ລາວສະຫຼອງວັນອາຫານໂລກ

 ໃນລະຫວ່າງວັນທີ 30-31 ຕຸລາ ຜ່ານມາທີ່ສະຖາບັນຄົ້ນຄວ້າກະສິກໍາ ແລະປ່າໄມ້ແຫ່ງຊາດກະຊວງກະສິກຳ ແລະປ່າໄມ້ຮ່ວມກັບອົງການອາຫານ ແລະການກະເສດ ແລະ ອົງການພັດທະນາແຫ່ງສະຫະປະຊາຊາດໄດ້ຈັດງານສະເຫຼີມສະຫຼອງວັນອາຫານໂລກວັນສາກົນ ແລະ ສັບປະດາແຫ່ງຊາດເພື່ອລຶບລ້າງຄວາມທຸກຍາກປະຈຳປີ 2020 ພາຍໃຕ້ຄຳຂວັນ“ຮ່ວມໃຈກັນເພື່ອບັນລຸຄວາມຍຸຕິທໍາ ແລະສິ່ງແວດລ້ອມໃຫ້ແກ່ທຸກຄົນ” ໂດຍເປັນກຽດການເຂົ້າຮ່ວມຂອງທ່ານ ລິນຄໍາ ດວງສະຫວັນ ຮອງລັດ ຖະມົນຕີກະຊວງກະສິກໍາ ແລະປ່າໄມ້, ທ່ານ ນາງ ຊາຣາ ເສກເກນເນສ ຜູ້ປະສານງານອົງການສະຫະປະຊາຊາດປະຈໍາ ສປປ ລາວ, ມີລັດຖະມົນຕີກະຊວງສາທາລະ ນະສຸກ, ຕາງໜ້າຈາກອົງການສະຫະປະຊາຊາດເພື່ອພັດທະນາ, ຜູ້ຕາງໜ້າອົງການອາຫານ ແລະການກະເສດ, ມີບັນດາເອກອັກຄະລັດຖະທູດ, ທູຕານຸທູດ ແລະຄູ່ຮ່ວມພັດທະນາພ້ອມດ້ວຍພວກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ລິນຄໍາ ດວງສະຫວັນ ໃຫ້ຮູ້ວ່າ: ການສະເຫຼີມສະຫຼອງວັນອາຫານໂລກປີນີ້ຈັດຂຶ້ນໄລຍະທີ່ປະເທດເຮົາປະສົບກັບໄພທຳມະຊາດຢ່າງໜັກໜ່ວງເຊັ່ນ: ການປ່ຽນ ແປງດິນຟ້າອາກາດຂອງໂລກພາໃຫ້ເກີດໄພພິບັດທາງທໍາມະຊາດ, ການລະບາດຂອງພະຍາດໂຄວິດ-19 ທີ່ຍັງຄຸກຄາມໃນທົ່ວໂລກໄດ້ສົ່ງຜົນກະທົບໃຫ້ປະຊາຊົນເກືອບ 700 ລ້ານຄົນ ຂາດສານອາຫານ ແລະຄາດຄະເນວ່າປະຊາຊົນຕື່ມອີກ 130 ລ້ານ ຄົນໃນທົ່ວໂລກອາດປະສົບກັບຄວາມອຶດຫິວຍ້ອນພະຍາດດັ່ງກ່າວ, ດັ່ງນັ້ນ, ການສະຫຼອງສະຫຼອງໃນປີນີ້ແມ່ນມີຄວາມໝາຍຄວາມສໍາຄັນທີ່ສຸດເພື່ອປູກຈິດສຳນຶກ ແລະສ້າງຄວາມຮູ້ໃຫ້ປວງຊົນໃນໂລກໄດ້ເຂົ້າໃຈເຖິງບັນຫາສິ່ງທ້າທ້າຍຕ່າງໆຈາກການປ່ຽນແປງດິນຟ້າອາກາດ ແລະຍັງເປັນການແຈ້ງເຕືອນ, ປຸກລະດົມກໍາລັງແຮງທົ່ວສັງຄົມລາວ ແລະປະຊາຊົນໂລກເຝົ້າລະວັງ, ປ້ອງກັນຜົນເສຍຫາຍທີ່ອາດເກີດຂຶ້ນ ແລະຮ່ວມກັນແກ້ໄຂຜົນຮ້າຍຂອງໄພພິບັດໃຫ້ກັບສູ່ສະພາບປົກກະຕິໂດຍໄວ.

   ສໍາລັບປີ 2021 ກະຊວງກະສິກຳ ແລະປ່າໄມ້ໄດ້ວາງຄາດໝາຍສູ້ຊົນຜະລິດສະບຽງອາຫານ, ເນື້ອທີ່ປູກເຂົ້າໃຫ້ໄດ້ 950.250 ເຮັກຕາ ຜົນຜະລິດ 3,53 ລ້ານໂຕນ, ພືດສະບຽງຕ່າງໆສາລີຫວານໃຫ້ໄດ້ 28.100 ເຮັກຕາ ຜົນຜະລິດ 271.000 ໂຕນ, ເຜືອກມັນໃຫ້ໄດ້ 17.500 ເຮັກຕາ ຜົນຜະລິດ 251.500 ໂຕນ, ໝາກໄມ້ 64.300 ເຮັກຕາ ຜົນຜະລິດ 1,2 ລ້ານໂຕນ, ພືດຜັກຕ່າງໆ 181.400 ເຮັກຕາ ຜົນຜະລິດ 1,5 ລ້ານໂຕນ, ຜະລິດຊີ້ນປາໃຫ້ໄດ້ 486.000 ໂຕນ ແລະວຽກພັດທະນາຊົນນະບົດລຶບລ້າງຄວາມທຸກຍາກຈະສູ້ຊົນສ້າງຄວາມຄົວພົ້ນທຸກໃຫ້ໄດ້ 20.436 ຄອບຄົວ, ສ້າງບ້ານພົ້ນທຸກໃຫ້ໄດ້ 310 ບ້ານ, ສ້າງຄອບຄົວພັດທະນາໃຫ້ໄດ້ 24.572 ຄອບຄົວ ແລະບ້ານພັດທະນາໃຫ້ໄດ້ 442 ບ້ານ.

--------------

ຂ່າວ: ຟ້າ ເສດຖະກິດສັງຄົມ

ຮູບພາບ: #ຫນັງສືພິມເສດຖະກິດສັງຄົມ

แชร์