ລ້ຽງໝູຂາຍສ້າງລາຍໄດ້ປີໜຶ່ງ 200 ລ້ານກວ່າກີບ

 ຄວາມດຸໝັ່ນຂະຫຍັນພຽນ ແລະມີຄວາມມັກຮັກອາຊີບທີ່ເລືອກ ແລະມີພັດທະນາໄປພ້ອມກັບການດູແລຢ່າງຕັ້ງໜ້າຈະເຮັດໃຫ້ມີການເຕີບໃຫຍ່ຂະຫຍາຍຕົວກາຍເປັນທຸລະກິດທີ່ສາມາດສ້າງລາຍຮັບທີ່ດີໃຫ້ກັບຄອບຄົວດັ່ງ ທ່ານ ແສງ ແປງສຸດາອາຍຸ 50 ປີ ຢູ່ບ້ານຫາດປາງກຸ່ມພັດທະນາທີ 6 ເມືອງປາກອູແຂວງຫຼວງພະບາງໄດ້ຖືເອົາອາຊີບລ້ຽງໝູຂາຍອອກເປັນສິນຄ້າສາມາດສ້າງລາຍຮັບປີໜຶ່ງໄດ້ 80 ລ້ານກວ່າກີບ.

  ທ່ານ ແສງ ແປງສຸດາ ໃຫ້ສໍາພາດຕໍ່ທິມຂ່າວພວກເຮົາວ່າງບໍ່ດົນນີ້ວ່າ: ໃນຄອບຄົວມີຈໍານວນພົນທັງໝົດ 4 ຄົນ, ຍິງ1 ຄົນ, ມີແຮງງານທັງໝົດ 4 ແຮງງານ, ອາ ຊີບໃນເມື່ອກ່ອນແມ່ນເຮັດໄຮ່ ແລະຄ້າຂາຍ. ເຫັນວ່າລາຍຮັບເຂົ້າຄອບຄົວຍັງມີໜ້ອຍ, ຊີວິດການກິນຢູ່ຍັງຂາດເຂີນຝືດເຄືອງລວມເຖິງການໃຊ້ຈ່າຍປະຈໍາວັນ ແລະ ສົ່ງລູກຮຽນໜັງສືແມ່ນຍັງບໍ່ພຽງພໍຍ້ອນພາຍໃຕ້ການຊີ້ນໍາໆພາຂອງພັກ-ລັດ ໄດ້ມີການປ່ຽນແປງໃໝ່ຮອບດ້ານທີ່ມີລັກການຂອງພັກ-ລັດ ແລະ ແຜນພັດທະນາເສດຖະ ກິດ-ສັງຄົມຂອງເມືອງວາງອອກມາຮອດ ປີ 2.000 ພາຍຫຼັງຍ້າຍບ້ານມາຢູ່ແຄມທາງລົດ, ຈຶ່ງໄດ້ຫັນ ປ່ຽນອາຊີບໃໝ່ຄື: ບໍລິການຄ້າຂາຍຕະຫຼາດເຫັນວ່າລາຍຮັບໄດ້ ດີເຮັດໃຫ້ຊີວິດການເປັນຢູ່ຂອງຄອບຄົວຄ່ອຍດີຂຶ້ນສະເລ່ຍລາຍຮັບໄດ້ 85 ລ້ານກີບຕໍ່ປີສາມາດສົ່ງລູກເຂົ້າຮຽນໄດ້ແຕ່ການດໍາເນີນທຸລະກິດນັ້ນກໍ່ຍັງບໍ່ພຽງພໍໃນການໃຊ້ຈ່າຍ, ບັນຫາໜຶ່ງກໍ່ຍ້ອນຕົນເອງເຖົ້າແກ່ແລ້ວແສງຕາກໍ່ບໍ່ຄ່ອຍດີບໍ່ສາມາດເຮັດທຸລະກິດຄ້າຂາຍຕໍ່ໄປໄດ້ຈຶ່ງໄດ້ປຶກສານໍາຄອບຄົວເພື່ອຫັນປ່ຽນອາຊີບໃໝ່.

