ຫຼາຍພາກສ່ວນມອບເຄື່ອງໃຫ້ຜູ້ປະສົບໄພນໍ້າຖ້ວມແຂວງສະຫວັນນະເຂດ

  ເມື່ອບໍ່ດົນມານີ້, ຫຼາຍພາກສ່ວນຊຶ່ງລວມມີສຳນັກງານອົງການພັກ-ລັດ ແລະບໍລິສັດເອກະຊົນໄດ້ນຳເອົາເຄື່ອງຊ່ວຍເຫຼືອບັນເທົາທຸກມອບ ໃຫ້ຜູ້ປະສົບໄພນໍ້າຖ້ວມ ແຂວງສະຫວັນນະເຂດ.

  ພິທີມອບ-ຮັບເຄື່ອງຊ່ວຍເຫຼືອໄພພິບັດນໍ້າຖ້ວມໄດ້ຈັດຂຶ້ນຢູ່ຫ້ອງວ່າການປົກຄອງ ແຂວງສະຫວັນນະເຂດຊຶ່ງປະກອບມີ: ຄະນະພັກ-ຄະນະປົກຄອງແຂວງສາລະວັນທີ່ໄດ້ປະກອບສ່ວນເງິນສົດຈຳນວນ 67 ລ້ານກີບ ແລະເຄື່ອງບໍລິໂພກ-ອຸປະໂພກມູນຄ່າ 57 ລ້ານກວ່າກີບ, ກອງພັນໃຫຍ່ປ້ອງກັນອາກາດ 644 ມອບເງິນສົດຈຳນວນ 10 ລ້ານກີບ, ທະນາຄານ ພົງສະຫວັນຈຳກັດມອບເຄື່ອງຊ່ວຍເຫຼືອມູນຄ່າ 45 ລ້ານກີບ, ຄະນະພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງມອບເຄື່ອງຊ່ວຍເຫຼືອໃນມູນຄ່າ 3,6 ລ້ານກີບ, ສະຖາບັນການ ເງິນຈຸລະພາກທີ່ຮັບເງິນຝາກສາຍໃຍສຳພັນມອບເຄື່ອງຊ່ວຍເຫຼືອມູນຄ່າ 15 ລ້ານກີບ, ກຸ່ມບໍລິສັດສົມໃຈນຶກຈຳກັດມອບເງິນສົດ 20 ລ້ານກີບ, ບໍລິສັດແຮ່ທາດ COECCO, ທະຫານເຂດ 4 ສສ ຫວຽດນາມມອບເຂົ້າສານ 1 ໂຕນ, ມູນຄ່າ 8 ລ້ານກີບ, ທະນາຄານຮ່ວມພັດທະນາ JDB ມອບເຄື່ອງຊ່ວຍເຫຼືອມູນຄ່າ 105 ລ້ານກີບ, ໂຮງງານຜະລິດປຶ້ມຂຽນແສງເພັດມອບເຄື່ອງຊ່ວຍເຫຼືອ 10,1 ລ້ານກີບ.

  ນອກຈາກນັ້ນຍັງມີກຸ່ມຄາຣະວານ ຊຶ່ງລວມມີ: ບໍລິສັດປີໂຕຣລ້ຽມເທຣດດິ້ງລາວ ມະຫາຊົນ, ບໍລິສັດພີທີແອວ ໂຮນດິ້ງ ຈຳກັດ, ບໍລິສັດຂວັນໃຈການຄ້າຂາອອກ-ຂາເຂົ້າ ຈຳກັດ, ບໍລິສັດສິດທິໂລ ຈິສຕິກ ຈຳກັດ, ທະນາຄານພົງສະຫວັນຈຳກັດ ກຣຸບ ມອບເຄື່ອງຊ່ວຍເຫຼືອໃຫ້ເມືອງເຊໂປນ ແລະເມືອງສອງຄອນລວມມູນຄ່າທັງໝົດ 150 ລ້ານກີບຊຶ່ງໃຫ້ກຽດຮັບເຄື່ອງຊ່ວຍເຫຼືອດັ່ງກ່າວຂອງ ທ່ານ ທ່ອນແກ້ວ ພຸດທະໄກຍະລາດຮອງເຈົ້າແຂວງສະຫວັນນະເຂດພ້ອມຄະນະຫ້ອງວ່າການປົກຄອງແຂວງ.

----

ໜັງສືພິມ ເສດຖະກິດ-ສັງຄົມ

แชร์