ລັດກຳນົດເກືອບ 80 ໂຄງການ 7 ແຜນງານໃນແຜນຜັງໃໝ່ຕົວເມືອງນະຄອນຫຼວງວຽງຈັນ

  ແຜນຜັງລວມຕົວເມືອງ ນະຄອນຫຼວງວຽງຈັນ ສະບັບໃໝ່ຫຼ້າສຸດຊຶ່ງມີເນື້ອທີ່ 61,6 ພັນເຮັກຕາ ນອນໃນ 7 ເມືອງ ເພີ່ມຈາກສະບັບກ່ອນເຖິງ 3 ເທົ່າ ຫຼືກວມເອົາ 16% ຂອງນະຄອນຫຼວງວຽງຈັນ ທັງນີ້ໃນແຜນຜັງລວມດັ່ງກ່າວໄດ້ກຳນົດເອົາໂຄງການບູລິມະສິດທັງໝົດ 79 ໂຄງການປະກອບມີ 7 ແຜນງານພັດທະນາໃນອະນາ ຄົດ.

  ທ່ານ ບຸນຈັນ ສິນທະວົງ ລັດຖະມົນຕີ ກະຊວງໂຍທາທິການ ແລະຂົນສົ່ງໄດ້ລາຍງານກ່ຽວກັບການຄົ້ນຄວ້າ ແລະປັບປຸງແຜນຜັງລວມຕົວເມືອງນະຄອນຫຼວງວຽງຈັນ  ສະບັບທີ III ຕໍ່ກອງປະຊຸມສະພາເມື່ອວັນທີ 3 ພະຈິກຜ່ານມາຊຶ່ງໄດ້ຍົກໃຫ້ເຫັນບາງຕອນສໍາຄັນວ່າ: ແຜນຜັງລວມຕົວເມືອງນະຄອນຫຼວງວຽງຈັນ ສະບັບທີ I ໄດ້ ຖືກຮັບຮອງ ແລະປະກາດໃຊ້ຢ່າງເປັນທາງການໃນປີ 1991 ໂດຍມີເນື້ອທີ່ວາງ ແຜນ 9,3 ພັນເຮັກຕາ, ກວມເອົາ 100 ບ້ານໃນ 4 ເມືອງຄື: ເມືອງຈັນທະບູລີ, ສີສັດຕະນາກ, ໄຊເສດຖາ ແລະສີໂຄດຕະບອງ.

  ສ່ວນແຜນຜັງລວມຕົວເມືອງນະຄອນຫຼວງວຽງຈັນ ສະບັບທີ II ໄດ້ຖືກຮັບຮອງໃນປີ 2002 ໂດຍມີເນື້ອທີ່ວາງແຜນທັງໝົດ 20,25 ພັນເຮັກຕາ ລວມເອົາ 180 ບ້ານໂດຍມີການຂະຫຍາຍເນື້ອທີ່ຈາກເດີມໄປຮອດເສັ້ນທາງດົງໂດກ-ໜອງພະຍາ ການກໍານົດເຂດນໍາໃຊ້ທີ່ດິນແມ່ນຮັກສາຈໍານວນເຂດໄວ້ຄືເກົ່າແຕ່ຂະຫຍາຍເນື້ອທີ່ອອກເພີ່ມເຕີມແຕ່ໃນນັ້ນອັນພິເສດແມ່ນໄດ້ກໍານົດເອົາດອນຊິງຊູ້, ດອນຈັນ, ບຶງທາດຫຼວງ ແລະບັນດາບຶງທໍາມະຊາດຢູ່ໃນເຂດຕົວເມືອງເຊັ່ນ: ໜອງບ້ານບໍ່,ໜອງປີງ, ໜອງຫໍ້, ໜອງດ້ວງ, ໜອງຈັນ, ໜອງບອນ, ໜອງບົວໄໝ້, ໜອງຫຼຸບເປືອກ ແລະໜອງແວງເປັນເຂດສະຫງວນໂດຍຫ້າມບໍ່ໃຫ້ມີການປຸກສ້າງ.

