LVB ຮ່ວມໃຈຊ່ວຍຜູ້ປະສົບໄພນໍ້າຖ້ວມຢູ່ 2 ເມືອງຂອງສະຫວັນນະເຂດ

   ໃນວັນທີ 31 ຕຸລາຜ່ານມາ, ທະນາຄານຮ່ວມທຸລະກິດລາວຫວຽດພ້ອມດ້ວຍຄະນະໄດ້ເດີນທາງໄປຢ້ຽມຢາມ ແລະມອບເຄື່ອງຊ່ວຍເຫຼືອໃຫ້ປະຊາຊົນຜູ້ປະສົບໄພນໍ້າຖ້ວມຢູ່ເມືອງສອງຄອນ ແລະເມືອງຊົນນະບູລີ ແຂວງສະຫວັນນະເຂດ ລວມມູນຄ່າທັງໝົດ 100 ລ້ານກີບ ສໍາລັບເມືອງສອງຄອນໄດ້ມີພິທີມອບຢູ່ 2 ຈຸດຄື: ບ້ານທ່າຂາມລຽນ ແລະ ບ້ານລະຫານໍ້າ ສ່ວນເມືອງຊົນນະບູລີໄດ້ມີພິທີມອບຢູ່ທີ່ວັດບ້ານກອງປະທຸມວັນ.

 ຊຶ່ງໃຫ້ກຽດເຂົ້າຮ່ວມຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ,ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດພ້ອມດ້ວຍພະນັກງານຫຼັກແຫຼ່ງ ແລະຫົວໜ່ວຍທຸລະກິດທີ່ເປັນລູກຄ້າຂອງທະນາຄານກໍ່ເຂົ້າຮ່ວມ.

  ສຳລັບເຄື່ອງອຸປະໂພກ-ບໍລິໂພກຂອງທະນາຄານຮ່ວມທຸລະກິດລາວຫວຽດທີ່ນຳມາມອບໃນຄັ້ງນີ້ປະກອບມີ: ເຂົ້າສານ, ອາຫານແຫ້ງ, ນໍ້າດື່ມ, ໝີ່ໄວໆ, ປາກະປ໋ອງ, ເຂົ້າໜົມ ແລະອື່ນໆລວມມູນຄ່າທັງໝົດ 100 ລ້ານກີບ ນອກນັ້ນ, ຍັງມີເຄື່ອງຊ່ວຍເຫຼືອທີ່ລະດົມຈາກລູກຄ້າຕື່ມອີກຈຳນວນໜຶ່ງເປັນຕົ້ນແມ່ນ: ບໍລິສັດ ມະນິຍົມ ໂອໂຕກຣຸບ, ເຊັບໂຣເລັດ, ໂຮງງານວີເຄເຄ ອຸດສາຫະກໍາ ຈໍາກັດ, VEXCELLENCE RESIDENCE ແລະບໍລິສັດນິວຈະເລີນ.

 ໂອກາດນີ້ທ່ານ ພັອ ລໍາຄູນ ວິລະວົງ ເຈົ້າເມືອງສອງຄອນໄດ້ລາຍງານສະພາບນໍ້າຖ້ວມໃຫ້ຮູ້ວ່າ: ປະຊາຊົນໄດ້ຮັບຜົນເສຍຫາຍ 23 ບ້ານ, 2,6 ພັນຄອບຄົວ, 15,4 ພັນຄົນ; ເນື້ອທີ່ທຳການຜະລິດເສຍຫາຍ 5,4 ພັນເຮັກຕາ, ໜອງປາ 340 ໜອງ, ເນື້ອທີ່ສວນປູກພືດ 96,58 ເຮັກຕາ, ອ່າງເກັບນໍ້າ 1 ແຫ່ງ, ລະບົບຊົນລະ ປະທານ 9 ແຫ່ງ, ສະຖານີຈັກສູບນໍ້າ 9 ແຫ່ງ, ສັດລ້ຽງຕາຍ ແລະ ສູນຫາຍ 17 ໂຕ ນອກນີ້ຍັງມີຜົນກະທົບຕໍ່ພື້ນຖານໂຄງລ່າງຄື: ເສັ້ນທາງເສຍຫາຍຫຼາຍກວ່າ 10 ເສັ້ນ, ໂຮງຮຽນຢຸດການຮຽນການສອນຊົ່ວຄາວ 12 ແຫ່ງ, ສຸກສາລາ 2 ແຫ່ງ, ນໍ້າສ້າງນໍ້າບາດານ 401 ໜ່ວຍ ແລະນໍ້າສ້າງທໍ່ 18 ໜ່ວຍ.

ສ່ວນທ່ານ ສຸວິໄລ ຫຼວງຊະລາດ ເຈົ້າເມືອງຊົນນະບູລີໄດ້ລາຍງານໃຫ້ຮູ້ຕື່ມວ່າ: ເມືອງຊົນນະບູລີໄດ້ຮັບຜົນເສຍຫາຍນໍ້າຖ້ວມ 15 ບ້ານ, 4,4 ພັນຫຼັງ ຄາເຮືອນ, ເນື້ອທີ່ຖືກຖ້ວມ 7,2 ພັນເຮັກຕາ, ເນື້ອທີ່ສວນປູກພືດ 176 ເຮັກຕາ, ໜອງປາ 369 ໜອງ, ລະບົບຊົນລະປະທານ 9 ແຫ່ງ, ປະຕູນໍ້າ 3 ແຫ່ງ, ສັດລ້ຽງຕາຍ ແລະສູນຫາຍ 128 ໂຕ, ໂຮງຮຽນຖືກຖ້ວມ 27 ແຫ່ງ, ສຸກສາລາ 8 ເຂດ,ວັດ 13 ວັດ, ນໍ້າສ້າງ-ນໍ້າ ບາດານ 402 ໜ່ວຍ ແລະເສັ້ນທາງເສຍຫາຍ 12 ເສັ້ນ.

   ໃນຕອນທ້າຍ, ທ່ານເຈົ້າເມືອງສອງຄອນ ແລະເຈົ້າເມືອງຊົນນະບູລີຍັງໄດ້ສະແດງຄວາມຂອບໃຈ ແລະຮູ້ບຸນຄຸນມາຍັງທະນາຄານຮ່ວມທຸລະກິດລາວຫວຽດທີ່ມີນໍ້າໃຈຊ່ວຍເຫຼືອປະຊາຊົນທີ່ປະສົບໄພຄັ້ງນີ້ ແລະໄດ້ອວຍພອນໃຫ້ການດໍາເນີນທຸລະກິດຂອງທະນາຄານມີຜົນກໍາໄລຂຶ້ນໄປເລື້ອຍໆ.

แชร์