   ພໍມາຮອດປີ 2018 ຈຶ່ງຫັນມາລ້ຽງໝູໄລຍະສັ້ນດ້ວຍການໃຫ້ອາຫານສົດ, ລ້ຽງຊຸດໜຶ່ງມີໝູ 630 ໂຕ, ສາມາດລ້ຽງໄດ້3ຊຸດຕໍ່ປີ, ຂາຍຊຸດໜຶ່ງໄດ້ກໍາໄລສະເລ່ຍ 70 ລ້ານ ກີບຕໍ່ຊຸດ, ຂາຍ3ຊຸດ, ລວມລາຍຮັບສະເລ່ຍໄດ້ 210 ລ້ານກີບຕໍ່ປີ. ເຮັດໃຫ້ຊີວິດການກິນຢູ່ຂອງຄອບຄົວດີຂຶ້ນກວ່າເກົ່າ, ສາມາດນໍາພາຄອບຄົວຫຼຸດພົ້ນອອກຈາກຄອບຄົວທຸກຍາກມາເປັນຄອບຄົວພັດທະນາໄດ້, ຜ່ານການສະສົມທຶນຮອນມາໃນແຕ່ລະປີມາຮອດປະຈຸບັນສາມາດສ້າງເຮືອນຢູ່ຖາວອນໜຶ່ງຫຼັງ, ມີລົດຮັບໃຊ້ຄອບ ຄົວ ແລະແຜນໃນຕໍ່ໜ້າກໍຈະສືບຕໍ່ຂະຫຍາຍກິດຈະການດັ່ງກ່າວໃຫ້ຫຼາຍກວ່າເກົ່າ ແລະຈະຖອດຖອນບົດຮຽນຈາກຫຼາຍບ່ອນທີ່ມີປະສົບການໃນການເຮັດທຸລະກິດ, ປະ ຕິບັດຕາມທິດຊີ້ນໍາຂອງຂັ້ນເທິງເພື່ອສ້າງກິດຈະການຕົວແບບໃຫ້ແກ່ຄອບຄົວອື່ນໆໃນອະນາຄົດ.

  ພ້ອມນີ້ທ່ານຍັງໄດ້ສະແດງຄວາມຮູ້ບຸນຄຸນຕໍ່ການນໍາພັກລັດ, ວິຊາການກ່ຽວຂ້ອງທີ່ນໍາເອົາບົດຮຽນມາຊ່ວຍແນະນໍາໃຫ້ກັບຄອບຄົວ, ເຮັດໃຫ້ຄອບຄົວຫລຸດພົ້ນຈາກ ຄອບຄົວທຸກຍາກ, ມີຊີວິດທີ່ດີຂຶ້ນ ແລະສາມາດສ້າງລາຍຮັບສູງສູ່ຄອບຄົວໃນແຕ່ລະປີພ້ອມດຽວກັນນີ້ທ່ານຍັງຮຽກຮ້ອງມາຍັງຊາວກະສິກອນຫາກຜູ້ໃດສົນໃຈຢາກຈະເຮັດກິດຈະກໍາດັ່ງກ່າວຢາກມາຖອດຖອນບົດຮຽນນໍາເພື່ອປ່ຽນອາຊີບຈາກການເຮັດໄຮ່ຫັນມາປູກຝັງ-ລ້ຽງສັດ ເພື່ອເຮັດໃຫ້ຊີວິດການເປັນຢູ່ຂອງຄອບຄົວດີຂື້ນກໍສາມາດເຂົ້າມາປຶກສາ ແລະແລກປ່ຽນບົດຮຽນນໍາໄດ້ຍິນດີທີ່ຈະໃຫ້ຄໍາປຶກສາຢູ່ສະເໝີ, ທ່ານ ແສງ ແປງສຸດາກ່າວ.

----------------

ຂ່າວ: ສີສຸວັນ

ຮູບພາບ: ໜັງສືພິມເສດຖະກິດ-ສັງຄົມ

แชร์