ອົງກອນບໍ່ສະແຫວງຫາຜົນກຳໄລເຊື່ອມຊຶມວຽກຕ້ານຟອກເງິນ

 ສຳນັກງານຂໍ້ມູນຕ້ານການຟອກເງິນທະນາຄານແຫ່ງ ສປປ ລາວ ຮ່ວມກັບກົມພັດທະນາການບໍລິຫານລັດກະຊວງພາຍໃນໄດ້ຈັດຕັ້ງການເຜີຍແຜ່ ແລະເຊື່ອມຊຶມວຽກ ງານຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍໃຫ້ກັບອົງກອນບໍ່ສະແຫວງຫາຜົນກຳໄລ (NPO) ຊຶ່ງມີບັນດາສະມາຄົມ,ບັນດາມູນນິທິ ແລະພາກສ່ວນກ່ຽວຂ້ອງເຂົ້າຮ່ວມໂດຍການເປັນປະທານຂອງ ທ່ານ ນາງ ຂັນທະລີ ວົງໄຊຍະລາດ ຮອງຫົວໜ້າສໍານັກງານຂໍ້ມູນຕ້ານການຟອກເງິນຊຶ່ງຈັດຂຶ້ນໃນວັນທີ 30 ຕຸລາ 2020 ທີ່ຫ້ອງປະຊຸມສະຖາບັນການທະນາຄານນະຄອນຫຼວງວຽງຈັນ.

   ການເຜີຍແຜ່ໃນຄັ້ງນີ້ກໍ່ເພື່ອເຮັດໃຫ້ບັນດາສະມາຄົມ ແລະບັນດາມຸນນິທິໄດ້ມີຄວາມຮັບຮູ້ ແລະເຂົ້າໃຈຢ່າງເລິກເຊິ່ງກ່ຽວກັບການຈັດຕັ້ງປະຕິບັດວຽກງານຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ; ການປະເມີນຄວາມສ່ຽງຕາມຫຼັກການບໍລິຫານຄວາມສ່ຽງ (RBA) ດ້ານການຟອກເງິນ ແລະ ການສະ ໜອງທຶນໃຫ້ແກ່ການກໍ່ການຮ້າຍ ແລະກົນໄກການປະສານງານລະຫວ່າງເຈົ້າໜ້າທີ່ກັບອົງການບໍ່ຫວັງຜົນກໍາໄລ; ທັງເປັນການສ້າງຄວາມເຂົ້າໃຈແລະການໃຫ້ຄວາມຮ່ວມມືຈາກອົງການຄຸ້ມຄອງກໍ່ຄືກົມພັດທະນາການບໍລິຫານລັດກະຊວງພາຍໃນ ແລະ ຕາງໜ້າອົງການບໍ່ຫວັງຜົນກໍາໄລມີຄວາມເຂົ້າໃຈໂດຍພື້ນຖານໃນວຽກງານດັ່ງກ່າວ ແລະເນັ້ນໃຫ້ບັນດາສະມາຄົມ ແລະມູນນິທິໄດ້ສະໜອງຂໍ້ມູນເພື່ອນໍາໄປເຮັດການປະເມີນຕາມຫຼັກການບໍລິຫານຄວາມສ່ຽງ.

  ວຽກງານຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍເປັນວຽກງານທີ່ມີຄວາມສໍາຄັນຕໍ່ສະພາບການດໍາເນີນເສດຖະກິດໃນປະເທດ; ສປປ     ລາວ ກໍ່ຄືລັດຖະບານເຮົາໄດ້ໃຫ້ຄວາມສໍາຄັນໃນວຽກງານດັ່ງກ່າວໂດຍໄດ້ສ້າງຕັ້ງຄະນະກໍາມະການລະດັບຊາດຂຶ້ນໂດຍປະກອບມີຮອງນາຍົກລັດຖະມົນຕີເປັນປະທານ; ນອກນີ້, ປະກອບມີບັນດາລັດຖະມົນຕີ-ຮອງລັດຖະມົນຕີຈາກ 13 ກະຊວງ/ທຽບເທົ່າເຂົ້າຮ່ວມໃນຄະນະແນໃສ່ຈັດຕັ້ງປະຕິບັດວຽກງານດັ່ງກ່າວບົນພື້ນຖານເງື່ອນໄຂ 40 ຂໍ້ແນະນໍາຂອງສາກົນທີ່ ສປປ ລາວ ເປັນພາຄີ.

