ປະເມີນຜົນການປະຕິບັດໂຄງການຊ່ວຍເຫຼືອຂອງເອດີບີ

   ວັນທີ 27 ຕຸລາຜ່ານມາທີ່ນະຄອນຫຼວງວຽງຈັນໄດ້ມີກອງປະຊຸມທົບທວນການຈັດຕັ້ງປະຕິບັດບັນດາໂຄງການຢູ່ ສປປ ລາວ ປະຈຳປີ2020 ລະຫວ່າງລັດຖະບານ ລາວ ແລະທະນາຄານພັດທະນາອາຊີ (ADB) ເພື່ອພ້ອມກັນສະຫຼຸບ, ຕີລາຄາ ແລະປະເມີນຜົນຂອງການຈັດຕັ້ງປະຕິບັດບັນດາໂຄງການທັງໝົດທີ່ ADB ໃຫ້ການ ສະໜັບສະໜູນສຳລັບປີ 2020 ຢູ່ ໃນລາວແນໃສ່ເພື່ອຮວບຮວມຄຳເຫັນເພື່ອການປັບປຸງໃນຕໍ່ໜ້າໂດຍເຂົ້າຮ່ວມເປັນປະທານຂອງທ່ານ ກິແກ້ວ ຈັນທະບູລີ ຮອງລັດ ຖະມົນຕີກະຊວງແຜນການ ແລະການລົງທຶນ, ທ່ານ ນາງ ໂຊໂນມິ ທະນາກະ ຜູ້ຕາງໜ້າ ADB ປະຈໍາ ສປປ ລາວ ໂດຍມີບັນດາຜູ້ຕາງໜ້າຈາກກະຊວງການເງິນ, ໜ່ວຍງານຄຸ້ມຄອງ ແລະໜ່ວຍງານຈັດຕັ້ງປະຕິບັດໂຄງການຈາກບັນດາກະຊວງຕ່າງໆທີ່ກ່ຽວຂ້ອງເຂົ້າຮ່ວມ.

   ທ່ານ ກິແກ້ວ ຈັນທະບູລີ ຮອງລັດຖະມົນຕີ ກະຊວງແຜນການ ແລະການລົງທຶນໂດຍຕາງໜ້າໃຫ້ລັດຖະບານກ່າວວ່າ: ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອທົບທວນຄືນການຈັດຕັ້ງປະຕິບັດວຽກງານທີ່ໄດ້ຮັບການຊ່ວຍເຫຼືອຈາກ ADB ໃນ 1 ປີທີ່ຜ່ານມາວ່າມີອັນດີ,ອັນອ່ອນແນວໃດເພື່ອພ້ອມກັນວາງແຜນໃນການຈັດຕັ້ງປະ ຕິບັດໃນປີຕໍ່ໄປ.

   ສຳລັບໂຄງການຊ່ວຍເຫຼືອຂອງທະນາຄານພັດທະນາອາຊີຢູ່ ສປປ ລາວ ຖືວ່າເປັນໂຄງການທີ່ສໍາຄັນທີ່ສະໜັບສະໜູນໃຫ້ການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ຂອງສປປ ລາວ ໂດຍຕະຫລອດມາ, ຊຶ່ງມາຮອດປະຈຸບັນສັງລວມແລ້ວມີທັງໝົດກວ່າ 39 ໂຄງການ ນັບທັງໂຄງການກູ້ຢືມ ແລະຊ່ວຍເຫຼືອລ້າລວມມູນຄ່າທັງ ໝົດເກືອບ 900 ລ້ານໂດລາສະຫະລັດໃນນັ້ນເງິນກູ້ຢືມແມ່ນ 439,3 ລ້ານໂດລາສະຫະລັດ ແລະເງິນຊ່ວຍເຫຼືອລ້າແມ່ນ 399,1 ລ້ານໂດລາສະຫະລັດ.

  ທ່ານ ນາງ ໂຊໂນມິ ທະນາກະ ຜູ້ຕາງໜ້າ ADB ປະຈໍາ ສປປ ລາວ ກ່າວວ່າ: ໃນຂະນະທີ່ພວມຜະເຊີນກັບການແພ່ລະບາດຂອງພະຍາດໂຄວິດ-19 ເຖິງວ່າຜົນກະ ທົບທາງດ້ານສຸຂະພາບມີໜ້ອຍແຕ່ຜົນກະທົບທາງດ້ານເສດຖະກິດແມ່ນບໍ່ສາມາດວັດຄ່າໄດ້, ຕົວເລກການຄາດຄະເນຂອງ ADB ຫຼ້າສຸດຊີ້ໃຫ້ເຫັນວ່າທ້າຍປີນີ້ອັດຕາການຂະຫຍາຍຕົວຈີດີພີ ຂອງ ສປປ ລາວ ຈະຫຼຸດລົງຈົນຕິດລົບ 2,5%, ຊຶ່ງຫຼຸດຈາກ 5,0% ຂອງອັດຕາການຂະຫຍາຍຕົວໃນປີ 2019.

   ເຖິງແນວໃດກໍຕາມທະນາຄານພັດທະນາອາຊີກຽມພ້ອມທີ່ຈະຊ່ວຍ ສປປ ລາວ ໃນການຮັບມືກັບສິ່ງທ້າຍທາຍຕ່າງໆທີ່ພວມຜະເຊີນຢູ່ໃນຂະນະນີ້, ຂອບເຂດການຊ່ວຍເຫຼືອຂອງ ADB ກວມເອົາຫຼາຍຂະແໜງການ ແລະຂົງເຂດເຊັ່ນ: ການພັດທະນາເທສະບານເມືອງ, ນໍ້າປະປາ ແລະການທ່ອງທ່ຽວຊຶ່ງກວມເອົາສາມສ່ວນຂອງອັດຕາສ່ວນການຊ່ວຍເຫຼືອໃນບັນດາໂຄງການທີ່ ADB ສະໜັບສະໜູນທັງໝົດນອກຈາກນັ້ນ, ຍັງມີຂະແໜງກະສິກຳ ແລະ ຊັບພະຍາກອນທຳມະຊາດກວມເອົາ 29%, ສຶກສາ15%,ຂົນສົ່ງ 13% ແລະສາທາ 4%.

แชร์