ເປີດແລ້ວຮ້ານປີ້ງແບ້ແກ້ວຄູນເມືອງສາຂາ 2 ມາພ້ອມແຈ່ວສູດເດັດແຊບສຸດໃນນະຄອນຫຼວງ

  ເປີດແລ້ວ ຮ້ານປີ້ງແບ້ ແກ້ວຄູນເມືອງ ສາຂາ 2 ເຊິ່ງເປັນປີ້ງແບ້ທີ່ມີຊີ້ນຫອມ ແຈ່ວສູດເດັດ ສະເພາະຮ້ານນີ້ເທົ່ານັ້ນໃນ ນະຄອນຫຼວງວຽງຈັນ ທີ່ທ່ານຈະໄດ້ຊີມຣົດຊາດ, ໂດຍຮ້ານປີ້ງແບ້ແຫ່ງນີ້ບົ່ງບອກເຖິງລົດສະນິຍົມຂອງຄົນທີ່ຮັກສຸຂະພາບ ແລະລົດຊາດອາຫານຊັ້ນເລີດ.

  ປີ້ງແບ້ ຖືວ່າເປັນອາຫານຍອດນິຍົມຂອງຄົນໃນປະຈຸບັນໂດຍຮ້ານປີ້ງແບ້ແກ້ວຄູນເມືອງກໍເປັນອີກຮ້ານໜຶ່ງທີ່ມີເອກະລັກສະເພາະໃນການໝັກຊີ້ນແບ້ໃຫ້ນຸ້ມ, ປີ້ງແລ້ວຫອມກິນກັບແຈ່ວສູດເດັດຂອງຮ້ານຖືວ່າສຸດຍອດ.

ໃນວັນທີ 17 ຕຸລາ 2020, ໄດ້ມີພິທີເປີດຮ້ານປີ້ງແບ້ ແກ້ວຄູນເມືອງ ສາຂາ 2, ເຊິ່ງຕັ້ງຢູ່ທີ່ບ້ານນາຄຳ,ເມືອງສີໂຄດຕະບອງ,ນະຄອນຫຼວງວຽງຈັນ ຕິດກັບໂຮງແຮມ ແລະພັດຕະຄານດາວຄໍາ.

  ທ່ານນາງ ສົດໃສ ຂຸນລິວົງ, ເຈົ້າຂອງຮ້ານປີ້ງແບ້ ແກ້ວຄູນເມືອງ ສາຂາ 2 ກ່າວວ່າ: ຂອງຮ້ານປີ້ງແບ້ ແກ້ວຄູນເມືອງ ສາຂາ 2, ເປັນທຸລະກິດເດີມຂອງຄອບຄົວທີ່ພໍ່ ແລະແມ່ໄດ້ສ້າງຂຶ້ນມານັບເປັນເວລາ 50 ກວ່າປີ ເປັນຮ້ານປີ້ງແບ້ຮ້ານທຳອິດໃນນະຄອນຫຼວງວຽງຈັນ, ຈາກປະສົບການທີ່ຢູ່ໃນຄອບຄົວ ແລະໄດ້ຮຽນຮູ້ວິທີການຕ່າງໆ ໃນທຸກເລື່ອງທີ່ນຳເອົາແບ້ມາປຸງແຕ່ງເປັນອາຫານໄດ້ຫຼາກຫຼາຍຊະນິດເຊັ່ນ: ແລມໂບ້ແບ້, ຜັດເຜັດແບ້, ອົ່ວເລືອດແບ້, ຜັດຊີ້ນແບ້ພິກໄທດຳ, ຈຸ່ມເພ້ຍ ແລະເມນູອື່ນໆ.

   ພ້ອມນີ້ ຮ້ານປີ້ງແບ້ ແກ້ວຄູນເມືອງ ສາຂາ 2 ຍັງມີປີ້ງຫໍາແບ້, ກ້ອຍຫໍາແບ້ ແລະຫໍາແບ້ແຊ່ນໍ້າປາອີກດ້ວຍ. ແຕ່ສໍາລັບເມນູລູກຄ້ານິຍົມຮັບປະທານກັນຫຼາຍທີ່ສຸດກໍຄືປະເພດປີ້ງເຊິ່ງເປັນເມນູເດັດດ້ວຍລົດຊາດທີ່ມີສູດສະເພາະຂອງຮ້ານແກ້ວຄູນເມືອງເທົ່ານັ້ນ, ມີວິທີການໝັກຊີ້ນແບ້ດ້ວຍເຄື່ອງເທດທີ່ຄັດສັນມາເປັນພິເສດ ແລະ ແຈ່ວສູດເດັດທີ່ປຸງແຕ່ງໃໝ່ທຸກວັນ, ນອກນີ້ຮ້ານຂອງເຮົາໃສ່ໃຈໃນເລື່ອງຂອງຄຸນນະພາບອາຫານເພື່ອໃຫ້ໄດ້ລົດຊາດອອກມາດີທີ່ສຸດໃຫ້ທຸກທ່ານໄດ້ຮັບປະທານປີ້ງແບ້ທີ່ມີລົດຊາດທີ່ແທ້ຈິງຂອງຊີ້ນແບ້ ແລະເຮົາກໍຄຳນຶງເຖິງລູກຄ້າທຸກທ່ານທີ່ເຂົ້າມາໃຊ້ບໍລິການໃນຮ້ານໃຫ້ເກີດຄວາມສຸກໃນການຮັບປະທານອາຫານໄປພ້ອມກັບການບໍລິການທີ່ສົມບູນແບບທຸກຢ່າງເພື່ອຕ້ອນຮັບລູກຄ້າທຸກທ່ານດ້ວຍການອອກແບບຂອງຮ້ານເຮົາເນັ້ນທີ່ຄວາມສະອາດ, ບັນຍາກາດຮົ່ມເຢັນນັ່ງສະບາຍຜ່ອນຄາຍ, ເປັນກັນເອງເໝາະສຳຫຼັບການພົບປະສັງສັນຂອງກຸ່ມໝູ່ເພື່ອນ, ນັກທຸລະກິດ, ກຸ່ມພະນັກງານບໍລິສັດ ແລະທຸກທ່ານທີ່ນິຍົມຮັບປະທານປີ້ງແບ້.

แชร์