15% ແລ້ວໂຄງການສ້າງສວນສາທາໜອງຖານ

  ໂອກາດທີ່ ທ່ານ ບົວຄົງ ນາມມະວົງ ເຈົ້າແຂວງໆບໍ່ແກ້ວພ້ອມຄະນະໄດ້ລົງຕິດຕາມຊຸກຍູ້ກວດກາ, ຄວາມຄືບໜ້າການຈັດຕັ້ງປະຕິບັດບັນດາໜ້າວຽກຂອງໂຄງການພັດທະນາຕົວເມືອງຕາມແລວທາງອະນຸພາກພື້ນແມ່ນໍ້າຂອງ 2. ADB ໃນວັນທີ 30 ຕຸລາ 2020 ນີ້, ທ່ານ ເພັດນະຄອນ ວົງລໍຄໍາ ຫົວໜ້າຫ້ອງການຈັດຕັ້ງປະຕິ ບັດໂຄງການ, ໄດ້ລາຍງານວ່າ: ໂຄງການສວນສາທາລະນະໜອງຖານ, ແມ່ນໂຄງການໜຶ່ງທີ່ມີຄວາມສຳຄັນໃນການພັດທະນາແຂວງບໍ່ແກ້ວ,ມີເນື້ອທີ 39 ເຮັກຕາ, ໄດ້ແບ່ງອອກເປັນສອງສັນຍາ, ສັນຍາທີໜຶ່ງໃນມູນຄ່າ 2,1 ລ້ານໂດລາ ໂດຍແມ່ນບໍລິສັດຄຳຟອງກຣູບເປັນຜູ້ຮັບເໝົ້າກໍ່ສ້າງການດຳເນີນການກໍ່ສ້າງມາແຕ່ຕົ້ນເດືອນກຸມພາມາຮອດປະຈຸບັນມີຄວາມຄືບໜ້າໄປແລ້ວ 15% .

   ທ່ານເຈົ້າແຂວງໆບໍ່ແກ້ວກ່າວວ່າ: ການລົງມາຕິດຕາມຊຸກຍູ້ການຈັດຕັ້ງປະຕິບັດໂຄງການພັດທະນາສວນສາທາລະນະແຫຼ່ງທ່ອງທ່ຽວໜອງຖານຊຶ່ງເປັນໂຄງການໜຶ່ງທີ່ສຳຄັນໃນການຈັດຕັ້ງປະຕິບັດແຜນຍຸດທະສາດພັດທະນາແຂວງບໍ່ແກ້ວໂດຍເລັ່ງໃສ່ສ້າງແຂວງບໍ່ແກ້ວໃຫ້ເປັນແຂວງທີ່ບໍລິການດ້ານການທ່ອງທ່ຽວໃຫ້ມີຄຸນນະພາບເຊື້ອມຕໍ່ບັນດາແຂວງພາກເໜືອຂອງລາວກັບບັນດາປະເທດໃກ້ຄຽງໂດຍສະເພາະແມ່ນແຂວງພາກເໜືອຂອງໄທຊຶ່ງໂຄງການດັ່ງກ່າວນີ້ໄດ້ເລີ່ມຈັດຕັ້ງປະຕິບັດມາແຕ່ປີຜ່ານມານີ້ໂດຍໄດ້ຮັບການສະໜັບສະໜູນຈາກໂຄງການ ADB, ສະນັ້ນຂໍຮຽກຮ້ອງໃຫ້ບັນດາພະແນກການທີ່ກ່ຽວຂ້ອງ ແລະພໍ່ແມ່ປະຊາຊົນຈົ່ງເປັນເຈົ້າການອຳ ນວຍຄວາມສະດວກ ແລະຮ່ວມມືພ້ອມກັນພັດທະນາເຮັດໃຫ້ແຫຼ່ງທ່ອງທ່ຽວແຫ່ງນີ້ສຳເລັດໂດຍໄວ.

   ພ້ອມນັ້ນທ່ານເຈົ້າແຂວງໄດ້ສືບຕໍ່ໄປກວດກາເບິ່ງການບູລະນະທາສີຄືນໃໝ່ຂອງຫໍຫຼັກເມືອງໃຫ້ມີຄວາມສະງ່າລາສີສວຍງາມເປັນຫຼັກບ້ານຫຼັກເມືອງຊຶ່ງເປັນຈຸດກາບໄຫວ້ ແລະສັກກະລະບູຊາຂອງປະຊາຊົນລາວບັນດາເຜົ່າແຂວງບໍ່ແກ້ວໃຫ້ມີລາສີໂດດເດັ່ນຂຶ້ນກວ່າເກົ່າ, ໂດຍໄດ້ຮັບການອຸປະຖຳຈາກທ່ານ ນາງ ບຸນຖະໜອມ ນາມມະວົງ ຄອບຄົວຂອງທ່ານເຈົ້າແຂວງໆບໍ່ແກ້ວໃນມູນຄ່າ 20 ລ້ານກີບ.

-------------

ຂ່າວ: ຄຳພັນ ແກ້ວມະນີ

ຮູບພາບ: ໜັງສືພິມເສດຖະກິດ-ສັງຄົມ

 

แชร์