ປີນີ້ຈະເກັບລາຍຮັບພາຍໃນໃຫ້ໄດ້ 100% ຂອງແຜນດັດແກ້

  ການຈັດຕັ້ງປະຕິບັດຈັດເກັບລາຍຮັບເຂົ້າງົບປະມາແຫ່ງລັດໃນ 9 ເດືອນ ຜ່ານມາສາມາດປະຕິບັດໄດ້ 14.674 ຕື້ກີບ ເທົ່າກັບ 64,57% ຂອງແຜນດັດແກ້ ແລະລາຍຈ່າຍ17.902ຕື້ກີບ ເທົ່າກັບ 54,18% ຂອງແຜນດັດແກ້,ຊຶ່ງໝົດປີຈະສູ້ຊົນເກັບລາຍຮັບໃຫ້ໄດ້ຕາມແຜນດັດແກ້ທີ່ສະພາແຫ່ງຊາດຮັບຮອງຈໍານວນ22.725 ຕື້ກີບ ໃນນີ້ລາຍຮັບພາຍໃນຄາດວ່າຈະສາມາດປະຕິບັດໄດ້ 100% ຂອງແຜນດັດແກ້.

  ທ່ານ ສົມດີ ດວງດີ ຮອງນາຍົກລັດຖະມົນຕີກະຊວງການເງິນລາຍງານຕໍ່ກອງປະຊຸມສະພາວ່າ: ແຜນງົບປະມານປີ 2020 ເປັນປີມ້ວນທ້າຍຂອງແຜນ 5 ປີ ຄັ້ງທີ VIII, ຊຶ່ງເປັນແຜນທີ່ມີຄາດໝາຍສູ້ຊົນສູງທັງໄດ້ຮັບຜົນກະທົບຫຼາຍສົມຄວນຈາກສະພາບການປ່ຽນແປງຢູ່ພາຍໃນ ແລະ ຕ່າງປະເທດເປັນຕົ້ນການແຜ່ລະບາດຂອງພະຍາດໂຄວິດ-19 ຊຶ່ງລັດຖະບານໄດ້ມີນະໂຍບາຍພາສີ-ອາກອນ ຕໍ່ຫົວໜ່ວຍທຸລະກິດເປັນເວລາ 3 ເດືອນ, ພ້ອມນັ້ນຍັງໄດ້ຮັບຜົນກະທົບຈາກການປະຕິບັດນິຕິກໍາຈໍານວນໜຶ່ງເຊັ່ນ: ປັບປຸງອັດຕາການເກັບອາກອນກໍາໄລຈາກ 24% ມາເປັນ 20%, ປັບປຸງຖານຍົກເວັ້ນອາກອນລາຍໄດ້ຈາກເງິນເດືອນ 1,1 ລ້ານກີບ ມາເປັນ 1,3 ລ້ານກີບ ແລະອາກອນຊົມໃຊ້ບາງປະເພດສິນຄ້ານໍາອີກຊຶ່ງສົ່ງຜົນກະທົບຕໍ່ການເກັບລາຍງົບປະມານ, ດັ່ງນັ້ນລັດຖະບານຈຶ່ງໄດ້ສະເໜີສະພາແຫ່ງຊາດເພື່ອດັດແກ້ແຜນລາຍຮັບ, ລາຍຈ່າຍ ແລະດັດແກ້ການຂາດດຸນເພີ່ມຈາກ 3,77% ມາເປັນ 5,8% ຕໍ່ປີ.

 ນອກຈາກນັ້ນກະຊວງການເງິນກໍໄດ້ຄົ້ນຄວ້າ ແລະອອກຫຼາຍມາດຕະການເພື່ອຊຸກຍູ້ການເກັບລາຍຮັບ ແລະຄຸ້ມຄອງລາຍຈ່າຍແນໃສ່ເຮັດໃຫ້ການຈັດຕັ້ງປະຕິບັດແຜນງົບປະມານແຫ່ງລັດໄດ້ຕາມແຜນ, ຊຶ່ງໃນ 9 ເດືອນຜ່ານມານີ້ສາມາດເກັບລາຍຮັບໄດ້ທັງໝົດ 14.674 ຕື້ກີບ ເທົ່າກັບ 64,57% ຂອງແຜນດັດແກ້ໃນນັ້ນລາຍຮັບພາຍໃນປະຕິບັດໄດ້ 13.563 ຕື້ກີບ ເທົ່າກັບ 66,36% ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 15% (ລາຍຮັບສູນກາງ 10.652 ຕື້ກີບ,ລາຍຮັບທ້ອງຖິ່ນ 2.911 ຕື້ກີບ) ແລະລາຍຮັບຈາກການຊ່ວຍເຫຼືອລ້າປະຕິບັດໄດ້ 1.111 ຕື້ກີບ ເທົ່າກັບ 48,59% ຂອງແຜນດັດແກ້.

 ສ່ວນດ້ານລາຍຈ່າຍ 9 ເດືອນຜ່ານມາປະຕິບັດໄດ້ 17.902 ຕື້ກີບ ເທົ່າກັບ 54,18% ຂອງແຜນດັດແກ້, ໃນນີ້ຂັ້ນສູງກາງ 12.349 ຕື້ກີບ ເທົ່າກັບ 50,68% ແລະຂັ້ນທ້ອງຖິ່ນ 5.554 ຕື້ກີບ ເທົ່າກັບ 64,02% ຂອງແຜນດັດແກ້, ສໍາລັບການດຸ່ນດ່ຽງແມ່ນມີການຂາດດຸນງົບປະມານ 3.228 ຕື້ກີບ, ນອກນັ້ນຍັງຕ້ອງ ການທຶນເພື່ອທົດແທນຄືນຕົ້ນທຶນເງິນກູ້ຢືມພາຍໃນ ແລະຕ່າງປະເທດຢູ່ແຫຼ່ງດຸ່ນດ່ຽງ 5.455 ຕື້ກີບ, ສັງລວມແລ້ວຄວາມຕ້ອງການແຫຼ່ງທຶນເພື່ອມາດຸ່ນດ່ຽງໃນ 9 ເດືອນມີຈໍານວນ 8.883 ຕື້ກີບ.

  ຢ່າງໃດກໍຕາມເຖິງວ່າແຜນງົບປະມານແຫ່ງລັດໃນໄລຍະ 9 ເດືອນ ຈະບໍ່ສາມາດປະຕິບັດໄດ້ດີເທົ່າທີ່ຄວນແຕ່ກະຊວງການເງິນຈະສືບຕໍ່ຊຸກຍູ້ການເກັບລາຍຮັບ ແລະຄຸ້ມຄອງລາຍຈ່າຍຢູ່ບັນດາຂະແໜງການ ແລະທ້ອງຖິ່ນໃນຂອບເຂດທົ່ວປະເທດເພື່ອສູ້ຊົນການເກັບລາຍຮັບໃຫ້ບັນລຸຕາມແຜນດັດແກ້ ທີ່ສະພາແຫ່ງຊາດໄດ້ຮັບຮອງຈໍານວນ 22.725 ຕື້ກີບ ໃນນັ້ນລາຍຮັບພາຍໃນຄາດວ່າຈະປະຕິບັດໄດ້ 20.438 ຕື້ກີບ ເທົ່າກັບ 100% ຂອງແຜນດັດແກ້, ສ່ວນລາຍຈ່າຍຄາດວ່າຈະຈ່າຍບໍ່ເກີນ 32.580 ຕື້ກີບ ເທົ່າກັບ 98,60% ຂອງແຜນດັດແກ້.

แชร์