ລັດໃຫ້ເປີດຮ້ານບັນເທີງ ແຕ່ປິດດ່ານຮອດທ້າຍປີ

   ເພື່ອເປັນການຈັດຕັ້ງປະຕິບັດວຽກງານສະກັດກັ້ນ, ຜ່ອນຜັນມາດຕະການປ້ອງກັນຄວບຄຸມແກ້ໄຂການລະບາດຂອງໂຄວິດ-19 ໃນວັນທີ 1 ພະຈິກຫາ 31 ທັນວາ 2020 ນີ້ລັດຖະບານແມ່ນຈະຍັງສຶບຕໍ່ປິດໂດຍສະເພາະຊາຍແດນດ່ານເຂົ້າ-ອອກເມືອງ ແຕ່ລັດຖະບານຈະອະນຸຍາດໃຫ້ເປີດຮ້ານອາຫານບັນເທີງໂອເກະເພື່ອຫຼຸດຜ່ອນຜົນກະທົບທາງທຸລະກິດໂດຍໃຫ້ປະຕິບັດໂມງເວລາປິດຕາມຄະນະສະເພາະກິດວາງອອກໃຫ້ເຂັ້ມງວດ.

  ອີງຕາມແຈ້ງການຫ້ອງວ່າການສຳນັກງານນາຍົກລັດຖະມົນຕີສະບັບເລກທີ 1202/ຫສນຍ ລົງວັນທີ 31 ຕຸລາ 2020 ໄດ້ມີເນື້ອໃນວ່າ: ໃຫ້ສືບຕໍ່ປິດດ້ານປະເພນີ ແລະດ່ານຖ້ອງຖິ່ນສຳລັບການເຂົ້າ-ອອກ ຂອງບຸກຄົນທົ່ວໄປ ແລະ ການຂົນສົ່ງສິນຄ້າຍົກເວັ້ນດ່ານປະເພນີ ຫຼືດ່ານທ້ອງຖິ່ນທີ່ໄດ້ຮັບອະນຸຍາດຈາກລັດຖະບານໃຫ້ຂົນສົ່ງສິນຄ້າເຂົ້າ-ອອກ ໄດ້ສ່ວນດ່ານສາກົນສືບຕໍ່ປິດສຳລັບການເຂົ້າອອກຂອງບຸກຄົນທົ່ວໄປຍົກເວັ້ນພົນລະເມືອງລາວ ແລະຕ່າງປະເທດທີ່ມີຄວາມຈຳເປັນຮີບດ່ວນໃນການຈະເດີນທາງເຂົ້າ-ອອກທີ່ຮັບອະນຸຍາດຈາກຄະນະສະເພາະກິດສຳລັບການຂົນສົ່ງສິນຄ້າຜ່ານດ່ານສາກົນແມ່ນສາມາດຂົນສົ່ງປົກກະຕິ.

   ສືບຕໍ່ໂຈະການອອກວິຊ່າທ່ອງທ່ຽວ ແລະຢ້ຽມຢາມສຳລັບບຸກຄົນທີ່ເດີນທາງມາຈາກ ຫຼືຜ່ານປະເທດທີ່ຍັງມີການລະບາດຂອງພະຍາດໂຄວິດ-19 ນັກທ່ອງທ່ຽວເປັນກຸ່ມທີ່ໄດ້ຮັບອະນຸຍາດຈາກຄະນະສະເພາະກິດສຳລັບນັກການທູດພະນັກງານ, ອົງການຈັດຕັ້ງສາກົນ, ຊ່ຽວຊານ, ນັກລົງທຶນນັກທຸລະກິດ, ວິຊາການ ແລະ ວຽກງານຕ່າງປະເທດທີ່ມີຄວາມຈຳເປັນ ແລະຮີບດ່ວນສາມາດເຂົ້າປະຕິບັດວຽກງານຢູ່ສະຖານທູດ, ບັນດາກິດຈະການ ແລະໂຄງການໄດ້ແຕ່ຕ້ອງຜ່ານການພິຈາລະນາເຫັນດີຈາກຄະນະສະເພາະກິດສ່ວນຂັ້ນຕອນໃນການປະຕິດ ບັດຕົວຈິງແມ່ນໃຫ້ສືບຕໍ່ປະຕິດບັດຄຳແນະນຳຂອງຄະນະສະເພາະກິດສະບັບເລກທີ 2336/ສພກ ລົງວັນທີ 31 ກໍລະກົດ 2020ສຳລັບຜູ້ທີ່ເດີນທາງເຂົ້າ-ອອກ ສປປ ລາວ ໃນໄລຍະດຳເນີນມາດຕະການປ້ອງກັນຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຢ່າງເຂັມງວດ.

ເຫັນດີໃຫ້ຮ້ານບັນເທີງ ແລະຄາຣາໂອເກະເພື່ອຫຼຸດຜ່ອນຜົນກະທົບທາງດ້ານການດຳເນີນທຸລະກິດໂດຍໃຫ້ປະຕິບັດໂມງເວລາປິດຕາມດຳລັດວ່າດ້ວຍການບັນເທີງສະບັບເລກທີ 315/ລບ ລົງວັນທີ 2 ຕຸລາ 2017 ແລະປະຕິບັດມາດຕະການປ້ອງກັນໃຫ້ເຂັ້ມງວດ.

    ເຫັນດີສືບຕໍ່ປຶກສາຫາລືນະໂຍບາຍຜ່ອນຜັນການເດີນທາງເຂົ້າ-ອອກປະເທດລະຫວ່າງລາວ-ຫວຽດນາມ, ລາວ-ຍີ່ປຸ່ນແລະປະເທດອາຊຽນທີ່ສະເໜີເຂົ້າມາໃໝ່.

    ມອບໃຫ້ກະຊວງປ້ອງກັນຄວາມສະຫງົບ ແລະທ້ອງຖິ່ນກ່ຽວຂ້ອງເພີ່ມທະວີການຕິດຕາມເດີນທາງການເຂົ້າ-ອອກ ເພື່ອຮັບປະກັນບໍ່ໃຫ້ມີຄວາມສ່ຽງໃນການນຳເຊື້ອພະຍາດໂຄວິດແຜ່ລະບາດໃນປະເທດ.

แชร์