ທຄຕລ ແຂ່ງຂັນຄວາມຮູ້ການນຳໃຊ້ BCEL One

 ເນື່ອງໃນວັນຫັນເປັນທຸລະກິດຂອງທະນາຄານການຄ້າຕ່າງປະເທດລາວມະຫາຊົນ (ທຄຕລ) ຄົບຮອບ 31 ປີ; ທຄຕລໄດ້ຈັດການແຂ່ງຂັນ BCEL One Super User Contest ໃນວັນທີ 1 ພະຈິກ 2020 ທີ່ຫໍວັດທະນະທໍາແຫ່ງຊາດລາວນະຄອນຫຼວງວຽງຈັນໂດຍການເຂົ້າຮ່ວມຂອງທ່ານນາງ ລໍາມອນ ສິມມະໄລວົງຮອງກົມຄຸ້ມຄອງລະບົບບຊໍາລະສະສາງ, ທະນາຄານແຫ່ງ ສປປ ລາວ; ທ່ານ ນັນທະລາດ ແກ້ວປະເສີດ ຮອງຜູ້ອຳນວຍການໃຫຍ່ ທຄຕລ, ຄະນະຜູ້ບໍລິຫານ, ພະນັກງານ ທຄຕລ, ຜູ້ເຂົ້າຮ່ວມແຂ່ງຂັນ, ກອງຊົມ-ກອງເຊຍ ແລະມວນຊົນເຂົ້າຮ່ວມເປັນຈຳນວນຫຼວງຫຼາຍ.

ກ່ຽວກັບ BCEL One ເປັນ ຜະລິດຕະພັນການບໍລິການທະນາຄານເທິງມືຖື ຫຼື Mobile Ban king ຂອງ ທຄຕລ ໄດ້ເລີ່ມໃຫ້ບໍລິການນັບແຕ່ປີ 2013 ແລະໄດ້ມີການພັດທະນາປັບປຸງລະບົບມາແລ້ວ 3 versions ຊຶ່ງໄດ້ອໍານວຍຄວາມສະດວກສະບາຍໃຫ້ແກ່ລູກຄ້າໃນການຊໍາລະສະສາງທຸລະກຳທາງດ້ານການເງິນຜ່ານແອັບ BCEL One ທີ່ມີຄວາມສະດວກວ່ອງໄວປອດໄພ ແລະສາມາດກວດສອບໄດ້.

 ການຈັດການແຂ່ງຂັນ BCEL One Super User Contest ໃນຄັ້ງນີ້ເປັນຄັ້ງທຳອິດຊຶ່ງເປັນການສ້າງກິດຈະກຳໃຫ້ແກ່ລູກຄ້າຂອງ ທຄຕລ ໄດ້ມີສ່ວນຮ່ວມເຂົ້າໃນການແຂ່ງຂັນທົດສອບຄວາມຮູ້ກ່ຽວກັບການນຳໃຊ້ຜະລິດຕະພັນ BCEL One ຂອງ ທຄຕລ ຊຶ່ງ ເປັນຜະລິດຕະພັນທີ່ມີການພັດທະນາ ແລະປັບປຸງຟັງຊັນການນຳໃຊ້ຂຶ້ນມາໃໝ່ເລື້ອຍໆເພື່ອໃຫ້ລູກຄ້າໄດ້ເຂົ້າຮ່ວມຊີງລາງວັນທີ່ມູນຄ່າຫຼາຍກວ່າ 70 ລ້ານກີບ ແລະໄດ້ເຊັນສັນຍາເປັນ Brand Am bassador ຜະລິດຕະພັນ BCEL One ຂອງ ທຄຕລ ອີກດ້ວຍ, ໂຄງການແຂ່ງຂັນດັ່ງກ່າວໄດ້ເລີ່ມເປີດໃຫ້ລົງທະບຽນສອບເສັງນັບແຕ່ຕົ້ນເດືອນມິຖຸນາຈົນເຖິງທ້າຍເດືອນສິງຫາ ປີ 2020 ໂດຍມີຜູ້ລົງທະບຽນສອບເສັງທັງໝົດຫຼາຍ ກວ່າ 12 ພັນຄົນ ແລະໄດ້ສໍາເລັດການສອບເສັງອອນລາຍຄັ້ງທີ 1 ໃນໄລຍະວັນທີ 14 ກັນຍາ 2020 ວັນທີ 11 ຕຸລາ 2020 ໂດຍແບ່ງອອກເປັນ 4 ງວດ ແລະສາມາດຄັດເລືອກເອົານັກສອບເສັງ 100 ຄົນທີ່ສາມາດສອບເສັງໄດ້ຄະແນນສູງ ແລະຮັກສາເວລາໃນການສອບເສັງໄດ້ດີເພື່ອສືບຕໍ່ດໍາເນີນການຄັດເລືອກສອບເສັງອອນລາຍລາຍຄັ້ງທີ 2 ໃນວັນທີ 17 ຕຸລາ 2020 ສາມາດຄັດເລືອກເອົານັກສອບເສັງໄດ້ 20 ຄົນເຂົ້າສອບເສັງຮອບສຸດທ້າຍໃນວັນທີ 1 ພະຈິກ 2020 ທັງນີ້ກໍ່ເພື່ອເປັນການຂໍ່ານັບຮັບຕ້ອນວັນຫັນເປັນທຸລະກິດຂອງ ທຄຕລ ຄົບຮອບ 31 ປີ.

  ຜ່ານການແຂ່ງຂັນຮອບສຸດທ້າຍໄດ້ມີຜູ້ໂຊກດີທີ່ຊະນະການແຂ່ງຂັນ BCEL One Super User Contest ຈຳນວນ 3 ຄົນ ຊຶ່ງອັນດັບທີ 1 ໄດ້ແກ່ທ່ານ ນາງ ຈັນທະສອນ ຈັນທະເສນ ອາຍຸ 32 ປີ ຈາກແຂວງຈໍາປາສັກ; ອັນດັບທີ 2 ໄດ້ແກ່ທ່ານ ນາງ ແກ້ວອຸດອນ ໄຊຍະສອນ ອາຍຸ 29 ປີ ຈາກນະຄອນຫຼວງວຽງຈັນ ແລະອັນດັບທີ 3 ໄດ້ແກ່ ທ່ານ ຍຸດທະນາ ໄຊຍະວົງ ອາຍຸ 27 ປີຈາກນະຄອນຫຼວງວຽງຈັນ ແລະໃນກິດຈະກຳການແຂ່ງຂັນ BCEL One Super User Contest ຄັ້ງນີ້ເປັນການແຂ່ງຂັນທີ່ໄດ້ຮັບຄວາມສົນໃຈ ແລະ ການຕອບຮັບຈາກສັງຄົມເປັນຈຳນວນຫຼວງຫຼາຍໂດຍສະເພາະນັກສຶກສາ-ປັນຍາຊົນຈາກຂອບເຂດທົ່ວປະເທດເຂົ້າ ຮ່ວມການແຂ່ງຂັນ ແລະຍັງເປັນການສ້າງທັກສະໃຫ້ມວນຊົນໄດ້ມີການຮຽນຮູ້ໃນການນໍາໃຊ້ເຕັກໂນໂລຊີໃນຍຸກ 4.0 ນໍາອີກ.

---------

ຂຽນໂດຍ:  ຣັດສະໝີ ດວງສັດຈະ

ຮູບພາບ: #ຫນັງສືພິມເສດຖະກິດສັງຄົມ

แชร์