ຄຳໄພ ສົມຊະນະ ຮຽນຈົບພຽງ ປ.4 ກາຍເປັນນັກທຸລະກິດແຖວໜ້າ

  ມະນຸດໃນໂລກນີ້ຈະເກີດມາເປັນຄົນຈົນ ຫຼືຄົນລວຍມັນບໍ່ແມ່ນບັນຫາສຳຄັນແຕ່ມັນຂຶ້ນກັບວ່າເມື່ອຊີວິດກຳເນີດຂຶ້ນແລ້ວຈະເຮັດແນວໃດໃຫ້ຊີວິດເຮົາຢູ່ດີມີຄວາມສຸກເຊັ່ນດຽວກັບທ່ານ ຄຳໄພ ສົມຊະນະ ຊຶ່ງເປັນອີກບຸກຄົນໜຶ່ງທີ່ເກີດໃນຄອບຄົວທຸກຍາກມີອາຊີບພຽງເຮັດໄຮ່ໃສ່ນາຢູ່ຊົນນະບົດສອກຫຼີກແຕ່ເພີ່ນກໍບໍ່ຍອມທໍ້ຖອຍຕໍ່ໂຊກຊາຕາດັ່ງກ່າວຜ່ານຜ່າບັນຫາດ້ວຍຈິດໃຈອົດທົນສູ້ຊົນດ້ວຍຕົ້ນທຶນ ແລະລະດັບການສຶກສາຕໍ່າຈົນສາມາດພິກປີ້ນຊີວິດກ້າວຂຶ້ນມາເປັນນັກທຸລະກິດລະດັບ ແຖວໜ້າຂອງເມືອງລາວ ທີ່ຫຼາຍໆຄົນ ອາດຈະໄດ້ເຄີຍຍີນຊື່ສຽງຮຽງນາມຂອງເພີ່ນແນ່ແລ້ວ.

  ທ່ານ ຄຳໄພ ສົມຊະນະ ປະທານກຸ່ມບໍລິສັດຄຳໄພຊະນະຈຳກັດຜູ້ດຽວເລົ່າປະສົບການຊີວິດກ່ອນຈະມາເຖິງຈຸດນີ້ ໄດ້ຕໍ່ທີມງານໜັງສືພິມ ເສດຖະກິດ-ສັງ ຄົມ ຮູ້ວ່າ: ຕົນເອງແມ່ນເກີດໃນຄອບຄົວ ພໍ່ແມ່ຊາວໄຮ່ຊາວນາ ແລະຊາວສວນທີ່ ທຸກຍາກທີ່ສຸດໃນຂອດເຂດຫ່າງໄກສອກ ຫຼີກ ຮຽນກໍບໍ່ສູງ ຈົບພຽງ ປ.4 ບໍ່ມີໃບປະ ກາດຈົບການສຶກສາ ຈາກການຫຼິງເຫັນ ຄວາມລຳບາກຂອງຊີວິດ ທຳມາຫາກິນດ້ວຍເຫື່ອແຮງທີ່ພໍ່ແມ່ປະຕິບັດມາຫຼາຍ ເຊັ່ນຄົນກໍພໍແຕ່ກຸ້ມຢູ່ກຸ້ມກິນ ຫຼັງເຕີບໃຫຍ່ ສ້າງຄອບຄົວ ຈື່ງໄດ້ຕັດສິນໃຈໜີຈາກ ບ້ານທີ່ເຄີຍຢູ່ອູ່ທີ່ເຄີຍນອນຂອບເຂດຊົນ ນະບົດ ເມືອງແກ້ວອຸດົມ ແຂວງວຽງຈັນ ມາສູ້ຊີວິດຢູ່ນະຄອນຫຼວວຽງຈັນ.

  ຊີວິດທຳອິດໃນຕົວໃຫຍ່ທີ່ມີຜູ້ຄົນຈາກ ຫຼາກຫຼາຍທ້ອງຖີ່ນ ມາຢູ່ໂຮມກັນການ ແກ້ງແຍ້ງແຂ່ງຂັນທຳມາຫາກິນແມ່ນມີ ສູງເບື້ອງຕົ້ນດ້ວຍທຶນຮອນບໍ່ມີໄດ້ໄປ ຮຽນຕີເງິນຕີຄຳ ເປັນພໍ່ຄ້ານ້ອຍໆ ຮັບ ເຄື່ອງນຸ່ງຫົ່ມມືສອງ, ແປ້ງນົມ, ເກີບ, ເປັດ, ໄກ່ໝາກໄມ້ ແລະເຄື່ອງໃຊ້ສອຍຕ່າງໆຕາມເງິນທຶນທີ່ມີໄປຍ່າງເລາະຂາຍຢູ່ຊົນນະບົດຫ່າງໄກສອກຫຼີກໃນຕ່າງແຂວງເປັນຕົ້ນແມ່ນທາງພາກເໜືອທີ່ພໍ່ຄ້າມືໃຫຍ່ໄປບໍ່ຮອດຂຶ້ນພູລົງຫ້ວຍທຸລະກັນດານພໍເກັບຫ້າເກັບສີບມາລ້ຽງຄອບຄົວ.

