ລັດເຂັ້ມງວດຜູ້ໃຊ້ໂດຣນບໍ່ລົງທະບຽນ ອາດຖືກປັບໃໝ

  ການນຳໃຊ້ໂດຣນ (Drone) ຢູ່ເທິງເຂດນ່ານຟ້າຕາມສະຖານທີ່ຕ່າງໆ ໃນຂອບເຂດທົ່ວປະເທດແມ່ນມີມາດຕະການໃນການຄຸ້ມຄອງຕາມລະບຽບ ແລະກົດໝາຍວ່າດ້ວຍການບິນພົນລະເຮືອນເພື່ອເຮັດໃຫ້ການນຳໃຊ້ໂດຣນສາມາດຈັດຕັ້ງປະຕິບັດຕາມລະບົບນິຕິກຳດັ່ງກ່າວແນໃສ່ຮັບປະກັນຄວາມປອດໄພການບິນເພື່ອບໍ່ໃຫ້ມີຜົນກະທົບຕໍ່ສັງຄົມ,ກົມການບິນພົນລະເຮືອນໄດ້ສ້າງ ແລະປະກາດນຳໃຊ້ນິຕິກຳສຳລັບການຄຸ້ມຄອງເຮືອບິນບໍ່ມີຄົນຂັບຊຶ່ງນິຕິກຳດັ່ງກ່າວໄດ້ກຳນົດໃນການຂຶ້ນທະບຽນ, ການອະນຸ ຍາດການບິນ ແລະເຂດບິນຢູ່ໃນລະບຽບການພາກ 17.


  ເພື່ອເຮັດໃຫ້ການຈັດຕັ້ງປະຕິບັດກໍຄືການນຳໃຊ້ໂດຣນຖືກຕ້ອງ ແລະສອດຄ່ອງຕາມລະບຽບການ, ກົມການບິນພົນລະເຮືອນໄດ້ອອກແຈ້ງການສະບັບເລກທີ 2423/ກບພຮ ລົງວັນທີ 7 ຕຸລາ 2020 ເຖິງທຸກພາກສ່ວນທີ່ມີຈຸດປະສົງນຳໃຊ້ໂດຣນ (Drone) ໃຫ້ນຳເອົາໂດຣນ (Drone) ມາຂຶ້ນທະບຽນ ແລະຂໍອະນຸມັດການນຳໃຊ້ຈາກກົມການບິນພົນລະເຮືອນນັບແຕ່ມື້ອອກແຈ້ງການສະບັບດັ່ງກ່າວເປັນຕົ້ນໄປ.


  ການຢັ້ງຢືນ ແລະອະນຸມັດນຳໃຊ້ໂດຣນຢ່າງຖືກຕ້ອງຈະປະກອບມີຂັ້ນຕອນ 1 ການຂຶ້ນທະບຽນ, 2 ການຢັ້ງຢືນຜູ້ປະກອບການ, 3 ການອະນຸມັດເຂດບິນ, 4 ການຢັ້ງຢືນຜູ້ບັງຂັບ.
  ສຳລັບເງື່ອນໄຂຈະຂໍການຢັ້ງຢືນ ແລະອະນຸມັດຈາກກົມການບິນພົນລະເຮືອນຜູ້ປະກອບການຕ້ອງມີໃບຢັ້ງຢືນຄື້ນຄວາມຖີ່ຈາກກົມຄຸ້ມຄອງຄື້ນຄວາມຖີ່ກະຊວງໄປສະ ນີ, ໂທລະຄົມມະນາຄົມ ແລະການສື່ສານ, ສ່ວນເອກະສານອື່ນໆ ທີ່ກ່ຽວພັນກັບການຂຶ້ນທະບຽນ, ການຢັ້ງຢືນຜູ້ປະກອບການ,ການອະນຸມັດເຂດບິນ ແລະການຢັ້ງຢືນຜູ້ບັງຄັບແມ່ນໃຫ້ມາພົວພັນນຳກົມການບິນພົນລະເຮືອນຕາມວັນ ແລະເວລາລັດຖະການກໍລະນີພົບເຫັນການລ່ວງລະເມີດຕາມແຈ້ງການສະບັບນີ້ຈະໄດ້ມີມາດຕະການປັບໃໝຕາມລະບຽບການ.

แชร์