  ຜ່ານການຈັດຕັ້ງປະຕິບັດແຜນຜັງລວມຕົວເມືອງນະຄອນຫຼວງວຽງຈັນຕາມສະບັບທີ I ແລະທີ II ເຫັນວ່າໄດ້ປະກອບສ່ວນຕໍ່ການພັດທະນາໂດຍລວມຂອງນະຄອນ ຫຼວງວຽງຈັນຢ່າງຮອບດ້ານ ແລະຕັ້ງໜ້າອັນໄດ້ເຮັດໃຫ້ໂຄງລ່າງພື້ນຖານທາງດ້ານເຕັກນິກ ແລະ ສັງຄົມຂອງຕົວເມືອງໄດ້ຮັບການປັບປຸງພັດທະນາຂຶ້ນຢ່າງເປັນຮູບປະທໍາຢ່າງໃດກໍ່ຕາມແຜນຜັງເມືອງທັງ 2 ສະບັບຜ່ານມາແມ່ນຍັງບໍ່ທັນຕອບສະໜອງໄດ້ກັບຄວາມຕ້ອງການຂອງຈັງຫວະການຂະຫຍາຍຕົວຂອງຕົວເມືອງເປັນຕົ້ນແມ່ນເພື່ອຮອງຮັບການເພີ່ມຂຶ້ນຢ່າງໄວຂອງປະຊາກອນອັນໄດ້ເຮັດໃຫ້ເກີດມີການກາຍເປັນຕົວເມືອງທີ່ແຜ່ລາມການຖົມຫ້ວຍໜອງຄອງບຶງທີ່ກໍ່ໃຫ້ເກີດນໍ້າອັ່ງ,ນໍ້າຂັງນໍ້າຖ້ວມຢູ່ຫຼາຍຈຸດ ແລະ ສະພາບການຊຸດໂຊມຂອງສະພາບແວດລ້ອມແມ່ນມີແນວໂນ້ມນັບມື້ນັບຮຸນແຮງຈາກການຕີລາຄາເຫັນວ່າບັນຫາເຫຼົ່ານີ້ມີການພົວພັນນໍາແຜນຜັງຕົວເມືອງສອງດ້ານຄື: ດ້ານວິທີການວາງແຜນຜັງ ແລະດ້ານການຈັດຕັ້ງປະຕິບັດແຜນຜັງ.

  ທ່ານ ບຸນຈັນ ສິນທະວົງ ກ່າວຕື່ວ່າ:  ສໍາລັບແຜນຜັງລວມຕົວເມືອງນະຄອນ ຫຼວງວຽງຈັນ ສະບັບທີ III ນີ້ໄດ້ສ້າງຂຶ້ນ ເພື່ອຮອງຮັບຕໍ່ສະພາບການຂະຫຍາຍຕົວ ຢ່າງວ່ອງໄວ ແລະຕໍ່ເນື່ອງທາງດ້ານ ເສດຖະກິດ-ສັງຄົມ ແລະຄວາມຮຽກຮ້ອງຕ້ອງການຂອງການນໍາໃຊ້ທີ່ດິນເພື່ອການພັດທະນາລວມເຖິງເພື່ອເປັນແນວທາງໃນການສຶບຕໍ່ແກ້ໄຂສະພາບບັນຫາຕ່າງໆ ທີ່ຖອດຖອນໄດ້ຈາກການຈັດຕັ້ງປະຕິບັດແຜນຜັງຕົວເມືອງສະບັບຜ່ານມາ ແລະເພື່ອໃຫ້ສອດຄ່ອງກັບວິໄສທັດການພັດທະນານະຄອນ ຫຼວງວຽງຈັນໃນໄລຍະໃໝ່.

  ການວາງແຜນຜັງແມ່ນຄອບຄຸມເອົາເນື້ອທີ່ຂອງເຂດວາງແຜນທັງໝົດ 61,6 ພັນເຮັກຕາເພີ່ມຂຶ້ນຈາກແຜນຜັງສະບັບທີສອງປະມານ 3 ເທົ່າ ໂດຍກວມເອົາ 288 ບ້ານທີ່ນອນຢູ່ໃນເມືອງຈັນທະບູລີ, ສີສັດຕະນາກ ແລະສ່ວນໜຶ່ງຂອງເມືອງ ສີໂຄດຕະບອງ, ໄຊເສດຖາ, ຫາດຊາຍຟອງ, ນາຊາຍທອງ ແລະເມືອງໄຊທານີ ຫຼືມີເນື້ອທີ່ກວມເອົາ 16% ໃນເນື້ອທີ່ທັງໝົດຂອງນະຄອນຫຼວງວຽງຈັນ.

 ສ່ວນດ້ານເນື້ອໃນສະເພາະເຊັ່ນ: ດ້ານການແບ່ງເຂດນໍາໃຊ້ທີ່ດິນໂຄງຕາໜ່າງຖະໜົນ ແລະລະບົບລະບາຍນໍ້າແມ່ນໄດ້ສືບຕໍ່ປັບປຸງລະບົບທີ່ໄດ້ວາງແຜນໃນສະບັບກ່ອນໆອີງຕາມສະພາບຄວາມເປັນຈິງຂອງກໍາມະສິດທີ່ດິນໃນນີ້ເພື່ອເປັນເຮັດໃຫ້ການຈັດຕັ້ງປະຕິບັດຕົວຈິງມີຈຸດສຸມ ແລະ ບັນລຸໄດ້ຕາມເປົ້າໝາຍໂດຍແຜນຜັງລວມສະບັບໃໝ່ນີ້ໄດ້ກໍານົດໂຄງການບຸລິມະສິດທັງໝົດ 79 ໂຄງການປະກອບມີ 7 ແຜນງານ.

แชร์