  ຫຼັງຈາກເຮັດແນວນັ້ນຕໍ່ເນື່ອງມາໄດ້ 3-4 ປີກໍສາມາດທ້ອນເງິນໄດ້ຈຳນວນໜຶ່ງ ປີ 1990 ກໍໄດ້ສ້າງໂຮງຊອຍໄມ້ນ້ອຍໆມີຊ່າງ 1 ຄົນ ກຳມະກອນ 2 ຄົນ ຈັກຊອຍ 3 ແຮງມ້າ ເຮັດມາ 2-3 ປີ ກໍເປີດຮ້ານຂາຍໄມ້ແປຮູບນ້ອຍໆຄວບຄູ່ກັນໄປໃນ ປີ 1998 ແລ້ວຈື່ງມາເປີດເປັນບໍລີສັດ ຄຳໄພ ຊະນະ ກ່ອນຈະກ້າວມາເປັນກຸ່ມບໍລິສັດຄຳໄພຊະນະຈຳກັດຜູ້ດຽວໃນເວລາຕໍ່ມາ.

  ທ່ານ ຄຳໄພ ສົມຊະນະ ເລົ່າຕື່ມວ່າ: ນັບແຕ່ນັ້ນມາກຸ່ມບໍລິສັດໄດ້ມີການຂະຫຍາຍທຸລະກິດອອກໄປຕື່ມເລື້ອຍໆເປັນ 10 ກວ່າກິດຈະການເປັນຕົ້ນແມ່ນເຮັດກ່ຽວກັບເຄຫາສະຖານຂົວທາງ ແລະ ຊົນລະປະທານ, ຄອນກຣີດແຫຼວ ແລະຜະລິດຕະພັນຄອນກຣີດ, ໂຮງງານຜະລິດເຟີນິເຈີ,  ແລະຜະລິດຕະພັນໄມ້ຕົກແຕ່ງພາຍໃນ ແລະນອກເຄຫາສະຖານ, ຕອກເຈາະ ແລະອັດເສົາເຂັມທຸກປະເພດ, ບໍລິສັດຄຳໄພຊະນະປູກໄມ້ ແລະຟາມຄົບວົງຈອນ, ບໍລິການທ່ອງທ່ຽວ ແລະຣີສອດ ແລະກິດຈະການອື່ນໆອີກ.

  ມາຮອດປີນີ້ກໍຄົວຮອບ 20 ປີພໍດີຊຶ່ງຈະມີການຈັດສະເຫຼີມສະຫຼອງຄົບຮອບວັນສ້າງຕັ້ງຢ່າງຍິ່ງໃຫຍ່ໃນວັນທີ 22 ກຸມພານີ້ ໄປພ້ອມກັບການເປີດຫ້ອງການ ໃໝ່ສູງ 10 ກວ່າຊັ້ນທີ່ບ້ານ ທົ່ງສາງນາງ ນະຄອນຫຼວງວຽງຈັນ ທ່ານປະທານກຸ່ມ ບໍລິສັດ ຄຳໄພ ຊະນະ ຈຳກັດຜູ້ດຽວເລົ່າຕື່ມວ່າ: ຊີວິດມາເຖິງຈຸດນີ້ໄດ້ແມ່ ນຜ່ານຜ່າຄວາມລຳບາກສາຫັດ ແຕ່ດ້ວຍຈິດໃຈ ອັນກ້າແກ່ນອົດທົນ ເຮັດແທ້ທຳຈິງ ທຸກສີ່ງ ຢ່າງທີ່ເຮັດຈຶ່ງດຳເນີນໄປໄດ້ດີເຖິງຕົ້ນ ທຶນຊີວິດ ແລະລະດັບການສຶກສາຈະມີ ນ້ອຍກໍບໍ່ໄດ້ເປັນອຸປະສັກ ແລະກໍບໍ່ໄດ້ ວັດຕໍ່ການດຳເນີນທຸລະກິດຂອງຄຳໄພ ຊະນະ ຈຶ່ງສອດຄ່ອງກັບຄຳເວົ້າຂອງ ແມ່ ເຖົ້າເພີ່ນໄດ້ວ່າໄວ້ເມື່ອ 30 ປີກ່ອນວ່າ ເພີ່ນຂີ່ຊ້າງ ເຮົາຂີ່ແມວ ບຸນແມວ ມີຈຶ່ງຈະ ໄປເຖິງພຽງຊ້າງ ຊຶ່ງເປັນຄຳເວົ້າທີ່ສ້າງ ແຮງບັນດານໃຈໃຫ້ກັບ ຄຳໄພ ສົມຊະນະ ຕະຫຼອດ 20 ກວ່າປີຜ່ານມາ.

  ຂະນະທີ່ໃນຕໍ່ໜ້າທ່ານ ຄຳໄພ ສົມຊະນະ ໄດ້ວາງຫຼາຍວິໄສທັດໃນການພັດທະນາເປັນຕົ້ນແມ່ນຈະປັບປຸງວຽກທີ່ຍັງບໍ່ໄດ້ມາດຕະຖານຂອງການກໍ່ສ້າງເຄຫາ, 2 ເນັ້ນຜະລິດກະສິກຳເປັນສິນຄ້າສົ່ງ ອອກ ດ້ວຍການສົ່ງເສີມປະຊາຊົນມີສ່ວນຮ່ວມມີອາຊີບ ແລະລາຍໄດ້, 3 ເນັ້ນໃສ່ ຕ້ອງພັດທະນາທ່ອງທ່ຽວແບບຍືນຍົງສີຂຽວຮ່ວມກັບການສ້າງອາຊີບປະຊາຊົນ, 4 ເນັ້ນສັງຫາລິມະຊັບ ແລະ 5 ຈະສ້າງຫ້ອງວາງສະແດງສິນຄ້າເຟີນິເຈີເພື່ອຮັບຊື້ຈາກໂຮງງານຕ່າງໆໃນທົ່ວປະເທດໂດຍຈະຈັດໃສ່ແຫຼ່ງທ່ອງທ່ຽວທຳມະຊາດຕາດຊອນ.

ນສພ ເສດຖະກິດ-ສັງຄົມ

แชร์