ຫົວພັນ ໄຂກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ

  ກອງປະຊຸມໃຫຍ່ຄັ້ງທີ X ຂອງອົງຄະນະພັກ ແຂວງຫົວພັນ ໄດ້ໄຂຂຶ້ນຢ່າງເປັນທາງການໃນເຊົ້າວັນທີ 2 ພະຈິກຜ່ານມາ ແລະກອງປະຊຸມດັ່ງກ່າວຈະໄດ້ດຳເນີນຮອດວັນທີ 3 ພະຈິກ 2020 ໂດຍການເປັນປະທານຂອງ ສະຫາຍ ວັນໄຊ ແພງຊຸມມາ ກຳມະການສູນກາງພັກເລຂາຄະນະບໍລິຫານງານພັກແຂວງເຈົ້າແຂວງໆ ຫົວພັນ ໂດຍເປັນກຽດເຂົ້າຮ່ວມຂອງສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ,  ປະທານສູນກາງແນວລາວສ້າງຊາດ, ພ້ອມນີ້ກໍມີຄະນະທີ່ກ່ຽວຂ້ອງຈາກສູນກາງ ແລະມີຜູ້ແທນເຂົ້າຮ່ວມທັງໝົດ 324 ສະຫາຍ, ຍິງ 39 ສະຫາຍ, ຜູ້ແທນສົມບູນ 287 ສະຫາຍ, ຍິງ34 ສະຫາຍ ຊຶ່ງເປັນຕົວແທນໃຫ້ແກ່ສະ ມາຊິກພັກທົ່ວແຂວງຈຳນວນ 18.042 ສະຫາຍ.

  ໃນວາລະກອງປະຊຸມທີ່ສຳຄັນນີ້ພາຍຫຼັງ ສະຫາຍ ວັນໄຊ ແພງຊຸມມາ ກ່າວໄຂກອງປະຊຸມຢ່າງເປັນທາງການ, ຈາກນັ້ນກໍ່ໄດ້ຜ່ານຮ່າງລາຍງານການເມືອງຕໍ່ກອງປະ ຊຸມໃຫຍ່ຊຶ່ງໃນກອງປະຊຸມຜູ້ເຂົ້າຮ່ວມຈະໄດ້ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ແລະທິດທາງແຜນພັດທະນາຄັ້ງທີ IX ຂອງແຂວງ (ແຕ່2021-2025) ແລະແຜນຍຸດທະສາດການພັດທະນາເສດຖະກິດ-ສັງຄົມຮອດ ປີ 2025 ພ້ອມທັງຮັບຟັງການປະກອບຄຳຄິດຄຳເຫັນຈາກຫຼາຍພາກສ່ວນຕ່າງໆຂອງບັນດາກົມກອງອ້ອມຂ້າງແຂວງ ແລະ ຄອບຄົວຕົວແບບໃນການປູກຝັງ, ລ້ຽງສັດ, ການຕໍ່າຫູກທໍ່ໄໝ ແລະ ການຄ້າຂາຍບໍລິການອື່ນໆ ແລະ ຜູ້ ແທນກອງປະຊຸມຈະໄດ້ໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະບໍລິຫານງານພັກແຂວງຄັ້ງທີ X ຕາມລະບຽບການ, ໃຫ້ຮັບປະກັນລັກສະນະສືບທອດ ແລະເຮັດໃຫ້ຖັນແຖວການນຳນັບມື້ໜຸ່ມແໜ້ນ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ,ມີຄວາມສາມາດ ແລະມີຄວາມຮັບຜິດຊອບສູງເພື່ອເປັນຫຼັກແຫຼ່ງນໍາພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ໃຫ້ປາກົດຜົນເປັນຈິງ.

   ພ້ອມນີ້ຕອນທ້າຍກອງປະຊຸມຍັງຈະໄດ້ຮັບຟັງການໂອ້ລົມຂອງສະຫາຍ ໄຊສົມພອນ ພົມວິຫານ ຕື່ມອີກ.

-----------------

ຂ່າວ: ຈັນສຸກ

ຮູບພາບ: ໜັງສືພິມເສດຖະກິດ-ສັງຄົມ

แชร์