ມອບ-ຮັບ ໂຮງຮຽນບ້ານໂພນຜາງ ຫຼັງໃໝ່

  ໃນວັນທີ 29 ຕຸລາ 2020 ທີ່ໂຮງຮຽນມັດທະຍົມຕົ້ນໂພນຜາງບ້ານໂພນຜາງ ເມືອງອາດສະພັງທອງ ແຂວງສະຫວັນນະເຂດໄດ້ຈັດພິທີມອບ-ຮັບໂຮງຮຽນຫຼັງໃໝ່ໂດຍເຂົ້າຮ່ວມຂອງທ່ານ ສີພະນົມ ອິນທະດາລິນຄະນະຫ້ອງການສຶກສາທິການ ແລະກີລາເມືອງ, ທ່ານ ຕານິ ທີ່ປຶກສາໂຄງການປັບປຸງສະພາບແວດ ລ້ອມຂອງໂຮງຮຽນມັດທະຍົມຢູ່ແຂວງພາກກາງ ແລະພາກໃຕ້ຂອງ ສປປ ລາວ, ນອກນັ້ນກໍ່ມີຕາງໜ້າພະແນກສຶກສາທິການ ແລະກີລາແຂວງສະຫວັນນະເຂດ, ອໍານາດການປົກຄອງອ້ອມຂ້າງເມືອງ, ອໍານາດການປົກຄອງທ້ອງຖິ່ນ, ຜູ້ອໍານວຍການໂຮງຮຽນອ້ອມຂ້າງເມືອງຕະຫຼອດຮອດຄູ-ອາຈານ ແລະນ້ອງນັກຮຽນກໍ່ໄດ້ເຂົ້າຮ່ວມ.

  ການກໍ່ສ້າງໂຮງຮຽນແມ່ນໄດ້ເລີ່ມແຕ່ວັນທີ 16 ພະຈິກ 2019 ເປັນຕົ້ນມາໄລຍະເວລາ 10 ເດືອນເຕັມໂດຍໄດ້ຮັບແຫຼ່ງທຶນຈາກໂຄງການຊ່ວຍເຫຼືອຈາກປະຊາຊົນຢີ່ປຸ່ນພາຍໃຕ້ມິດຕະພາບ ແລະການຮ່ວມມືລະຫວ່າງຢີ່ປຸ່ນ ແລະສປປ ລາວໂຄງສ້າງຂອງອາຄານແມ່ນສ້າງແບບຖາວອນທີ່ມີໂຄງສ້າງທີ່ແໜ້ນໜາແຂງແຮງຄື: ໂຄງສ້າງເຮັດດ້ວຍເບຕົງເສີມເຫຼັກ, ຝາກໍ່ດ້ວຍດິນຈີ່,  ພື້ນປູດ້ວຍເບຕົງເສີມເຫຼັກ ແລະປູດ້ວຍກະໂລ, ເພດານຂ້າງໃນເຮັດດ້ວຍຢິບຊໍາສາບລຽບ, ຂ້າງນອກແຜນສະມາດບອດສາບລຽບ ແລະຮອບນອກແມ່ນໄມ້ລະແນງສຳເລັດຮູບ ແລະມຸງດ້ວຍສັງກະສີພ້ອມດ້ວຍສະໜວນກັນຄວາມຮ້ອນເພື່ອປ້ອງກັນການຮົ່ວຊຶມ, ຊຶ່ງຢູ່ໃນໂຮງຮຽນມັດທະຍົມຕົ້ນໂພນຜາງນັ້ນໂຄງການແມ່ນໄດ້ສ້າງໂຮງຮຽນໃຫ້ 1 ອາຄານຮຽນລວມມີ 4 ຫ້ອງຮຽນ, 1 ຫ້ອງຄູ, 1 ຫ້ອງອ່ານ ແລະອາຄານຫ້ອງນໍ້າ 1 ຫຼັງລວມມີ 3 ຫ້ອງໃນນັ້ນມີຫ້ອງສໍາລັບຄົນພິການ 1 ຫ້ອງ, ຫ້ອງທັງໝົດນັ້ນປະກອບດ້ວຍເຟີນີເຈີຄົບຊຸດຄື: ໂຕະຄູ, ໂຕະນັກຮຽນ, ຕັ່ງຄູ-ນັກຮຽນ, ກະດານດໍາ, ຕູ້ໃສ່ເອກະສານ ແລະຖ້ານເກັບມ້ຽນເອກະສານຈາກນັ້ນທາງໂຄງການຍັງໄດ້ປະກອບປ້າຍທີ່ລະນຶກທີ່ເປັນສັນຍາ ລັກໃນການຊ່ວຍເຫຼືອໂດຍມີປ້າຍໃຫ່ຍຕັ້ງຢູ່ປະຕູທາງເຂົ້າໂຮງຮຽນ ແລະປ້າຍນ້ອຍແມ່ນຕິດໃສ່ອາຄານຮຽນຕື່ມອີກດ້ວຍໂດຍຄິດເປັນມູນຄ່າທັງໝົດໃນການກໍ່ສ້າງແມ່ນ 1,25 ຕື້ກີບຊຶ່ງເປັນທຶນຂອງໂຄງການຊ່ວຍເຫຼືອ 100%.

  ຈາກນັ້ນໃນພິທີກໍ່ໄດ້ມີການມອບໂຮງຮຽນເປັນກຽດມອບໂດຍ ທ່ານ ຕານິ ທີ່ປຶກສາໂຄງການປັບປຸງສະພາບແວດລ້ອມຂອງໂຮງຮຽນມັດທະຍົມຢູ່ແຂວງພາກກາງ ແລະພາກໃຕ້ຂອງ ສປປ ລາວ ແລະກ່າວຮັບໂດຍທ່ານ ສີພະນົມ ອິນທະດາລິນຄະນະຫ້ອງການ ສຶກສາທິການ ແລະກີລາເມືອງກ່າວຮັບຢ່າງສົມກຽດໂດຍຊ້ອງໜ້າກັບບັນດາແຂກທີ່ເຂົ້າຮ່ວມເພື່ອເປັນສັກຂີພິຍານນໍາດ້ວຍ, ຫຼັງຈາກນັ້ນຄະນະຫ້ອງການສຶກສາທິການ ແລະກີລາເມືອງກໍ່ໄດ້ມອບຕໍ່ໃຫ້ຜູ້ ອໍານວຍການໂຮງຮຽນມັດທະຍົມຕົ້ນໂພນຜາງ ແລະອໍານາດການປົກຄອງບ້ານເປັນຜູ້ຊົມໃຊ້ພ້ອມທັງມອບໝາຍສິດນໍາໃຊ້ໃຫ້ແກ່ພາກສ່ວນທີ່ກ່ຽວຂ້ອງພ້ອມກັນນໍາໃຊ້ເຂົ້າໃນການສຶກສາຮໍ່າຮຽນອົບຮົມບົ່ມຊ້ອນລູກຫຼານຂອງຊຸມຊົນບ້ານດັ່ງກ່າວໃຫ້ໄດ້ຮັບການສຶກສາຕໍ່ໄປ.

----

ໜັງສືພິມ ເສດຖະກິດ-ສັງຄົມ

แชร์