ສຳເລັດຝຶກຊ້ອມສະແດງຊ້າງຄຳຮູ້ບຸນຊ້າງໄຊຍະ

  ການຝຶກຊ້ອມຊ້າງຄໍາຮູ້ເພື່ອສະແດງໃນງານມະຫາກໍາບຸນຊ້າງທີ່ຈັດຂຶ້ນຢ່າງເປັນທາງການໃນວັນທີ 23 ກຸມພາ 2019 ນີ້ ທີ່ແຂວງໄຊຍະບູລີ ແມ່ນພ້ອມ ແລ້ວ 100% ໂດຍຈະມີຊ້າງ 70 ໂຕເຂົ້າ ຮ່ວມສະແດງຄວາມສາມາດ.

   ທ່ານ ສົມພານ ຈໍາປາດາ ຄະນະຮັບຜິດຊອບຝຶກແອບຊ້າງຄໍາຮູ້ໄດ້ເປີດເຜີຍວ່າ: ການຝຶກແອບຊ້າງຄໍາຮູ້ເພື່ອສະແດງໃນງານເປີດມະຫາກໍາບຸນຊ້າງຄັ້ງທີ XIII ທີ່ແຂວງໄຊຍະບູລີແມ່ນໄດ້ເລີ່ມມາແຕ່ເດືອນມັງກອນມາຮອດປະຈຸບັນແມ່ນພ້ອມແລ້ວ 100% ເຊິ່ງມີຊ້າງເຂົ້າຮ່ວມທັງໝົດ 70 ໂຕ ໃນນີ້ຊ້າງຄຳຮູ້ 20 ໂຕ. ການສະແດງແມ່ນມີທັງໝົດ 19 ລາຍການເຊັ່ນ: ຊ້າງຊັກທຸງຊາດຂຶ້ນເສົາ, ມີຊ້າງຄໍາຮູ້ໂຕໜຶ່ງຊ້າງມອບຊໍດອກໄມ້, ມີຊ້າງ 5 ໂຕ ຊ້າງຕໍ່ໂຕກັນ, ຊ້າງແລ່ນສົ່ງໄມ້ກັນສາມຈຸດ, ມີຊ້າງ 8 ໂຕຊ້າງ ຄົນຂຶ້ນນັ່ງງວງ, ມີຊ້າງ 2 ໂຕຊ້າງໂຍນບານບ້ວງ, ຊ້າງ 2 ໂຕຊ້າງຈັບງວງກັນໃຫ້ຄົນນັ່ງ, ຊ້າງ 2 ໂຕຊ້າງ ຍ່າງຂ້າມຄົນນອນ, ຊ້າງ 4 ໂຕຊ້າງຢືນບິ່ນໜ້າ ແລະບິ່ນຫຼັງໃສ່ ກັນຍົກ ສອງຂາໜ້າໃສ່ຊ້າງສາມໂຕ, ຊ້າງຍູ້ລໍ້ ຄົນນັ່ງ, ຊ້າງ 2 ໂຕ ຄົນນອນລົງໃຫ້ຊ້າງຢຽບໂຕ, ຊ້າງຊັດໝາກປຸ່ມເປົ້າ, ຊ້າງ 2 ໂຕ ຊ້າງຟ້ອນລໍາວົງລາວກັບຄົນ, ຊ້າງ 4 ໂຕ ຊ້າງໃສ່ໝວກໃຫ້ຄົນ, ຊ້າງ 2 ໂຕ ຊ້າງຕັ້ງຫົວຜັກທຽມຊ້າງ 3 ໂຕ, ຊ້າງເອົາງວງກິ່ງຝຸຍຊ້າງ 4 ໂຕ, ຊ້າງ ແຕ້ມ, ຮູບຊ້າງ 2 ໂຕ, ຊ້າງຢືນຍົກສອງຂາໜ້າຊ້າງ 3 ໂຕ, ຊ້າງນັ່ງຍົກສອງຂາໜ້າລຽນແຖວຊ້າງ 3 ໂຕ, ຊ້າງມອບຊໍ້ ດອກໄມ້ໃຫ້ຄົນຊ້າງ 2 ໂຕ ແລະແກ່ວງບ້ວງຊ້າງ 2 ໂຕ.

  ແຕ່ລະກິດຈະກຳທັງໝົດນັ້ນແມ່ນຈະໄດ້ສະແດງເລີ່ມແຕ່ວັນທີ 23 -28 ກຸມພາ 2019. ໃນແຕ່ລະວັນແມ່ນມີການສະແດງຊ້າງຄໍາຮູ້ບັນດາທ່ານແຂກພາຍໃນ ແລະ ຕ່າງປະເທດ ຈຶ່ງໄດ້ຫາໂອກາດມາທ່ຽວມາຊົມໃນງານມະຫາກໍາບຸນຊ້າງຄັ້ງທີ XIII ທີ່ແຂວງໄຊຍະບູລີແລ້ວທ່ານຈະມີຄວາມເບີກບານມ່ວນຊື່ນກັບບັນດາກິດຈະກໍາຕ່າງໆຂອງຊ້າງ.

ຂ່າວ: ບຸນທີ-ນສພ ເສດຖະກິດ-ສັງຄົມ     

แชร์