ຍ້ອນພັກ-ລັດ ທຸລະກິດເຄແອນບີເຟີນີເຈີ ເຕີບໃຫຍ່ຢ່າງບໍ່ຢຸດຢັ້ງ

  ພັກ ແລະລັດຖະບານແຫ່ງ ສປປ ລາວ ຍາມໃດກໍໄດ້ໃຫ້ຄວາມສຳຄັນ ແລະໄດ້ຖືເອົາການພັດທະນາເສດຖະກິດເປັນໃຈກາງ, ສ້າງເງື່ອນໄຂອຳນວຍຄວາມສະດວກໃຫ້ກຳລັງການຜະລິດ ຂະຫຍາຍຕົວຢ່າງແຂງແຮງ, ຫັນປ່ຽນເສດຖະກິດທຳມະຊາດໄປສູ່ເສດຖະກິດການຄ້າສ້າງເສດຖະກິດຕະຫຼາດຕາມທິດສັງຄົມນິຍົມໃຫ້ສົມບູນຍີ່ງໆຂຶ້ນຊຶ່ງສີ່ງດັ່ງກ່າວໄດ້ກາຍເປັນກຸນແຈສຳຄັນໃຫ້ພາກຫົວໜ່ວຍທຸລະກິດໃນຂະແໜງການຕ່າງໆ ມີການເຕີບໃຫຍ່ຂະຫຍາຍຕົວຂຶ້ນມາເລື້ອຍໆ ໂດຍສະເພາະແມ່ນທຸລະ ກິດກ່ຽວເຟີນິເຈີໄມ້.
   ທ່ານ ກອງມາລາ ພົມມະໄລ ຮອງປະທານສະມາຄົມເຟີນີເຈີລາວເຈົ້າຂອງໂຮງງານເຄແອນບີເຟີນີເຈີ ຊຶ່ງຕັ້ງຢູ່ບ້ານໂສກປາຫຼວງ ເມືອງສີສັດຕະນາກ ນະຄອນຫຼວງວຽງຈັນ ໃຫ້ສຳພາດວ່າ: ໃນນາມເປັນຄົນລາວກໍຄືນັກທຸລະກິດຜູ້ໜຶ່ງຮູ້ສຶກມີຄວາມພາກພູມໃຈເປັນຢ່າງສູງທີ່ເກີດຢູ່ໃນຜືນແຜ່ນດິນລາວ ແລະຂໍສະແດງຄວາມຍ້ອງຍໍສັນລະເສີນ ແລະ ຮູ້ບຸນຄຸນຢ່າງລົ້ນເຫຼືອຕໍ່ຜົນສຳເລັດອັນຍີ້ງໃຫຍ່ໃນການຊີ້ນຳ-ນຳພາຂອງພັກປະຊາຊົນປະຕິວັດລາວນັບແຕ່ສະໄໝຕໍ່ສູ້ກູ້ຊາດເປັນຕົ້ນມາພາຍຫຼັງປະ ເທດຊາດໄດ້ຮັບການປົດປ່ອຍ ແລະປະກາດສ້າງຕັ້ງ ສປປ ລາວ ຂຶ້ນໃນວັນທີ 2 ທັນວາ 1975 ພັກປະຊາຊົນປະຕິວັດລາວ ແລະ ລັດຖະບານແຫ່ງ ສປປ ລາວ ກໍໄດ້ສືບຕໍ່ວາງແນວທາງນະໂຍບາຍນຳພາປະເທດຊາດໄປສູ່ການປົກປັກຮັກສາ ແລະສ້າງສາພັດທະນາປະເທດຊາດຊຶ່ງພັກ ແລະລັດຖະບານໄດ້ມີຄວາມສະດຸ້ງໄວຮູ້ໝູນໃຊ້ທິດສະ ດີປະຕິວັດເຂົ້າໃສ່ວຽກງານການພັດທະນາເສດຖະກິດ-ສັງຄົມເຊື່ອມໂຍງກັບພາກພື້ນ ແລະສາກົນເຮັດໃຫ້ການເມືອງມີຄວາມໝັ້ນຄົງ, ເສດຖະກິດແຫ່ງຊາດນັບມື້ເຂັ້ມແຂງຊີວິດການເປັນຢູ່ຂອງປະຊາຊົນລາວບັນດາເຜົ່າໄດ້ຮັບການປັບປຸງ ແລະຫຼຸດພົ້ນອອກຈາກຄວາມທຸກຍາກເທື່ອລະກ້າວ.
