ປີນີ້ລັດເຮັດໃຫ້ຄົນລາວພົ້ນທຸກຍາກເກືອບ 2 ພັນຄອບຄົວ

 ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນຊຸມປີມານີ້ໂດຍສະເພາະແມ່ນປີ 2020 ແມ່ນຖືວ່າປະເຊີນກັບຄວາມຫຍຸ້ງຍາກຫຼາຍປະການເປັນຕົ້ນແມ່ນສະພາບການແຜ່ລະບາດຂອງພະຍາດໂຄວິດ-19 ເຮັດໃຫ້ຫຼາຍເປົ້າໝາຍຂອງລັດບໍ່ເປັນໄປຕາມແຜນທີ່ວາງໄວ້ແນວໃດກໍດີແຕ່ວຽກການພັດທະນາຊົນນະບົດ ແລະ ແກ້ ໄຂຄວາມທຸກຍາກຂອງປະຊາຊົນແມ່ນຍັງຄົງເດີນໜ້າໄປຢ່າງຕໍ່ເນື່ອງໂດຍໃນ 9 ເດືອນຜ່ານມານີ້ລັດສາມາດລຶບລ້າງຄອບຄົວທຸກຍາກໄດ້ທັງໝົດ 1.870 ຄອບຄົວ.

 ອີງຕາມຂໍ້ມູນການລາຍງານຂອງລັດຖະບານຕໍ່ກອງປະຊຸມສະພາຫວ່າງບໍ່ດົນມານີ້ໃຫ້ຮູ້ວ່າ: ການຈັດຕັ້ງວຽກງານການພັດທະນາຊົນນະບົດ ແລະແກ້ໄຂຄວາມທຸກຍາກຂອງລາວໃນປີນີ້ແມ່ນໄດ້ສຸມໃສ່ສ້າງບ້ານ ແລະຈຸດພັດທະນາຕາມ 4 ເນື້ອໃນ 4 ຄາດໝາຍຕິດພັນກັບວຽກງານ 3 ສ້າງເຊັ່ນ: ໄດ້ປັບປຸງ ແລະກໍ່ສ້າງໂຮງຮຽນ, ສຸກສາ ລາ, ທາງຊົນນະບົດ, ຊົນລະປະທານຂະໜາດນ້ອຍໄປພ້ອມກັບການສົ່ງເສີມທາງດ້ານວິຊາການກ່ຽວກັບການປູກຝັງ ແລະລ້ຽງສັດ, ເສັ້ນທາງຊົນນະບົດ, ໄຟຟ້າ, ນໍ້າສະອາດ ແລະບຸກເບີກເນື້ອທີ່ນາອື່ນໆ.

   ຈາກຜົນການສຸມໃສ່ວຽກງານຄືດັ່ງກ່າວໄດ້ເຮັດໃຫ້ໃນ 9 ເດືອນຜ່ານມາທົ່ວປະເທດສາມາດລຶບລ້າງຄອບຄົວທຸກຍາກໄດ້1.870 ຄົບຄົວ ເທົ່າກັບ 57,82% ຂອງແຜນການ (ແຜນການແມ່ນ 3.234 ຄອບຄົວ), ລຶບລ້າງບ້ານທຸກຍາກໄດ້ 17 ບ້ານ, ເທົ່າກັບ 7,73% ຂອງແຜນການ (ແຜນການ 220 ບ້ານ) ແລະສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດໄດ້ 3 ບ້ານ ເທົ່າກັບ 16,67% ຂອງແຜນການ (ແຜນການ 18 ບ້ານ).

   ແນວໃດກໍດີເພື່ອເຮັດໃຫ້ວຽກງານຖືກຈັດຕັ້ງປະຕິບັດຢ່າງມີໝາກຜົນຄວາມສຳເລັດ ແລະຕໍ່ເນື່ອງສຳລັບໃນປີ 2021 ລັດຖະບານຍັງມີມາດຕະການຈັດຕັ້ງປະຕິບັດສືບຕໍ່ຍູ້ແຮງງານມາດຕະການຍຸດທະສາດລົງກໍ່ສ້າງຮາກຖານການເມືອງ, ພັດທະນາຊົນນະບົດ, ລຶບລ້າງຄວາມທຸກຍາກຂອງປະຊາຊົນເຂດຊົນນະບົດ, ພູດອຍໃຫ້ເປັນເຈົ້າການໃນການກະທຳການຜະລິດໃຫ້ມີກິນ, ມີໃຊ້ກຸ້ມຕົນເອງເພິ່ງຕົນເອງ, ຕີຖອຍແນວຄິດຄອງຄ່ອຍລໍຖ້າແຕ່ການຊ່ວຍເຫຼືອ.

   ພ້ອມດຽວກັນນັ້ນຍັງຈະໄດ້ສຸມໃສ່ພັດທະນາຊົນນະບົດ ແລະແກ້ໄຂຄວາມທຸກຍາກໂດຍສືບຕໍ່ພັດທະນາໂຄ້ງລ່າງພື້ນຖານທີ່ຈຳເປັນຢູ່ເຂດຊົນນະບົດຫ່າງໄກສອກຫຼີກ,ບັນດາເຂດຈຸດສຸມເພື່ອໃຫ້ປະຊາຊົນສາມາດເຂົ້າເຖິງການບໍລິການພື້ນຖານຂອງລັດໄດ້ຢ່າງທົ່ວເຖິງ ແລະລະດົມຊຸກຍູ້ສົ່ງເສີມໃຫ້ພາກເອກະຊົນມີສ່ວນຮ່ວມໃນການພັດທະນາຊົນນະບົດ ແລະລຶບລ້າງຄວາມທຸກຍາກໂດຍວາງນະໂຍບາຍທີ່ມີລັກສະນະດຶງດູດ ແລະສົ່ງເສີມກວ່າເກົ່າ.

แชร์