 ໃນໄລຍະຜ່ານມາ ສປປ ລາວ ໄດ້ຮັບການປະເມີນຜົນຮອບດ້ານຄັ້ງທໍາອິດໃນປີ 2010 ຊຶ່ງຜົນການປະເມີນໃນຄັ້ງນັ້ນ ສປປ ລາວ ຕົກຢູ່ໃນບັນຊີເທົາເຮັດໃຫ້ ສປປ ລາວພົບຄວາມຫຍຸ້ງຍາກຫຼາຍດ້ານ. ເຖິງຢ່າງໃດກໍດີ, ສປປ ລາວ ໄດ້ສູ້ຊົນ, ປັບປຸງແກ້ໄຂຂໍ້ຄົງຄ້າງຕ່າງໆໂດຍໄດ້ອອກບັນດານິຕິກໍາທີ່ຕິດພັນຈໍານວນ 24 ສະບັບ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານຕ້ານການຟອກເງິນໃຫ້ສອດຄ່ອງຕາມມາດຖານສາກົນ, ສ້າງກົນໄກ ແລະຂັ້ນຕອນຕ່າງໆ ເພື່ອນໍາໄປປະຕິບັດໃຫ້ເກີດປະສິດທິຜົນຕາມນິຕິກໍາທີ່ວາງອອກໄດ້ຈໍານວນໜຶ່ງຈຶ່ງເຮັດໃຫ້ ສປປ ລາວ ສາມາດອອກຈາກບັນຊີເທົາຂອງສາກົນໃນປີ 2017. ຫຼັງຈາກນັ້ນ, ກໍ່ໄດ້ມີການດໍາເນີນການປະເມີນຄວາມສ່ຽງລະດັບຊາດຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍສໍາເລັດໃນກາງປີ 2018 ຊຶ່ງສາມາດກໍານົດໄດ້ໄພຂົ່ມຂູ່ຂອງການຟອກເງິນ,  ຂະແໜງການທຸລະກິດທີ່ມີຄວາມສ່ຽງຈະຖືກສວຍໃຊ້ໃນຂະບວນການຟອກເງິນ ແລະ ເລັ່ງແກ້ໄຂຂໍ້ຄົງຄ້າງທີ່ໄດ້ຈາກຜົນການປະເມີນເພື່ອປັບປຸງປະສິດທິພາບຂອງ ການຈັດຕັ້ງປະຕິບັດວຽກງານດັ່ງກ່າວໃຫ້ສອດຄ່ອງ ແລະຮັບປະກັນໄດ້ຕາມມາດຖານສາກົນຍິ່ງຂຶ້ນ.

 ເພື່ອກະກຽມການປະເມີນຜົນຮອບດ້ານຄັ້ງທີ 2 ໃນສົກປີ 2020-2021, ລັດຖະບານໄດ້ສ້າງຕັ້ງຄະນະສະເພາະກິດຂຶ້ນໂດຍມີຮອງນາຍົກລັດຖະມົນຕີ, ລັດຖະມົນ ຕີ/ຮອງລັດຖະມົນຕີຈໍານວນ 25 ທ່ານ ປະກອບຢູ່ໃນຄະນະກໍາມະການ ແລະໄດ້ແບ່ງອອກເປັນ 4 ກຸ່ມ ວຽກຄື: ວຽກງານເຜີຍແຜ່ ແລະເຊື່ອມຊຶມ, ວຽກງານນິຕິກໍາ ແລະກົນໄກ, ວຽກງານຄຸ້ມຄອງ ແລະວຽກງານການດໍາເນີນຄະດີ. ໃນນັ້ນ, ສໍາລັບກຸ່ມວຽກງານເຜີຍແຜ່ ແລະເຊື່ອມຊຶມລວມມີຄະນະຜູ້ວ່າການທະນາຄານແຫ່ງ ສປປ ລາວ, ສໍານັກງານນາຍົກລັດຖະມົນຕີ, ກະຊວງການເງິນ, ກະຊວງຖະແຫຼງຂ່າວວັດທະນະທໍາ ແລະ ທ່ອງທ່ຽວ ແລະ ກົມກອງທີ່ກ່ຽວຂ້ອງປະກອບຢູ່ໃນຄະນະຊຶ່ງມີສໍານັກງານຂໍ້ມູນຕ້ານການຟອກເງິນເປັນກອງເລຂາທີ່ເຮັດວຽກໃນການປະສານງານ ແລະມາຮອດປະຈຸບັນ 4 ກຸ່ມ ວຽກດັ່ງກ່າວໄດ້ດຳເນີນການຕາມພາລະບົດບາດ, ໜ້າ ທີ່ຂອງຕົນຢ່າງເປັນເຈົ້າການ, ມີຄວາມຮັບຜິດຊອບສູງ ແລະມີຜົນຄືບໜ້າດີຂຶ້ນຕາມລຳດັບ; ສະນັ້ນ, ເພື່ອເພີ່ມທະວີວຽກງານດັ່ງກ່າວໃນລະດັບສູງມັນຈຶ່ງເລັ່ງທວງໃຫ້ອົງກອນບໍ່ສະແຫວງຫາຜົນກຳໄລ (NPO) ໂດຍມີບັນດາສະມາຄົມ ແລະບັນດາມຸນນິທິເຂົ້າຮ່ວມຢ່າງຂະຫຍັນຂັນແຂງໂດຍຕ້ອງສະໜອງຂໍ້ມູນຕົວຈິງກ່ຽວກັບວຽກ ງານຕ້ານການຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍທີ່ຕິດພັນກັບອົງກອນຫຼືໜ່ວຍງານຂອງຕົນໃຫ້ສໍານັກງານຂໍ້ມູນຕ້ານການຟອກເງິນ ແລະພາກສ່ວນກ່ຽວຂ້ອງຮັບຮູ້ໂດຍດ່ວນເພື່ອຈະໄດ້ນຳເອົາພວກ ຫຼືຜູ້ກະທຳຜິດເຂົ້າສູ່ຂະບວນການຍຸຕິທຳຕາມລະບຽບກົດໝາຍຂອງ ສປປ ລາວ.

-------------

ຂ່າວ: ຣັດສະໝີ ດວງສັດຈະ

ຮູບພາບ: ໜັງສືພິມເສດຖະກິດ-ສັງຄົມ

แชร์