງກ່າວຕື່ມອີກວ່າ: ສຳລັບແຜນການຕໍ່ໜ້າສະມາຄົມນັກທຸລະກິດໜຸ່ມແຂວງຈະສູ້ຊົນພັດທະນາວົງການທຸລະກິດໜຸ່ມໃຫ້ມີຄວາມເຂັ້ມແຂງເຕີບໂຕຢ່າງຕໍ່ເນື່ອງ ແລະ ກາຍເປັນກຳລັງແຮງອັນສໍາໃນການສ້າງສາພັດທະນາປະເທດຊາດກໍຄືພັດທະນາແຂວງຫຼວງພະບາງຕາມແນວທາງປ່ຽນແປງໃໝ່, ເຮັດທຸກເງື່ອນໄຂໃນການປະກອບສ່ວນສ້າງວຽກເຮັດງານທຳໃຫ້ກັບປະຊາຊົນບັນດາເຜົ່າໄດ້ມີວຽກເຮັດງານທໍາປະກອບອາຊີບນໍາ ສທໜ ທີ່ໝັ້ນຄົງ ແລະມີລາຍຮັບທີ່ດີ.

 

----------------

ຂຽນໂດຍ: ສີສຸວັນ. ຮູບພາບ: ໜັງສືພິມເສດຖະກິດ-ສັງຄົມ

แชร์