   ທ່ານ ກອງມາລາ ພົມມະໄລ ກ່າວຕື່ມວ່າ: ພາຍໃຕ້ການຊີ້ນຳ-ນຳພາຂອງພັກ ແລະລັດຖະບານແຫ່ງ ສປປ ລາວ ຕໍ່ຂະແໜງເສດຖະກິດເວົ້າສະເພາະແມ່ນທຸລະກິດເຟີນີເຈີໃນລາວຊຶ່ງສະມາຄົມໄດ້ເຕົ້າໂຮມຄວາມສາມັກຄີສະມາຊິກເຮັດການຜະລິດສິນຄ້າຕອບສະໜອງໄດ້ຕາມຄວາມຕ້ອງການຂອງຕະຫຼາດພາຍໃນ ແລະຕ່າງປະເທດ ແລະມີທ່າເຕີບໃຫຍ່ຂະຫຍາຍໄປເລື້ອຍໆໃນອະນາຄົດ.
 ສຳລັບໂຮງງານເຄແອນບີເຟີນີເຈີນັບແຕ່ມື້ສ້າງຕັ້ງຂຶ້ນໃນປີ 1987 ເປັນຕົ້ນມາກໍໄດ້ໃຫ້ຄວາມເຊື່ອໝັ້ນຕໍ່ແນວທາງນະໂຍບາຍຂອງພັກ ແລະລັດຖະບານໃນແຕ່ລະໄລຍະໂດຍໄດ້ບຸກໜ້າບືນຕົວພັດທະນາຕົນເອງມາຢ່າງບໍ່ຢຸດຢັ້ງເປັນຕົ້ນແມ່ນການຜະລິດ ແລະການຈຳໜ່າຍດ້ວຍການນຳສິນຄ້າເຂົ້າຮ່ວມງານວາງສະແດງໃນລະດັບຕ່າງໆຢູ່ພາຍໃນ ແລະຕ່າງປະເທດອັນເຮັດມີຄວາມຄຶກຄື້ນ ແລະເປັນໜ້າຕາສ້າງຊື່ສຽງສຳຄັນແກ່ສິນຄ້າຍີ່ຫໍ້ຂອງລາວ.
   ຈາກຜົນງານດັ່ງກ່າວໃນຜ່ານມາຈຶ່ງໄດ້ຮັບຫຼຽນໄຊແຮງງານພັດທະນາຊັ້ນ 1 ຈຳນວນ 1 ໜ່ວຍ, ຫຼຽນໄຊແຮງງານພັດທະນາຊັ້ນ 3 ຈຳນວນ 1 ໜ່ວຍ ແລະ ໃບຍ້ອງຍໍຂັ້ນຕ່າງໆຈາກພັກ ແລະລັດຖະບານຫຼາຍໆໃບທັງນີ້ສາມາດເວົ້າໄດ້ວ່າພາຍໃຕ້ການການຊີ້ນຳ-ນຳພາຂອງພັກ ແລະລັດຖະບານໄດ້ເຮັດໃຫ້ ສປປ ລາວ ເຮົາມີໂສມ ໜ້າໃໝ່ ແລະ ມີການປ່ຽນແປງທີ່ຕັ້ງໜ້າ ແລະ ຮອບດ້ານບໍ່ມີຍຸກໃດສະໄໝໃດທີ່ປະເທດຊາດຈະຖືກພັດທະນາໃຫ້ຈະເລີນຮຸ່ງເຮືອງຄືແນວນີ້ຍ້ອນມີພັກນຳພາປະເທດພວກເຮົາກໍຄືທຸລະກິດຂອງຂ້າພະເຈົ້າຈຶ່ງມີການເຕີບໃຫຍ່ຂະຫຍາຍຕົວມາເຖິງທຸກວັນນີ້ຊຶ່ງປະຈຸບັນນີ້ໄດ້ມີການສ້າງແຫຼ່ງທ່ອງທ່ຽວເປັນທຸລະກິດໃໝ່ຂອງບໍລິສັດໂດຍກຽມເປີດໄວໆນີ້ທີ່ບ້ານບໍ່ນາງົວ ເມືອງຈັນທະບູລີ ນະຄອນຫຼວງວຽງຈັນ.
  ເນື່ອງໃນໂອກາດກ້າວເຂົ້າສູ່ກອງປະຊຸມໃຫຍ່ຄັ້ງທີ xi ຂອງສູນກາງພັກ ແລະວັນຄົບຮອບ 45 ປີ ຂອງການສ້າງຕັ້ງ ສປປ ລາວ ທ່ານ ກອງມາລາ ພົມມະໄລ ໄດ້ຕາງ ໜ້າໃຫ້ກັບສະມາຄົມເຟີນີເຈີລາວ ແລະໂຮງງານເຄແອນບີເຟີນີເຈີອວຍພອນໄຊອັນປະເສີດໃຫ້ແກ່ທ່ານຜູ້ນຳພັກ-ລັດ ຈົ່ງມີສຸຂະພາບເຂັ້ມແຂງສືບຕໍ່ຊີ້ນຳໆ ພາພັດທະນາປະເທດຊາດໃຫ້ຈະເລີນກ້າວໜ້າຕໍ່ໄປໃນອະນາຄົດ.

แชร์